Kwamamaza

Nshuti Savio yatangaje igihe azatekereza kongera amasezerano muri Rayon Sports

Yanditswe kuya 11-10-2016 saa 21:17' na Manzi Rema Jules


Dominique Nshuti Savio usigaje umwaka umwe ku masezerano afitanye na Rayon Sports yatangaje ko nta biganiro aragirana n’iyi kipe kugira ngo azayigumemo ndetse atanabiteganya mbere y’uko uyu mwaka w’imikino 2016/2017 urangira.

Nshuti Savio w’imyaka 19, ni umwe mu bakinnyi ngenderwaho muri Rayon Sports ndetse no mu ikipe y’Igihugu yamaze gufata umwanya uhoraho nyuma yo kwitwara neza umwaka ushize afasha Amavubi kugera muri ¼ muri CHAN 2016 ndetse na Rayon Sports kwegukana igikombe cy’Amahoro.

Uyu musore watowe nk’umukinnyi ukiri muto mwiza w’umwaka yabwiye IGIHE ko uko yitwaye mu mwaka ushize byari byiza ndetse yifuza kurushaho gufasha ikipe ye gutwara igikombe cya shampiyona, ku giti cye agahatanira igihembo cy’umukinnyi wahize abandi.

Ati “Tugiye gutangira undi mwaka, ni igihe cyacu ngo twerekane ko dushoboye kurwanira igikombe cya shampiyona kugera ku munsi wa nyuma. Si akazi koroshye kuko amakipe yose yariyubatse kandi aragishaka ariko Rayon Sports hamwe n’abafana, abatoza n’abayobozi tugomba gukoresha imbaraga zose tukagitwara kuko nitwe tugishaka kurusha abandi.”

Yongeyeho ati “Ku ruhande rwanjye umwaka ushize wabaye mwiza ariko ntacyo byaba bimaze ndakomerejeho kuko nicyo abafana n’ikipe banshakaho. Natwaye igihembo cy’umukinnyi w’umwana witwaye neza ariko ubu ndashaka icy’umukinnyi mwiza wahize abandi bose nubwo nzi neza ko Pierrot agihari kandi bitoroshye kukimwambura kuko ni umuhanga kandi akinisha ubwenge cyane.”

Nshuti Savio mu minsi ishize byahwihwiswaga ko APR FC yaba yaramwegereye ishaka kumusinyisha avuga ko ari mu ikipe akunda afitiye amasezerano kandi agomba kubaha bityo ikijyanye n’ikipe azajyamo azabitekerezaho umwaka urangiye.

Ati “Ibyo kuba baranshatse nta byinshi nabivugaho kuko ndi muri Rayon Sports kandi ndayikunda. Nyifitiye amasezerano y’umwaka niyo nshyizeho umutima. Sinatangira gutekereza ku ikipe nzajyamo umwaka utararangira, birashoboka ko naguma muri Rayon Sports gusa nta biganiro ndagirana n’abayobozi. Binashobotse nkajya hanze byaba ari byiza kurushaho kuko ni inzozi za buri mukinnyi ushaka gutera imbere.”

Savio yageze muri Rayon Sports muri 2015 asinya amasezerano y’imyaka ibiri avuye mu Isonga FC. Nyuma yo kwigaragaza no kwitwara neza, uyu mukinnyi yatangiye kwifuzwa n’amakipe atandukanye akomeye ndetse na Florent Ibenge utoza AS Vita Club yo muri Congo Kinshasa nyuma yo kumubona mu mikino ya CHAN yatangaje ko ari umwe mu bakinnyi beza bari mu Rwanda yakwifuza kugira mu ikipe ye.

Dominique Savio Nshuti umwaka ushize yazonze ba myugariro benshi
Savio Nshuti yari ayoboye Amavubi U20 yasezerewe na Misiri kuri penaliti
Savio Nshuti(ibumoso) mu myitozo yitegura umukino wa Police FC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved