Kwamamaza

Rayon Sports yatsinze AS Kigali mu mukino wasojwe no guterana ingumi

Yanditswe kuya 30-10-2016 saa 18:38' na Manzi Lema Jules


Ibitego bibiri by’Abarundi Kwizera Pierrot na Nahimana Shassiir nibyo byahesheje intsinzi ikipe ya Rayon Sports mu mukino w’ishiraniro hagati y’aya makipe yombi wongeye gusozwa n’imvururu nkuko byari byagenze mu 2014.

Amahane n’ubushyamirane byo ku rwego rwo hejuru nibyo byaranze umukino w’umunsi wa gatatu wa shampiyona hagati ya AS Kigali na Rayon Sports yafashijwe na Kwizera Pierrot na Nahimana Shassiir kubona amanota atatu bigoranye.

Si benshi bakwemera ko Rayon Sports ari umukeba wa AS Kigali kuko amateka yazo atandukanye cyane ndetse bigoranye ko iyi kipe y’Umujyi wa Kigali izigondera ibikombe birindwi bya shampiyona, icyenda by’igihugu na kimwe cya Cecafa Kagame Cup.

Gusa ku bakurikirana imikino ihuza aya makipe nta gushidikanya ko ari umwe muri mike irangwa n’ishyaka ridasanzwe ndetse bikarenga aho n’ibipfunsi bivuza ubuhuha.

Kuri iki Cyumweru tariki 30 Ugushyingo 2016 aya makipe yombi yagombaga kwisobanura ku munsi wa gatatu wa shampiyona kuri Stade ya Kigali ariko nyuma y’igice cya mbere cyari cyarangiye ari ubusa ku busa nta n’uburyo bwinshi bw’ibitego impande zombi zabonye, igice cya kabiri cyaje ari injyanamuntu.

Nubwo amakipe yombi yari yatakaje amanota ku munsi wa kabiri, Rayon Sports niyo yari iri ku gitutu cyane bitewe n’abafana bayo bari buzuye stade uko iminota yagendaga isatita umusozo batangira kuririmba basaba igitego dore ko byageza ku munota wa 85 ari ubusa ku busa.

Kuri uwo munota ku makosa ya ba myugariro ba AS Kigali batabashije kuvana umupira imbere y’izamu kandi Ndoli Jean Claude yari yamaze kugwa hasi, kapiteni wa Rayon Sports Kwizera Pierrot yawuboneje mu rushundura intambara iravuka.

Ndoli wavugaga ko rutahizamu wa Rayon Sports Moussa Camara yamusunitse mbere y’uko igitego kijyamo, ntiyabashije kubyakira n’uburakari bwinshi asingira umusifuzi Uwikunda Samuel amufata mu ijosi, Nshimiyimana Eric na bagenzi be baza gutabara.

Rayon Sports yaje no kubona igitego cay kabiri cya Nahimana Shassiir ku munota wa gatatu w’inyongera nubwo cyo nta mukinnyi wakiburanye ariko cyongereye uburakari ku ruhande rwa AS Kigali ku buryo n’umukino urangiye bashatse kurwana ariko abatoza barabitambika.

Izi mvururu zije zikurikira izabaye muri Mata 2014 ubwo aya makipe yanganyaga igitego 1-1 kuri stade Amahoro hakaba imvururu abafana bakamena ibirahure ndetse bamwe bakaza gufatirwa ibihano birimo no guhagarikwa.

Abakinnyi ba Rayon Sports babanje mu kibuga

Mutuyimana Evariste, Munezero Fiston, Manzi Thierry, Irambona Eric, Nzayisenga Jean d’Amour bita Mayor, Niyonzima Olivier Sefu, Manishimwe Djabel, Nahimana Shassiir, Kwizera Pierrot, Dominique Nshuti Savio na Moussa Camara.

Abakinnyi ba AS Kigali babanje mu kibuga

Ndoli Jean Claude, Nshutinamagara Ismail Kodo, Bishira Latif, Ntwari Evode, Tuyisenge Pekeyake,Murengezi Rodrigue, Iradukunda Eric, Ndahinduka Michel, Ntamuhanga Tumaine Tity, Kubwimana Cedric na Sebanani Emmanuel Crespo

Uko imikino yose y’ umunsi wa gatatu wa Shampiyona yarangiye:

- APR FC 3-1 Mukura VS
- Kiyovu Sports 1-4 Gicumbi FC
- Bugesera FC 0-0 Espoir FC
- Pépinière FC 0-1 Kirehe FC
- Amagaju FC 0-2 Police FC
- Sunrise FC 3-0 Marines FC
- Rayon Sports 2-0 As Kigali
- Etincelles FC 0-1 Musanze FC

Abakinnyi ba Rayon Sports babanje mu kibuga
Abakinnyi umutoza Eric Nshimiyimana yari yabanje mu kibuga
Imvururu zatumye Djabel ajyanwa hanze y'ikibuga nyuma yo gukandagirwa
Umuzamu wa AS Kigali, Ndoli Jean Claude yashyamiranye n'abakinnyi ba Rayon Sports nyuma y'igitego cya mbere
Abafana ba Rayon Sports bari mu byishimo byo ku rwego rwo hejuru
Kodo usigaye ukinira AS Kigali nyuma y'umukino yagaragazaga ukutishima
Masudi Djuma yasazwe n'ibyishimo ikipe ye ibonye igitego mu minota ya nyuma

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved