Kwamamaza

Musanze 0-0 APR FC; Rwabugiri Omar yabujije amanota ikipe yamureze

Yanditswe kuya 5-11-2016 saa 20:05' na Jah d'eau DUKUZE


Umunyezamu w’ikipe ya Musanze Rwabugiri Omar ni we watowe nk’umukinnyi w’umukino, ubwo Musanze akinira yanganyirizaga i Nyakinama na APR FC yamureze 0-0.

Ku kibuga cya Nyakinama kitameze neza nkuko byari byitezwe, amakipe yombi yarangije igice cya mbere nta kipe n’imwe iteye mu izamu umupira ugana urushundura nubwo APR FC yari yagerageje ubugira gatatu imipira yayo ikajya kure y’izamu ryari ririnzwe na Omar Rwabugiri wakuriye mu ishuri rya ruhago ry’iyi kipe.

Musanze yihagazeho...
APR FC icyuye inota rimwe gusa

APR FC yari yihariye umukino mu gice cya mbere, yaje gutangira nabi igice cya kabiri, dore ko Musanze ya Sosthene Lumumba ari yo yatangiye isatira mu minota nka 15 ya mbere y’iki gice. Iyi kipe yo mu majyaruguru, yashoboraga kuba yanabonye igitego ku munota wa 57 ubwo Peter Otema yatereraga ishoti kure, gusa umunyezamu Emery Mvuyekure akawushyira muri Corner ariko agahita avunika.

Iyi mvune y’umunyezamu Emery, yishe imibare y’umutoza Rwasamanzi Yves, wahise amusimbuza agashyiramo Ntaribi Steeven mu gihe Issa Bigirimana yari yahaye umwanya Benedata Janvier, maze Bizimana Djihad agafata umwanya wa Buteera Andrew.

Ikipe ya APR FC yatangiye gusatira cyane izamu rya Musanze gusa kurangirizamo bikomeza kugorana. Ku munota wa 78, umunyezamu Omar Rwabugiri yaje gufata umupira mu kirere gusa aza gutera umugeri Blaise Itangishaka ariko umusifuzi w’umukino ntiyagira icyo akora kuri iryo kosa.

APR FC yaje kubona uburyo bukomeye bwo gutsinda ubwo ku munota wa 81, Sibomana Patrick Papy yazaga guhindura umupira mu rubuga rw’amahina ugahura na Blaise, yajya kuwushyira mu rushundura agakorerwa ikosa rikomeye na Omar ariko na bwo umusifuzi akirinda gutanga penaliti yari bujyane n’ikarita itukura.

Blaise Itangishaka nyuma yo gukorerwa ikosa akaba yahise avunika bikomeye ni ko kujyanwa mu bitaro mu marira, maze iminota icyenda yari isigaye mu mukino, APR FC iyikina ari abakinnyi 10 dore ko gusimbuza byari byarangiye. Iyi kipe y’ingabo z’igihugu ariko nubundi ni yo yaje kwiharira umukino gusa amahirwe yose babonaga, umunyezamu Omar bahaye Musanze ntiyatumaga hari icyo bayabyazamo.

Nyuma y’umukino, umutoza wa APR FC Rwasamanzi Yves yatangaje ko bagerageje ibishoboka gusa ko bagakwiye kuba bahawe penaliti mu minota yanyuma.

Ati “Turatsinzwe ni byo, gusa nkuko mwabibonye umusifuzi yagombaga kuba yatanze penaliti ku ikosa ryari rikorewe Blaise ariko ntakundi ni ko bigenda mu mukino.
Tugiye gutegura imikino iri imbere, turizera ko bizagenda neza."

Ku ruhande rwa Sosthene Lumumba utoza Musanze we, yashimagije umunyezamu we Omar Rwabugiri ku bwe witwaye neza “100%” gusa avuga ko ikibuga cyatumye amakipe yombi adakina umukino yifuzaga.

Mu yindi mikino yakinwaga kuri uyu munsi, ibitego bibiri bya Pierro Kwizera n’icya Camara byatumye Rayon Sports ifata umwanya wa mbere muri shampiyona nyuma yo kunyagirira ku Gisenyi Marines 3-0. Ismi Kagabo na Ndikumasabo Ibrahim bafashije Kirehe gutsinda Etincelles 2-1 mu gihe impozamarira y’iyi kipe y’i Rubavu yatsinzwe na Kambale Salita Gentil. As Kigali yanganyije na Bugesera 0-0, na ho Mukura itsinda Kiyovu Sports 2-1.

Peter Otema yigaragaje cyane muri uyu mukino
patrick Sibomana ahanganye na ba myugariro ba Musanze FC
Imanishimwe Emmanuel yari ahanganye n'abakinnyi ba Musanze FC
Mu mpaka z'imisifurire
Ikibuga cya Nyakinama kitegeye ibirunga
Abafana ba APR FC bari baje ku bwinshi
Bumvaga isaha n'isaha bari butsinde
Abafana ba Musanze bavugaga ko nta kibazo bafite
Omar yari yakaniye ikipe yaje aturukamo
Yakomezaga gushwana n'abakinnyi ba APR
Anakorera ikosa rikomeye Blaise, abakinnyi ba Musanze batabaza muganga
Mu magambo avanze n'amarira Blaise bamutwaye kwa muganga avuga ati Omar umpoye iki, Omar unjijije iki koko?

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved