Kwamamaza

Munezero Fiston yasabye imbabazi umuryango mugari wa Rayon Sports

Yanditswe kuya 10-10-2016 saa 06:50' na Jah d'eau DUKUZE


Myugariro w’Ikipe ya Rayon Sports Munezero Fiston yarangije kwandika ibaruwa isaba imbabazi ubuyobozi bw’iyi kipe n’abafana bayo, ku myitwarire itari myiza yagaragaje mu mukino baheruka guhuriramo na Mukura.

Fiston Munezero, ntabwo yagaragaye ku mukino Rayon Sports yanganyijemo na Mukura ibitego 2-2, ni nyuma yaho umutoza ahisemo kumubanza ku ntebe y’abasimbura, maze uyu mukinnyi mpuzamahanga w’umunyarwanda agahita afata icyemezo cyo kujya kwicarana n’abafana aho kujya hamwe na bagenzi be.

Nyuma y’uyu mukino, ubuyobozi bw’iyi kipe hamwe n’abatoza, bahise bamuhagarika mu myitozo binarangira atanagaragaye ku mukino Rayon Sports yatsindagamo AS Kigali ibitego 2-0 kuri uyu wa gatandatu. Umutoza w’iyi kipe y’ i Nyanza, Masudi Djuma, mu kiganiro n’abanyamakuru nyuma y’uwo mukino, yari yatangaje ko ibihano by’uyu mukinnyi byarangiye ndetse atangira imyitozo kuri uyu wa mbere.

Uyu mukinnyi nubwo yari yasoje ibihano yari yahawe byo guhagarikwa icyumweru, ntabwo byamubujije kwandika ibaruwa isaba imbabazi abakunzi b’ikipe akinira ndetse n’ubuyobozi bwe kubera iyo myitwarire yagaragaje i Huye.

Ibaruwa ya Fiston iragira iti: “Mbandikiye mbasaba imbabazi ku bw’imyitwaririre mibi nagaragaje ku mukino wa gicuti twagiranye na Mukura ubwo nanze kwicarana n’abandi ku ntebe y’abasimbura”.

“Nabitekerejeho nsanga ntaritwaye neza none nkaba nsaba imbabazi z’iyo myitwarire kandi mbasezeranya ko bitazongera. Mbashimiye uburyo mwakiriye ubusabe bwanjye.”

Munezero Fiston waje muri Rayon Sports mu mwaka ushize avuye mu Burundi, ni umwe mu bakinnyi bagize uruhare runini ngo iyi kipe yegukane igikombe cy’Amahoro ndetse inabone umwanya wa kabiri muri shampiyona, ikintu cyatumye atorwa mu ikipe y’umwaka ya shampiyona ya 2015-2016.

Imikinire y’uyu musore ariko yagiye isubira inyuma uko shampiyona yagendaga igana ku musozo, ndetse no mu mikino itegura umwaka mushya ubushobozi bwe bwagiye bukemangwa umukino ku wundi. Ibi byatumye atakizera umwanya ubanza mu ikipe nkuko byari bimeze mbere, nyuma yo kuza kwa Ange Mutsinzi wavuye muri AS Muhanga.

Rayon Sports izatangira umwaka mushya wa shampiyona kuri uyu wa Gatanu tariki ya 14 Ukwakira, yakira Police FC kuri Stade ya Kigali guhera ku i saa 18:00. Aya makipe yombi, yaherukaga guhurira kuri iyi stade mu mikino ya AS Kigali, ubwo igitego cya Mussa Camara kuri ubu wavunitse, cyatumye Gikundiro icyura amanota yose yo muri uwo mukino.

Fiston(ibumoso) na Manzi Thierry batumye Rayon Sports igira ubwugarizi bukomeye kurusha andi makipe yose

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved