Niyobuhungiro w’imyaka 24 yasimbuye Hamdan ku bunyamabanga bwa Mukura VS

Yanditswe na Jean de Dieu Dukuze
Kuya 9 Ukwakira 2016 saa 05:33
Yasuwe : XX
118 67

Inteko rusange idasanzwe y’Ikipe ya Mukura isize Niyobuhungiro Fidel ari we utorewe kuba Umunyamabanga mushya w’iyi kipe, mu gihe Olivier Nizeyimana yemeye kugaruka ku buyobozi nka Perezida.

Iyi nama yateraniye i Huye kuri iki cyumweru tariki 9 Ukwakira, yatangiye abanyamuryango ba Mukura babwirwa ko impamvu nyamukuru yatumye bahamagarwa ari ukugirango baganire ku bwegure bw’abari abayobozi b’ikipe yabo barimo Perezida ndetse n’umunyamabanga mukuru.

Fidel (iburyo) yari ahanganye na Mushumba ku mwanya w'Ubunyamabanga

Nizeyimana Olivier wari weguye kubera ko umunyamabanga mukuru yeguye, yaje gufata ijambo avuga ko nyuma yo kubisabwa n’abanyamuryango benshi ndetse akabibwirwa n’abandi bayobozi b’amakipe, ngo yasanze ari ngombwa gufata icyemezo cyo kugaruka ku buyobozi. Ku ruhande rw’uwari umunyamabanga mukuru ubwo yahabwaga ijambo yanze kugira icyo atangaza ku cyatumye yegura ndetse avuga ko yifashe.

Amakuru agera ku IGIHE, avuga ko uyu munyamabanga yaba atarimo yumvikana neza na perezida wa Mukura uzwi nka Olivier Volcano, ndetse mbere y’inama akaba yari yasabwe na bamwe mu bafite ijambo muri Mukura kuba yasaba imbabazi Olivier maze akagaruka mu buyobozi ariko ntiyabyemera.

Ibi byahise bikurikirwa no gukora amatora yo gusimbura uyu Sheikh Habimana Hamdan, usanzwe atera inkunga iyi kipe ingana na miliyoni 15 ku mwaka, maze abakandida babiri aba ari bo biyamamariza uyu mwanya. Aba barimo Mushumba Charles wahoze atoza ikipe ya Kaminuza y’abakobwa muri Basketball kuri ubu utoza IPRC South, ndetse na Niyobuhungiro Fidel, umwana wa Gaspard Rutabagisha umucuruzi uzwi cyane i Huye.

Aya matora atamaze gihe kinini, yaje kurangira Niyobuhungiro atowe n’amajwi 85 kuri 15 ya Mushumba mu gihe abagera kuri 20 baje kwifata.

Uretse ibijyanye n’amatora, abanyamuryango ba Mukura bari banifuje ko Visi Perezida w’iyi kipe Nayandi Abraham yakwegura nyuma y’amakuru atari meza yari amaze iminsi amuvugwaho. Uyu muyobozi w’ikipe ya Mukura uherutse gushinja umutoza Okoko uburozi, yaje gutangaza ko atakwegura kuko agifite manda y’imyaka itanu kandi icyo kikaba kitari kiri ku murongo w’ibyigwa.

Niyobuhungiro Fidel watorewe kuba umunyamabanga w’ikipe ya Mukura VS, ni umusore w’ingaragagu wavutse tariki ya 28 Werurwe 1992. Uretse gufana ikipe ya Mukura VS, uyu asanzwe ari n’umufana w’amakipe ya Manchester United na Real Madrid yo ku mugabane w’Uburayi.

Fidel mu mikino ya CHAN 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE