Pépinière izasura Rayon Sports nyuma yo kwemera kugaruka muri shampiyona

Yanditswe na Jah d’eau Dukuze
Kuya 5 Mutarama 2017 saa 11:38
Yasuwe : XX
0

Ikipe ya Pépinière FC yo ku Ruyenzi, yarangije guhamya ko izakina umukino w’umunsi wa 12 wa shampiyona uzayihuza na Rayon Sports nyuma yo gufata umwanzuro wo kugaruka muri shampiyona y’icyiciro cya mbere.

Tariki ya 27 Ukuboza, ni bwo Pépinière, nshya mu cyiciro cya mbere mu Rwanda, yari yatangaje ko yikuye muri shampiyona kubera guhagarikirwa ikibuga; ikintu ku bayobozi bayo babonaga ko kitashoboka kuko intego bari bafite kwari ugushimisha abaturage bo ku Ruyenzi.

Pépinière na Rayon Sports zari zanganyije mu mukino wa gicuti

Intangiriro zo kwibaza ku kibuga cya Runda ni umukino Pépinière yatsinzwemo na Police 2-1 ku mukino w’umunsi wa munani, aho Ishyirahamwe ry’Umupira w’Amaguru mu Rwanda ryifashishije amafoto ya IGIHE mu kwemeza ko iki kibuga kitagakwiye kuba cyakirirwaho shampiyona.

Umukino wakurikiyeho wa APR FC waje kujyanwa kuri Stade ya Kigali i Nyamirambo nyuma yo kumvikana kw’amakipe yombi gusa Ferwafa iza gufata icyemeza ko n’indi mikino bizagenda gutyo.

Ibi byaje gukurikirwa n’amabaruwa Ferwafa yandikiranye na Pépinière ibwira iyi kipe ko umukino wayo na AS Kigali ugomba kubera ku Kicukiro kuko ikibuga cyayo kitameza neza mu gihe yo yakomezaga kuvuga ko kiteguye kwakira umukino.

Uyu mukino w’umunsi wa 10 wa shampiyona Pépinière yaje gutegerereza AS Kigali ku Ruyenzi ntiyayibona, mu gihe abanyamujyi na Ferwafa bari ku Kicukiro birangira banayiteye mpaga.

Nyuma y’iyi mpaga, Pépinière yaje gutangaza ko isezeye muri shampiyona kubera icyo yitaga akarengane binarangira itanitabiriye umukino w’umunsi wa 11 yari buhuriremo na Marines. Nyuma y’ibiganiro iyi kipe yari imazemo iminsi na Ferwafa, byaje kurangira yemeye kugaruka muri shampiyona, nkuko Perezida w’iyi kipe Munyankumburwa Jean Marie yabitangarije IGIHE.

Yagize ati “Ni byo twemeye kugaruka muri shampiyona kuko ikibuga cyacu bacyemeye. Twabyemeye nyuma yo kureba inyungu z’abakinnyi n’iz’abaturage bo ku Ruyenzi.”

Uyu muyobozi utangaza ko yashoye amafaranga menshi muri iyi kipe, yakomeje avuga ko ku bijyanye na mpaga batewe nta mwanzuro wari wabifatirwa, gusa iyi kipe ikaba ifite icyizere ko zishobora kuzakurwaho imikino igasubirwamo.

Pépinière ifite inota rimwe ryonyine muri shampiyona, izasura Rayon Sports kuri Stade ya Kigali kuri uyu wa Gatandatu, aho amakipe yombi yari yanganyije igitego 1-1 mu mukino wa gicuti yakinnye mbere y’uko shampiyona itangira.

Pépinière yizeye kongera gukura inota kuri Rayon Sports nyuma yo gufata icyemezo cyo kugaruka muri shampiyona

Uko imikino y’umunsi wa 12 ihagaze

Kuwa gatanu tariki ya 6 Mutarama 2017

  • Kiyovu vs Espoir (Mumena, 15h30)

Kuwa gatandatu tariki ya 7/1/2017

  • APR FC vs AS Kigali (Stade de Kigali, 15:30)
  • Bugesera vs Kirehe (Nyamata, 15:30)
  • Amagaju vs Musanze (Nyamagabe, 15:30)
  • Police vs Sunrise (Kicukiro, 15:30)

Ku cyumweru tariki ya 8 Mutarama 2017

  • Etincelles vs Marines Fc (Stade Umuganda, 15:30)
  • Rayon Sports vs Pépinière (Stade de Kigali, 15:30)
  • Gicumbi vs Mukura VS (Stade de Gicumbi, 15:30)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza