Rayon Sports mu nzira zo gusinyisha umunya-Cameroun warambagijwe na Bugesera FC

Yanditswe na Ishimwe Israel
Kuya 11 Mutarama 2017 saa 01:48
43 29

Nyuma y’iminsi ibiri, Rayon Sports itangiye kugerageza Umunya-Ghana, Faisal Awoto wakinnye muri FC Twente mu cyiciro cya mbere mu Buholandi, iyi kipe yongeye kuzana rutahizamu Etienne Fred Ngiladjoe wo muri Cameroun, imwambuye Bugesera FC bivugwa ko bari bamaze iminsi mu biganiro.

Kuzana abakinnyi bashya b’abanyamahanga biri mu rwego rwo gufasha iyi kipe y’i Nyanza kwiyubaka cyane mbere y’uko isoko ryo kugura no kugurisha muri uku kwezi rifunga.

Rutahizamu Ngiladjoe utifuje kuganira n’itangazamakuru nyuma y’imyitozo yo kuri uyu wa Gatatu yatangaje ko azagira icyo atangaza kuri uyu wa Kane nyuma y’umukino wa gicuti Rayon Sports izakina n’ikipe igizwe n’abakinnyi b’i Nyamirambo bakanyujijeho bifatanyije n’abagikina ari nabwo umutoza Masoudi Djuma azemeza niba amushimye akaba yahita ashyira umukono ku masezerano.

Gusa amakuru agera ku IGIHE ni uko Ngiladjoe yari yaje mu Rwanda yavuganye na Bugesera FC ndetse yanayikozemo imyitozo kabiri. Ku mugoroba wo kuwa Mbere abakunzi ba Rayon Sports bari bamubonye bakamwishimira bahise bashaka uko yaza mu ikipe yabo bamwambura Bugesera FC kuko yari atarayisinyira.

Etienne Fred Ngiladjoe wo muri Cameroun ashobora kuba umwe mu bakinnyi ba Rayon Sports

Umutoza Masoudi yatangaje ko yaba Ngiladjoe ndetse n’umunya-Ghana Faysal nyuma y’imyitozo bakoze muri Rayon Sports azamenya niba bose yabagumana kuri uyu wa Kane bitewe n’uko bazitwara mu mukino wa gicuti ariko yongeraho ko abakeneye cyane.

Ati “Aba bakinnyi tuzabapima ejo. Hari umunya-Cameroun umwe witwa Etienne n’Umunya-Ghana witwa Faysal, tuzabareba ejo niba bazabishobora tuzabagumana nibatabishobora ubwo ni ugusubira iwabo.”

Ku makuru avuga ko Rayon Sports ishobora gutakaza Umunya-Mali Moussa Camara wifuzwa n’ikipe yo mu Misiri itaramenyekana, Masoudi yavuze ko ntaho bihuriye no kuba bashaka kuzana abakinnyi bashya.

Ati “Nta mukinnyi tuzatakaza. Kuzana abandi ntibivuze ko hari abazagenda ahubwo barimo kuvunika cyane. Ntabwo wagumana rutahizamu umwe byaba ari nko kwishyira mu byago. Mu mikino mpuzamahanga dukeneye abakinnyi basatira benshi kuko dukeneye ibitego.”

Uretse gukomeza gukubana na APR FC ku gikombe cya shampiyona aho iyoboye n’amanota 32 irusha iyi kipe y’ingabo z’Igihugu atanu, Rayon Sports irashaka no kongera imbaraga cyane yitegura imikino Nyafurika ya Orange CAF Confederation Cup izasohokeramo u Rwanda.

Rayon Sports izakina umukino wa mbere hagati ya tariki 10-12 Gashyantare 2017 isura Al Salam Wau yo muri Sudani y’Epfo muri iri rushanwa, ubuyobozi bw’ikipe y’I Nyanza butangaza ko bufite intego yo kugarukira mu matsinda.

Etienne ari kumwe n'umufana wa Rayon Sports uzwi nk''Umu-Rayon w'ukuri'
Myugariro Mugabo Gabriel (ibumoso) nawe akomeje imyitozo muri Rayon Sports
Masoudi yavuze ko azamenya niba aba bakinnyi abagumana kuri uyu wa Kane
Umunya-Ghana, Awoto (hagati) nawe aracyakora imyitozo ategereje guhabwa amasezerano muri Rayon Sports
Masoudi na Lomami bafatanya gutoza Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE