Nyuma yo gukemura ibibazo by’imishahara, Rayon Sports yamanukanye intego i Kirehe

Yanditswe na Manzi Rema Jules, Uwishyaka Jean Louis
Kuya 29 Ukuboza 2016 saa 06:50
45 31

Nyuma yo gukemura ibibazo by’imishahara byavugwaga mu bakinnyi ba Rayon Sports, kuri ubu iyi kipe yerekeje mu Ntara y’u Burasirazuba, kwitegura umukino w’umunsi wa 11 wa shampiyona igomba gukina na Kirehe FC kuri uyu wa Gatanu, aho intego yayo ari ugusoza umwaka ishimisha abafana.

Rayon Sports iyoboye shampiyona kugeza ku munsi wa 10 n’amanota 26 irusha abiri APR FC bahora bahanganiye ibikombe, igomba gusura Kirehe FC y’umutoza Sogonya Hamissi Kishi iri ku mwanya wa 10 n’amanota 11, nyuma yo kumara imikino ine ikurikirana itabona intsinzi.

Iyi kipe yari yavuzwemo ibibazo byo guhemba abakinnyi bamwe abandi ntibabona amafaranga ariko Umunyamabanga wayo Gakwaya Olivier yatangaje ko uko abatari babonye amafaranga babifashe atari ko byari bimeze kuko yatinze kubageraho bitewe n’amabanki bakoresha.

Aganira na IGIHE yagize ati “Sinavuga ko hari ikibazo kiri muri Rayon Sports kuko abakinnyi bose bahembwe. Nta mukinnyi uhemberwa mu ntoki, bose anyura ku mabanki bakoresha; niba umwe ayabonye undi atarayabona ntibivuze ko batahembwe kuko ntabagereraho rimwe. Dufite abakinnyi 24, niba hari hamaze guhembwa 19 hasigaye batanu ntibivuze ko twahembye igice.”

Gakwaya yavuze ko umutima wose bawushyize ku gushaka uko bakura amanota atatu i Kirehe kugira ngo bakomeze inzira yerekeza ku kwegukana igikombe uyu mwaka kuko ari yo ntego y’ikipe.

Ati “Ikintu navuga ni uko umukino wose tuwufata nk’uwa nyuma ariko iyo urangiye turawibagirwa tugategura ukurikiyeho. Kandi buri mukino tuwutegura nk’uko twateguye uwubanziriza, nta kipe n’imwe dusuzugura kuko shampiyona ni urugamba, ni ukubona amanota atatu. Ni ukuvuga ngo umukino wa Kirehe ungana n’uwa APR FC, uwa AS Kigali n’uwa Mukura VS.”

Rayon Sports y’umutoza Masudi Djuma, yanyagiye Musanze FC ibitego 4-1 mu mukino uheruka, yahagurutse i Kigali kuri uyu wa Kane igiye gusura Kirehe FC yatsikiye i Rubavu mu mpera z’icyumweru gishize itakaza amanota atatu itsinzwe na Marines 2-1.

Mu bakinnyi iyi kipe idafite kubera imvune barimo ba myugariro Manzi Thierry, Mutsinzi Ange, Mugisha François bita Master na Senyange Yvan. Rutahizamu Moussa Camara ntibiremezwa niba azakina cyangwa atazika uyu mukino kuko ataragaragaye no ku mukino uheruka kubera uburwayi.

Mu gihe Rayon Sports izaba yesurana na Kirehe FC, mukeba wayo APR FC bahanganiye umwanya wa mbere izaba yasuye Espoir FC i Rusizi mu mukino utoroshye na gato bitewe n’uburyo iyi kipe yigaragaje uyu mwaka aho igeze ku musni wa 10 itaratsindwa ndetse yicaye ku mwanya wa gatanu n’amanota 20.

Imikino yose y’umunsi wa 11 wa shampiyona iteganyijwe kuri uyu wa Gatanu:

Mukura VS vs Amagaju FC (Stade Huye, saa 15:30)
Sunrise FC vs Gicumbi FC (Nyagatare, saa 15:30)
Marines FC vs Pépinière FC (Umuganda, saa 15:30)
AS Kigali vs Etincelles (Nyamirambo, saa 15:30)
Espoir FC vs APR FC (Rusizi, saa 15:30)
Musanze FC vs Bugesera FC (Nyakinama, 15:30)
Police FC vs Kiyovu Sports (Kicukiro,saa 15:30)
Kirehe FC vs Rayon Sports (Kirehe, saa 15:30)

Rayon Sports yabanje kuvugwamo ibibazo by'imishahara y'abakinnyi mbere yo kwerekeza i Kirehe nubwo byaje gukemuka
Gakwaya Olivier avuga ko buri mukino wose bawufata nk'uwa nyuma, bityo ngo intego kuri Kirehe FC ni amanota atatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE