Kwamamaza

Najya mu yindi kipe ariko APR FC oya - Rwigema

Yanditswe kuya 10-10-2016 saa 10:32' na Manzi Rema Jules


Rwigema Yves yongeye gushimangira ko ari umukinnyi wa Rayon Sports bidasubirwaho, ahita anatangaza ko mu buzima bwe atifuza kongera gusubira muri APR FC kuko yayivuyemo nabi.

Myugariro mushya wa Rayon Sports, yagaragaye bwa mbere mu mwambaro w’ubururu n’umweru kuwa Gatandatu w’icyumweru gishize ku mukino wa gicuti wahuje iyi kipe y’i Nyanza na AS Kigali wabereye kuri Stade Amahoro i Remera.

Uyu musore winjiye mu kibuga umukino ubura iminota 10 ngo urangire asimbuye Nova Bayama nawe wakuriye muri APR FC, ngo yiteguye kwitwara neza akoresha imbaraga ze zose ngo yiyerekane anatange umusaruro muri Rayon Sports.

Ati “Ijana ku ijana ndi umukinnyi wa Rayon Sports. Abafana banyakiriye neza kandi ndabakunda.”

Ku bijyanye n’ibivugwa na APR FC ko uyu mukinnyi akiri uwayo kandi ayifitiye amasezerano ndetse yamutanze ku rutonde rw’abakinnyi izakoresha umwaka utaha w’imikino, Rwigema yatangaje ko nta gahunda afite yo kuyisubiramo kuko umutima we awushyize kuri Rayon Sports.

Ati “Navuye muri APR FC ntishimye sinapfa gusubirayo, ntibishoboka sinasubirayo.”

Umunyamakuru amubajije niba mu buzima bwe adateganya kuzasubira muri APR FC, Rwigema yagize ati “Nta na rimwe nasubirayo, navuyeyo nabi. Ibyabaye ni byinshi sinabivugira hano ngo birangire. Najya no mu yindi kipe ariko APR FC oya, sinshobora.”

Uretse Rwigema Yves na mugenzi we bakuriye muri APR FC, Nova Bayama waje muri Rayon Sports nyuma y’umwaka yari amaze yaratijwe na APR FC muri Mukura VS, avuga ko nta masezerano yagiraga muri iyi kipe y’Ingabo z’Igihugu ari nayo mpamvu yafashe icyemezo akajya aho bamushaka kandi agiye kubona umwanya wo gukina.

Nova atangaza ko atiyumvisha uburyo ikipe yamurekuye yakongera kugaruka ivuga ko ari uwayo nyamara nta masezerano bagiranye.

Ati “Ni ugukorana ishyaka kugira ngo wereke aho wavuye ko n’ahandi ugiye ugomba gukina. Rayon Sports ni ikipe nziza ihatanira ibikombe. Kuba naravuye muri APR FC nkaza muri iyi kipe ndumva atari igitangaza. Icyo mpfa ni uko aho ngomba gukina ngatanga umusaruro nta kindi. Kuba APR FC yantanga ku rutonde rw’abakinnyi bayo ndumva bidashoboka kuko sinayikinira nta masezerano yabo ngira. Nasinyiye Rayon Sports ndetse natangiye no kuyikinira."

Yakomeje agira ati "Ndasaba abafana ba Rayon Sports ko batuba hafi, tugakora cyane hamwe n’abatoza. Buri ruhande rugakora ibyarwo yaba abafana, abakinnyi, abatoza na komite ndizera ko tuzagera kure."

Aba bakinnyi bombi bakuriye mu ishuri ry’umupira rya APR FC bagiye muri Rayon Sports basangamo umuzamu Bashunga Abouba we umazemo umwaka nawe warezwe na APR FC ndetse na myugariro Rwatubyaye Abdoul wasinyiye Rayon Sports amasezerano y’imyaka ibiri ariko kuva icyo gihe akaba yaraburiwe irengero.

Rayon Sports izakina na Police FC , mu mukino ufungura shampiyona ya 2016-2017 kuwa Gatanu tariki ya 14 Ukwakira 2016 saa 18 :00 kuri Stade ya Kigali i Nyamirambo.

Rwigema Yves yishyushya mbere yo kwinjira mu kibuga
Rwigema Yves agiye kwinjira mu kibuga
Myugariro Yves Rwigema yinjiye mu kibuga asimbuye Nova Bayama
Rwigema Yves agikandagira mu kibuga mu mwambaro wa Rayon Sports
Rwigema Yves ahanganiye umupira na Nkomeje Alexis wa AS Kigali
Rwigema Yves atangaza ko yazinutswe burundu APR FC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved