Peace Cup: AS Kigali yasonze APR FC ku munota wa nyuma, Rayon Sports yikura i Rubavu (Amafoto)

Yanditswe na Eric Tony Ukurikiyimfura
Kuya 13 Kamena 2019 saa 06:48
Yasuwe :
0 0

Igitego kitavugwaho rumwe cyatsinzwe na Nshimiyimana Marc Govin mu minota y’inyongera, cyahaye AS Kigali gutsinda APR FC igitego 1-0 mu mukino ubanza wa 1/8 cy’igikombe cy’Amahoro wabereye kuri Stade ya Kigali kuri uyu wa Kane.

APR FC yakiriye uyu mukino idafite Buregeya Prince na Rugwiro Hervé basanzwe bakina mu mutima wa ba myugariro, hitabazwa Niyonzima Ally na Rusheshangoga Michel mu gihe Songayingabo Shaffy yagiriwe icyizere cyo kubanzamo akina ku ruhande.

AS Kigali yari yagaruye Nsabimana Eric utarakinnye umukino wo kwishyura mu majonjora y’ibanze kubera ikarita itukura yari afite mu gihe yaburaga abarimo Bishira Latif ufite amakarita abiri y’umuhondo na Cyitegetse Bogard wavunitse.

Ikipe y’ingabo yashoboraga gufungura amazamu ku buryo bwabonywe na Niyonzima Ally kuri koruneri yatewe na Hakizimana Muhadjiri, uyu mukinnyi wo hagati ashyizeho umutwe, umupira uca hejuru y’izamu.

AS Kigali yahushije uburyo bw’igitego cyabazwe ku ishoti rikomeye ryatewe na Nova Bayama habura iminota itanu ngo igice cya mbere kirangire, umunyezamu Kimenyi Yves awufata mu buryo bugoranye, aho wabanje gukubita ipoto ukamugarukira.

APR FC yatangiranye impinduka mu gice cya kabiri, yinjizamo Omborenga Fitina na Iranzi Jean Claude mu mwanya wa Songayingabo Shaffy na Nshimiyimana Amran, yotsa igitutu AS Kigali, aho Hakizimana Muhadjiri yateye umupira ukomeye ukagarurwa n’umutambiko w’izamu mbere y’uko atsinda igitego cyanzwe n’umusifuzi wo ku ruhande wavuze ko habayeho kurarira.

Sugira Ernest yabaye umukinnyi wa nyuma wasimbuye ku ruhande rwa APR FC ku munota wa 66, afata umwanya wa Danny Usengimana. Hashize iminota 13, ikipe y’ingabo yasigaranye abakinnyi 10 mu kibuga nyuma y’uko Imanishimwe Emmanuel ‘Mangwende’ yari amaze kuvunika kandi bamaze gusimbuza abakinnyi bemerewe.

Habura iminota itatu ngo umukino urangire, Sugira yananiwe kubyaza umusaruro umupira mwiza yahawe na Nshuti Dominique Savio wari ukoze contre-attaque, AS Kigali ibakosoza igitego cyo ku munota wa 90 cyatsinzwe na Nshimiyimana Marc Govin warerewe mu ishuri rya ry’umupira w’amaguru rya APR FC, wateye umupira ari mu rubuga rw’amahina, ukubita umutambiko w’izamu umanukira mu izamu ndetse umusifuzi wo ku ruhande yemeza ko warenze umurongo.

Mu yindi mikino yabaye, Rayon Sports yikuye i Rubavu, ihatsindira Marines FC igitego 1-0 cya Jules Ulimwengu mu gice cya kabiri, Gasogi United itsinda Rwamagana City FC igitego cya Habimana Yves mu gihe Hope FC yanganyije na Etincellles FC ibitego 2-2. Imikino yo kwishyura izaba ku Cyumweru.

AS Kigali: Shamiru Bate, Murengezi Rodrigue, Niyomugabo Claude, Rurangwa Mossi, Nsabimana Eric, Benedata Janvier, Ntamuhanga Tumaini, Nshimiyimana Marc Govin, Ssentongo Farouq, Nova Bayama na Kalanda Frank.

APR FC: Kimenyi Yves, Mugiraneza Jean Baptiste, Rusheshangoga Michel, Imanishimwe Emmanuel, Niyonzima Ally, Songayingabo Shaffy, Nshimiyimana Amran, Nkinzingabo Fiston, Nshuti Dominique Savio, Hakizimana Muhadjiri na Usengimana Danny.

Umunyezamu wa kabiri wa APR FC, Ntwari Fiacre, aganira na Nshimiyimana Marc Govin bakinannye mu Intare FC
Bate Shamiru ashimirwa n'umutoza we Higiro Thomas
Niyomugabo Jean Claude ahetse ku mugonga Marc Govin watsinze igitego
Abakinnyi ba APR FC barimo Sugira Ernest bacitse intege, ntibiyumvishaga ibibabayeho
Bate Shamiru ntiyoroheye abarimo Muhadjiri na Savio
Umuhuzabikorwa w'abafana ba APR FC, Rtd. Col. Kabagambe Godfrey yifashe mu mutwe ubwo APR FC yahushaga igitego
Visi Meya w'Umujyi wa Kigali Busabizwa Parfait na Visi Perezida wa APR FC, Maj. Gen. Mubaraka Muganga
Itangishaka Blaise na Mugunga batifashishijwe uyu munsi barebanye umukino na bagenzi babo barimo Nsabimana Aimable wa Police FC
Ndarusanze Jean Claude wa AS Kigali na we ntabwo yakinnye uyu mukino
Omborenga Fitina yabanje ku ntebe y'abasimbura, ajya mu kibuga mu gice cya kabiri
Hakizimana Muhadjiri ahanganiye umupira na Nsabimana Eric
Sekamana Maxime na we ntabwo yakinnye uyu mukino ku ruhande rwa APR FC
Nsabimana Eric yagoye abakinnyi ba APR FC barimo Sugira Ernest
AS Kigali yatsinze igitego ku mupira wakubise umutambiko, umanukira mu izamu
Abakinnyi ba AS Kigali bishimira igitego mu minota y'inyongera
Mulisa na Mateso baganira mbere y'umukino
Nsabimana Eric anywa ku mazi mbere y'uko umukino utangira
Ssentongo Saifi yasimbuwe ku munota wa 10 nyuma yo kuvunika
Abakinnyi 11 ba APR FC babanje mu kibuga
AS Kigali yabanje mu kibuga
Nshuti Savio ahanganiye umupira na Ntamuhanga Tumaini wa AS Kigali
Kimenyi Yves akuramo umupira ukomeye watewe na Nova Bayama
Imanishimwe Emmanuel yavunitse ku munota wa 79, APR FC isoza umukino ifite abakinnyi 10 mu kibuga kuko yari yarangije gusimbuza

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza