Kwamamaza

Police FC yanyagiye Gicumbi FC mbere yo gucakirana na Rayon Sports muri shampiyona

Yanditswe kuya 7-10-2016 saa 21:39' na Manzi Rema Jules


Police FC yari imaze iminsi idahagaze neza yanyagiye Gicumbi FC ibitego bine ku busa mu mukino wa gicuti wabaye kuri uyu wa Gatanu, icyizere cyo kwitwara neza ku mukino ufungura shampiyona uzayihuza na Rayon Sports gikomeza kwiyongera.

Umutoza mushya wa Police FC, Seninga Innocent nyuma y’umukino yatangaje ko ikipe ye imeze neza ndetse yiteguye kwihimura kuri Rayon Sports itaratsinda mu mikino itatu iheruka harimo uwo yatsinzwe 2-1, 3-1 n’undi amakipe yombi yanganyije 1-1.

Ku mukino ufungura shampiyona kuwa Gatanu tariki 14 Ukwakira, Police FC izacakirana na Rayon Sports mu mukino w’ishiraniro utegerejwe n’abatari bake mu bakunzi ba ruhago mu Rwanda.

Police FC kuva yazana umutoza Seninga Innocent watozaga Etincelles, yari itarabasha kwerekana ko ari ikipe igiye guhanganira igikombe cya shampiyona nk’uko ariyo ntego uyu mutoza yahawe.

Nyuma yo gusezererwa itarenze umutaru mu irushanwa rya AS Kigali Pre-Season Tournament, yakinnye imikino ibiri ya gicuti inganya na Kirehe FC izamutse mu cyiciro cya mbere igitego 1-1, itsindwa na AS Kigali 3-1.

Mu mukino usoza iya gishuti iyi kipe yakinnye na Gicumbi FC kuri stade ya Kicukiro, yayinyagiye ibitego 4-0 bya Danny Usengimana, Hegman Ngomirakiza, Antoine Dominique na Ndayishimiye wahoze anakinira Gicumbi FC .

Iyi ntsinzi yagaruriye Seninga Innocent icyizere ko na Rayon Sports bazakina ku munsi wa mbere wa shampiyona mu cyumweru gitaha bazayitsinda bagatangira bahagaze neza mu rugamba rwo gushakira iyi kipe y’abashinzwe umutekano igikombe cya mbere cya shampiyona mu mateka yayo.

Ati “ Rayon Sports ni ikipe nziza yariyubatse cyane ariko umukino w’uyu munsi umpaye icyizere kuko abakinnyi bagaragaje ishyaka cyane ku buryo nidukomeza gutya nta kipe yadutera ubwoba. Birumvikana mu minsi yashize hari imikino tutitwayemo neza ariko impamvu ni uko nari mushya mfite abakinnyi benshi bashya nagombaga kubanza kumvisha uburyo bwanjye bw’imikinire.”

Seninga kandi yahakanye ko ari mu mazi abira kubera uburyo ikipe ye itarimo gutanga icyizere kandi ubuyobozi bwayo buvuga ko iri ku rwego rwo guhatanira igikombe nkuko Perezida w’ikipe, Twahirwa Dodo yabitangaje mu muhango wo kwerekana abakinnyi bashya n’abatoza muri Nyakanga avuga ko umutoza udahatanira igikombe uwo Police FC itamukeneye.

Yakomeje avuga ko kuba agiye gutangira shampiyona akina n’ikipe bahanganiye igikombe ari amahirwe kuko igihe azaba abashije kuyitsinda bizatuma abakinnyi batinyuka, ishyaka barimo kugaragaza rikiyongera ku buryo banakomerezaho umwaka wose.

Seninga Innocent wahoze atoza Etincelles yaje muri Police FC asimbuye Cassa Mbungo André wari umaze kwirukanwa nyuma yo kurangiza ku mwanya wa gatanu muri Shampiyona y’umwaka ushize.

Umutoza wa Police FC, Seninga Innocent yatangaje ko yiteguye gutangira shampiyona neza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved