Robertinho agiye guhura na Perezida wa Rayon Sports baganire ku ngingo ebyiri

Yanditswe na Eric Tony Ukurikiyimfura
Kuya 28 Gicurasi 2019 saa 10:03
Yasuwe :
0 0

Ku mugoroba wo kuri uyu wa Kabiri nibwo Umutoza wa Rayon Sports, Roberto Oliveira Gonçalves de Carmo, ahura n’umuyobozi w’ikipe, Muvunyi Paul, kugira ngo baganire ku ngingo ebyiri zishobora gutuma uyu munya-Brésil aguma muri iyi kipe aherutse guhesha igikombe cya shampiyona.

Amasezerano ya Robertinho muri Rayon Sports azarangirana n’umukino wa Marines kuri uyu wa Gatandatu ubwo shampiyona izaba irangiye.

Uyu mutoza waherukaga kongererwa amasezerano y’amezi atandatu mu Ukuboza, ashobora kuva muri Rayon Sports naramuka atabashije kumvikana n’ubuyobozi bw’ikipe dore ko ngo hari ababurimo batamwishimiye.

Ku mugoroba wo kuri uyu wa Kabiri, nyuma y’imyitozo iza kubera mu Nzove, Robertinho aricarana ku meza n’Umuyobozi wa Rayon Sports, Muvunyi Paul, kugira ngo baganire ku hazaza he muri iyi kipe, aho IGIHE yumvise ko uyu munya-Brésil ashaka ko yakongererwa umushahara ukava ku bihumbi $4,500 kugira ngo agumane na Rayon Sports.

IGIHE yumvise ko kandi Robertinho aza no gusaba Umuyobozi wa Rayon Sports ko abatoza bungirije barimo mugenzi we bavuka mu gihugu kimwe, Wagner do Nascimento Silva, n’umutoza w’abanyezamu Nkunzingoma Ramdhan ‘Lemis Ikamba’, bombi bahabwa amasezerano muri iyi kipe kuko ntayo bagira ndetse bakongererwa umushahara.

Robertinho ntateganya kuguma muri iyi kipe nyuma yo ku wa Gatandatu, aho atanatoza igikombe cy’Amahoro mu gihe izi ngingo zombi zaba zitumvikanyweho hagati ye n’abakoresha be.

Uyu mugabo w’imyaka 58 yageze mu Rwanda muri Kamena 2018, afasha Rayon Sports gukora amateka yo kugera muri ¼ cya CAF Confederation Cup, agera muri ¼ cya CECAFA Kagame Cup yabereye muri Tanzania, atsindirwa ku mukino wa nyuma w’igikombe cy’Amahoro 2018 mbere yo kwegukana shampiyona y’uyu mwaka w’imikino.

Perezida wa Rayon Sports, Muvunyi Paul, arongera kwicarana n'umutoza Robertinho baganire ku masezerano mashya
Robertinho arashaka ko Wagner do Nascimento na Ramadhan bahabwa amasezerano ndetse bakongezwa umushahara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza