Kwamamaza

Ndoli yahamije ko APR FC na Rayon Sports zibogamirwa n’abasifuzi

Yanditswe kuya 31-10-2016 saa 06:50' na Jah d'eau DUKUZE


Umuzamu w’ikipe ya AS Kigali Ndoli Jean Claude, yatangaje ko igihe ari iki ngo amakipe amwe asezererwe muri shampiyona, cyane ko n’ubundi aza gukina ariko bikarangira Rayon Sports na APR FC ari zo zitsinze rimwe na rimwe zitabikwiye.

Ibi Ndoli wakiniye ikipe ya APR FC igihe kirekire, yabitangaje nyuma yo kubona ikipe ye nshya ya AS Kigali itsindwa ibitego bibiri mu minota ibiri ya nyuma, bikanarangira itakaje umukino yakinagamo na Rayon Sports ku bitego 2-0.

AS Kigali yakunze kugora Rayon Sports mu myaka yatambutse, n’ubundi yari yihagazeho kuri uyu mukino w’umunsi wa gatatu waberaga kuri Stade ya Kigali kuri iki cyumweru.

Ubwo iyi kipe y’abanyamujyi yizeraga ko icyuye inota rimwe, yaje gutsindwa igitego ku munota wa 88 ubwo Kwizera Pierrot yungukiraga mu gusohoka nabi kwa Ndoli akaruhukiriza umupira mu nshundura.

Iki gitego ariko cyaje kutishimirwa n’abakinnyi ba As Kigali, batangazaga ko uyu muzamu wabo yakorewe ikosa n’umukinnyi wa Rayon Sports, gusa bikarangira umusifuzi yemeje igitego.

AS Kigali byagaragaraga ko yavuye mu mukino, yaje gutsindwa igitego cya kabiri ku munota wa 90, gusa umuzamu w’iyi kipe ashyira ibi byose ku basifuzi.

Nyuma y’umukino Ndoli Jean Claude yaje gutangariza itangazamakuru ati " Uyu Camara araje anshikuza umupira mu ntoki ugwa hasi umusifuzi abireba yanga gusifura. None se tuzakore iki? Tuzakine uwuhe mupira? Niba Rayon Sports ibogamiwe n’abasifuzi, APR nayo bikaba ari uko bizagenda gute se? Ayandi makipe bizagenda gute?”

Umutoza Eric Nshimiyimana we yanze kugira icyo atangaza kuri iki gitego cyateje imvuru hagati y’amakipe yombi avuga ko ari icyemezo cy’umusifuzi kandi atemerewe kugira icyo akivugaho.

Ndoli Jean Claude watwaranye ibikombe bitandukanye na APR FC, yunze mu ry’abatoza nka George Semogelele watozaga Musanze umwaka ushize, ndetse na Goran Kopunovic na Sam Simbwa batoje Police FC hambere, na bo bakomezaga gutangaza ko amakipe ya APR FC na Rayon Sports ahabwa ibyo atagakwiye.

As Kigali kuri ubu ikaba imaze gutsindwa imikino ibiri muri itatu yakinnye uyu mwaka, nubwo gahunda y’ubuyobozi bw’ iyi kipe kwari ukwegukana shampiyona.

Uko imikino y’ umunsi wa gatatu yagenze:

- APR FC 3-1 Mukura VS

- Kiyovu 1-4 Gicumbi

- Bugesera 0-0 Espoir

- Pepiniere 0-1 Kirehe

- Amagaju 0-2 Police

- Sunrise 3-0 Marines

- Rayon Sports 2-0 AS Kigali

- Etincelles 0-1 Musanze


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved