Riyad Mahrez, Iheanacho na Iwobi mu begukanye ibihembo by’abakinnyi beza muri Afurika

Yanditswe na Manzi Rema Jules
Kuya 7 Mutarama 2017 saa 07:54
Yasuwe : XX
0

Umunya-Algeria Riyad Mahrez wafashije Leicester City kwegukana shampiyona y’u Bwongereza umwaka ushize niwe watowe nk’umukinnyi mwiza w’Umunyafurika wa 2016, mu gihe Kelechi Iheanacho ukinira Manchester City yatowe nk’umukinnyi ukiri muto utanga icyizere, Alex Iwobi atwara igikombe cy’umukinnyi ukiri muto wahize abandi ku mugabane.

Mahrez w’imyaka 25 yari ahanganye n’Umunya- Gabon, Pierre-Emerick Aubameyang, wegukanye iki gihembo umwaka ushize ndetse n’Umunya- Senegal Sadio Mane ukomeje kubica bigacika muri Liverpool.

Uyu mukinnyi wavukiye mu Bufaransa ariko agahitamo gukinira igihugu cy’Abasekuru aricyo Algeria, yatangaje ko ari iby’agaciro kuba ibyo yakoze umwaka ushize bitararengejwe ingohe, igikombe agitura umuryango we ndetse n’abafana.

Yagize ati “ Ni iby’agaciro guhabwa iki gihembo. Ndishimye cyane. Ndashimira abakinnyi dukinana muri Leicester City na Algeria. Iki gihembo ngituye umuryango wanjye ndetse n’abantu bose banshyigikira umunsi ku munsi.”

Leicester City yakoze amateka umwaka ushize yegukana igikombe cya shampiyona nyuma y’umwaka umwe yarwaniraga kutamanuka mu cyiciro cya kabiri kandi Mahrez yayibereye inkingi ya mwamba muri urwo rugamba ayitsindira ibitego 17 atanga n’imipira 10 ivamo ibitego mu mikino 37 yayikiniye.

Yanakoze amateka yo kuba umunya- Algeria wa mbere wegukanye shampiyona y’u Bwongereza ndetse bikurikirwa no gutorwa nk’umukinnyi mwiza w’umwaka muri iyi shampiyona benshi bemeza ko ikomeye kurusha izindi ku Isi.

Umukinnyi w’umwaka yabaye Riyad Mahrez

Aba bakinnyi bose uko ari batatu bari bahanganiye iki gihembo, bagaragaye mu ikipe yatowe y’abakinnyi 11 beza ku mugabane wa Afurika muri 2016 kimwe na myugariro wa Manchester United Eric Bailly, umuzamu w’Umugande, Denis Onyango wanatowe nk’umukinnyi mwiza ku mugabane mu bakina imbere muri Afurika nyuma yo gufasha Mamelodi Sundowns kwegukana champions League agafasha na Uganda kubona itike y’igikombe cya Afurika.

Mu bakobwa, Umunya- Nigeria Asisat Oshoala ukinira Liverpool niwe watowe nk’uwahize abandi nyuma yo gufasha igihugu cye kwegukana igikombe cya Afurika mu bagore. Akaba yari yaranegukanye iki gihembo muri 2014.

Mu bakiri bato, umunya-Nigeria w’imyaka 20 Alex Iwobi ukinira Arsenal niwe watowe nk’umukinnyi mwiza kurusha abandi mu bato mu gihe mugenzi we, Kelechi Iheanacho, rutahizamu wa Manchester City yatowe nk’umukinnyi ukiri muto ugaragaza impano utanga n’icyizere ku mugabane wa Afurika.

Uko ibihembo byose byatanzwe

Umukinnyi w’umwaka

Riyad Mahrez (Algeria & Leicester City)

Umukinnyi w’umwaka ariko ukina muri Afurika imbere

Denis Onyango (Uganda & Mamelodi Sundowns)

Umukinnyi w’umugore w’umwaka

Asisat Oshoala (Nigeria & Liverpool y’abagore)

Umukinnyi utanga n’icyizere ko azaba igihangange

Kelechi Iheanacho (Nigeria & Manchester City)

Umukinnyi mwiza ukiri muto

Alex Iwobi (Nigeria & Arsenal)

Umutoza w’umwaka

Pitso Mosimane (Mamelodi Sundowns)

Ikipe y’umwaka

Mamelodi Sundowns

Ikipe y’igihugu y’umwaka

Uganda

Ikipe y’abagore y’umwaka

Nigeria

Umusifuzi w’umwaka

Bakary Papa Gassama

Ikipe y’abakinnyi 11 bahize abandi yakozwe na CAF

Mu izamu: Denis Onyango (Uganda & Mamelodi Sundowns)

Ba myugariro: Serge Aurier (Côte d’Ivoire & PSG), Aymen Abdenour (Tunisia & Valencia), Eric Bailly (Côte d’Ivoire & Manchester United), Joyce Lomalisa (DRC & AS Vita)

Abakina hagati: Khama Billiat (Zimbabwe & Mamelodi Sundowns), Rainford Kalaba (Zambia & TP Mazembe), Keegan Dolly (South Africa & Mamelodi Sundowns)
Abataha izamu:Pierre-Emerick Aubameyang (Gabon & Borussia Dortmund), Sadio Mane (Senegal & Liverpool), Riyad Mahrez (Algeria & Leicester City)

Abasimbura: Aymen Mathlouthi (Tunisia & Etoile du Sahel), Kalidou Koulibaly (Senegal & Napoli), Salif Coulibaly (Mali & TP Mazembe), Islam Slimani (Algeria & Leicester City), Mohamed Salah (Egypt & Roma), Kelechi Iheanacho (Nigeria & Manchester City), Alex Iwobi (Nigeria & Arsenal)

Umukinnyi utanga icyizere ko azaba igihangange yabaye Kelechi Iheanacho
Umukinnyi mwiza ukiri muto yabaye Alex Iwobi ukinira Arsenal, umusore Jay Jay Okocha abereye nyirarume

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza