Muhadjiri yandikiye amateka kuri Bugesera FC, APR FC ikomeza kuyobora shampiyona

Yanditswe na Eric Tony Ukurikiyimfura
Kuya 27 Mata 2019 saa 07:41
Yasuwe :
0 0

Ibitego bitatu byatsinzwe na Hakizimana Muhadjiri, byafashije APR FC gutahana amanota y’umunsi wa 24 wa shampiyona yari yakiriyemo Bugesera FC kuri uyu wa Gatandatu, itsinze Bugesera FC ibitego 3-0.

Ni ku nshuro ya mbere mu mateka ye, Hakizimana Muhadjiri abashije gutsinda ibitego bitatu (Hat-trick) mu mukino umwe kuva atangiye gukina mu cyiciro cya mbere.

Kuri uyu mukino, APR FC yaherukaga gutsindwa na Rayon Sports, umutoza wayo Zlatko Krmpotić, yakoze impinduka enye mu bakinnyi babanjemo, Danny Usengimana abanza mu kibuga ku nshuro ya mbere mu gihe Omborenga Fitina na Niyonzima Ally bari mu babanje ku ntebe y’abasimbura.

APR FC yafunguye amazamu mu minota y’inyongera y’igice cya mbere ku ikosa Nkusi Prince wa Bugesera FC yakoreye kuri Nshimiyimana Imran mu rubuga rw’amahina, umusifuzi Mulindangabo Moïse yemeza ko ari penaliti, iyi yaje kwinjizwa neza na Hakizimana Muhadjiri.

Ku munota wa 77 w’umukino, APRFC yabonye coup-franc yavuyemo igitego cya kabiri ku mupira watewe na Muhadjiri wari umaze gukinirwa nabi na Mugwaneza, ukora ku mukinnyi wa Bugesera FC wari ku rukuta, ujya mukerezo umunyezamu Nsabimana Jean de Dieu ‘Shaulin’ yari avuyemo.

Mu minota y’inyongera, nibwo Hakizimana Muhadjiri yatsinze igitego cya gatatu cyatumye ageza ibitego 13, ayobora abamaze gutsinda ibitego byinshi muri shampiyona, aho yarushije igitego kimwe Nizeyimana Djuma wa Kiyovu Sports na Ulimwengu Jules wa Rayon Sports.

Gutsinda uyu mukino byafashije APR FC kugira amanota 57 ku mwanya wa mbere, isiga Rayon Sports ya kabiri amanota atandatu, yo izakirwa na AS Muhanga kuri iki Cyumweru.

Mu yindi mikino yabaye kuri uyu wa Gatandatu, Marines FC yatsinze Musanze FC igitego 1-0 cya Nyirinkindi Saleh, Espoir FC inganya na Sunrise FC igitego 1-1. Uwimana Emmanuel ‘Nsoro’ yatsindiye abashyitsi kuri penaliti mu gihe igitego cya Espoir FC cyatsinzwe na Kyambadde Fred.

Abakinnyi babanjemo ku mpande zombi

APR FC: Kimenyi Yves, Rusheshangoga Michel, Imanishimwe Emmanuel, Buregeya Prince, Rugwiro Hervé, Mugiraneza Jean Baptiste, Butera Andrew, Nkinzingabo Fiston, Nshimiyimana Imran, Hakizimana Muhadjiri na Danny Usengimana.

Bugesera FC: Nsabimana Jean de Dieu, Nkusi Prince, Mugwaneza Pacifique, Muhire Anicet, Niyibizi Pierro, Ntwari Jacques, Niyitegeka Idrissa, Nimubona Emery, Kwitonda Alain, Nzigamasabo Steven na Samson Ikechukwu

Umunsi wa 24 wa Shampiyona

Ku wa Gatanu

Kirehe FC 1-0 Gicumbi FC
AS Kigali 1-0 SC Kiyovu

Ku wa Gatandatu

Marines FC 1-0 Musanze FC
Espoir FC 1-1 Sunrise FC
APR FC 3-0 Bugesera FC

Ku Cyumweru tariki ya 28 Mata

AS Muhanga vs Rayon Sports FC (Stade Muhanga)
Mukura VS vs Police FC (Stade Huye)
Etincelles FC vs Amagaju FC (Stade Umuganda)

Hakizimana Muhadjiri ayoboye abamaze gutsinda ibitego byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza