Robertinho, Carlos Alberto na Júnior bashimiwe na Flamengo muri Stade Maracanã

Yanditswe na Eric Tony Ukurikiyimfura
Kuya 6 Kamena 2019 saa 04:21
Yasuwe :
0 0

Roberto Oliveira Gonçalves de Carmo uri mu biruhuko iwabo muri Brésil nyuma y’uko amasezerano yo gutoza Rayon Sports arangiye, ni umwe mu bashimiwe muri Stade Maracanã kuri uyu wa Gatatu nk’abakinnyi banyuze muri Flamengo.

Uyu muhango wo gushimira abakiniye iyi kipe, wabanjirije umukino Flamengo yatsinzemo Corinthians igitego 1-0 ikomeza muri ¼ cya Copa do Brasil 2019.

Robertinho uzuzuza imyaka 59 tariki ya 22 z’uku kwezi, Leovegildo Lins da Gama Júnior uzuzuza imyaka 65 na Carlos Alberto Sotelho de Souza uzagira imyaka 66, bose bahawe imipira y’iyi kipe yambara umutuku n’umukara, iriho nimero igaragaza imyaka bazuzuza. Aba bagabo uko ari batatu bakinanye muri Flamengo mu 1983.

Umutoza wa Rayon Sports yakiniye Flamengo imyaka ibiri, mu 1983 kugeza mu 1985, ubwo yari avuye muri Fluminense yari amazemo imyaka ine mu gihe yerekeje muri International ubwo yari avuye muri iyi kipe yambara umutuku n’umukara.

Robertinho yasubiye muri Brésil ku Cyumweru aho yagiye mu biruhuko nyuma yo gusoza amasezerano y’amezi atandatu yari afitanye na Rayon Sports mu gihe ibiganiro byo kuyongera bikomeje hagati y’umuhagarariye, Karenzi Alexis n’Ubuyobozi bwa Rayon Sports.

Uyu mutoza bivugwa ko yifuzwa n’amakipe yo muri Afurika y’Amajyepfo ndetse n’Ikipe ya APR FC ikaba yaramugaragarije ko imwifuza, asaba Rayon Sports umushahara ungana n’ibihumbi bitanu by’amadolari ku kwezi ($5,000), avuye ku bihumbi bitatu mu gihe ikipe yo ishaka kumuha ibihumbi bine ($4,000).

Yifuza ko kandi mu gihe ikipe yaba itwaye shampiyona, yazahabwa agahimbazamusyi ka $5,000 na $3,000 mu gihe yaba yegukanye igikombe cy’Amahoro. Hari kandi kuba yahabwa 7% by’amafaranga iyi kipe yatsindira mu gihe yaba igeze mu cyiciro runaka cy’amarushanwa ya CAF izakina mu mwaka utaha w’imikino, aho izahagarira u Rwanda muri CAF Champions League 2019/20.

Robertinho yageze mu Rwanda muri Kamena 2018, afasha Rayon Sports gukora amateka yo kugera muri ¼ cya CAF Confederation Cup, agera muri ¼ cya CECAFA Kagame Cup yabereye muri Tanzania, atsindirwa ku mukino wa nyuma w’igikombe cy’Amahoro 2018 mu gihe yahesheje iyi kipe igikombe cya shampiyona y’uyu mwaka w’imikino.

Robertinho (ubanza ibumoso) ni umwe mu bashimiwe na Flamengo yakiniye imyaka ibiri hagati ya 1983-1985
Flamengo yahuye na Corinthians kuri uyu wa Gatatu
Robertinho yifurijwe isabukuru nziza y'amavuko muri uku kwezi azuzurizamo imyaka 59
Flamengo yashimiye abakinnyi bayinyuzemo bavutse muri uku kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza