Pépinière FC ishobora kwivana muri shampiyona, yamaze gusezerera abakinnyi n’abatoza

Yanditswe na Manzi Rema Jules
Kuya 26 Ukuboza 2016 saa 01:28
Yasuwe :
0 0

Pépinière FC yamaze gusezerera abakinnyi bose n’abatoza basubira mu miryango yabo ndetse ishobora no kuva burundu muri shampiyona igihe Ferwafa itayemerera kongera gukinira ku kibuga cyayo kiri ku Ruyenzi.

Iyi kipe yari yazamutse uyu mwaka muri shampiyona y’icyiciro cya mbere ishobora kutayirangiza kubera icyemezo Ferwafa yafashe cyo kuyifungira ikibuga yajyaga ikiniraho ivuga ko kitujuje ibisabwa.

Pépinière FC iheruka kubura ku mukino w’umunsi wa 10 muri Shampiyona ihita iterwa mpaga na AS Kigali ku wa Gatandatu, tariki ya 24 Ukuboza.

Uyu mukino yagombaga kwakira, wimuriwe kuri Stade ya Kicukiro, iyi kipe ibura ubushobozi bwo kuhagera; kuri ubu yamaze gusezerera abakinnyi bayo n’abatoza mu gihe kitazwi nk’uko umutoza wayo mukuru, Kayiranga Jean Baptiste yabitangarije IGIHE.

Ati “Ubuyobozi bwatubwiye ko bigoranye kuba twakomeza gukina shampiyona igihe Ishyirahamwe ry’Umupira w’Amaguru ritakumva ubusabe bw’ikipe kugira ngo ikibuga cyacu gifungurwe.”

“Twe nk’abatoza n’abakinnyi nta kibazo twari dufite twakabaye dukina kuko niko kazi kacu ariko birumvikana ubuyobozi nibwo bwatuzanye muri shampiyona, nibwo buzi ibyo busohora n’ubushobozi buhari. Igihe bavuze ko bidashoboka ubwo nta kindi twakora.”

Yakomeje agira ati “Kuri gahunda abakinnyi n’abatoza babaye basubiye mu miryango yabo kugeza ubwo ikibazo kizaba gikemutse.”

Pépinière FC ishobora gusezera muri shampiyona y’uyu mwaka?

Kayiranga yavuze ko iyo aganira n’ubuyobozi bamubwira ko batifuza gusezera ndetse bafite icyizere ko Ferwafa izabumva ikabemerera gukomeza gukoresha ikibuga cyabo ariko ngo amahirwe menshi ni uko igihe ibi bitakunda ikipe itakongera kugaragara muri shampiyona.

Iyi kipe isanzwe izwiho kugira amikoro make, benshi mu bakinnyi ikinisha ntibahembwa ahubwo ni abashaka amahirwe yo kwigaragaza bakaba bazagurwa n’amakipe akomeye.

Pépinière FC na Rayon Sports FC niyo makipe rukumbi akina shampiyona y’icyiciro cya mbere mu Rwanda adafite akarere cyangwa ikindi kigo cya Leta nk’umuterankunga. Ifashwa n’abantu ku giti cyabo bayikunda banayifashije kuzamuka mu rwego rwo gufasha abakinnyi batahabwaga imyanya mu yandi makipe kubona amahirwe.

Kugeza ku munsi wa 10 Pépinière FC niyo iri ku mwanya wa nyuma n’inota rimwe ibanjirijwe na Gicumbi FC ifite ane, izi zombi zikaba zihuriye ku kibazo kimwe cyo kuba zitemerewe gukinira ku bibuga byazo kuko byahagaritswe na Ferwafa mu gihe kitazwi.

Abatoza ba Pépinière FC bayobowe na Kayiranga Baptiste (uwa mbere ibumoso) bamaze gusubira mu miryango yabo mu gihe kitazwi
Iki kibuga cyafunzwe ku munsi wa munani wa shampiyona nyuma y'umukino Pépinière FC yakiriyemo Police FC
Pépinière FC yasezereye abakinnyi bayo bose mu gihe kitazwi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza