Kwamamaza

Rayon Sports ishobora kugarura Cedric wabaye umutarutwa mu mitima y’abafana

Yanditswe kuya 8-11-2016 saa 21:13' na Manzi Rema Jules


Hamis Cedric wahoze ukinira Rayon Sports akanayigiriramo ibihe byiza birimo no kuyihesha igikombe cya shampiyona cya 2013, ashobora kuyigarukamo nyuma yo kurangiza amasezerano mu ikipe ya Chibuto FC yo muri Mozambique yakiniraga.

Uyu mugabo ukomoka i Burundi uri mu Rwanda ubu, biravugwa ko yaje mu biganiro na Rayon Sports kugira ngo ayigarukemo abe yazayifasha mu mikino Nyafurika (CAF Confederation Cup) iyi kipe izahagarariramo u Rwanda.

Mu kiganiro na IGIHE, umunyamabanga w’iyi kipe, Gakwaya Olivier, ntiyemeje cyangwa ngo ahakane aya makuru, ariko avuga ko kuyigarukamo byaterwa n’icyifuzo cy’umutoza.

Ati “Kugeza ubu ntabwo turagirana nawe ibiganiro, icyo nzi ni uko ari hano mu biruhuko kuko shampiyona aho yakinaga yararangiye. Kuba yaza muri Rayon Sports ntabyo umutoza aradusaba ariko aramutse agaragaje ko amwifuza twareba cyane ko ari n’umukinnyi warangije amasezerano.”

Hamis Cedric ni umwe bakinnyi batazibagirana mu mitima y’abakunzi ba Rayon Sports ahanini kubera ubuhanga yagaragaje n’uruhare rwe ku kwegukana igikombe cya shampiyona cya 2013 atsinda ibitego 16 mu mikino 14 ya shampiyona yakinnye.

Yayivuyemo muri 2014 agikunzwe cyane n’abafana ariko kubera ibihano byo kumara amezi atandatu adakina no gutanga amande y’ibihumbi 50 yari amaze gufatirwa n’Ishyirahamwe ry’umupira w’amaguru mu Rwanda,Ferwafa, rimushinja kugira uruhare mu mvururu zakurikiye umukino wa AS Kigali na Rayon Sports, wabaye ku wa 20 Mata uwo mwaka, yerekeje muri Mozambique aho yari amaze imyaka ibiri.

Kuri ubu Rayon Sports ifite abanyamahanga bane barimo babiri nabo bakomoka i Burundi, Kwizera Pierrot na Nahimana Shassiir, umunya-Mali Moussa Camara n’umunyekongo Mugheni Fabrice, bigoye kugira ngo izane uwa gatanu kandi mu kibuga yemerewemo batatu gusa.

Muri Chibuto FC, Cedric asoje amasezerano ayifashije kurangiza ku mwanya wa gatatu muri shampiyona n’amanota 50 irushwa 11 na Ferroviário Beira yegukanye igikombe.

Hamis Cedric (wambaye umweru) ngo ashobora kugaruka muri Rayon Sports yari amaze imyaka ibiri avuyemo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved