Sibomana Patrick wa APR FC agiye kurushinga

Yanditswe na Manzi Rema Jules
Kuya 11 Gicurasi 2017 saa 10:36
Yasuwe :
1 0

Sibomana Patrick uzwi nka Pappy muri APR FC n’ikipe y’igihugu Amavubi, ari mu myiteguro ya nyuma yo kurushingana na Uwase Housnat Sultan bamaranye imyaka itanu bakundana.

Ubukwe bw’aba bombi buteganyijwe tariki 20 Gicurasi 2017. Mu kiganiro na IGIHE, Sibomana Patrick yavuze ko imyiteguro igeze kure ndetse ngo yizeye ko ubukwe bwe n’umukunzi we buzaba bwiza kuko babanje kubitekerezaho igihe kirekire.

Yagize ati “Kugeza ubu byose biragenda neza. Twariteguye bihagije, tumaze igihe dutegura ubukwe bwacu kuko twifuza ko bwazaba bwiza kuri twe no ku bavandimwe n’inshuti.”

Sibomana yavuze ko umukunzi we atari umukobwa usanzwe ashingiye ku byo yamubonyeho kuva mu 2012 bakiri ku ntebe y’ishuri, yamweretse urukundo rutavangiye haba mu bihe bibi n’ibyiza.

Yagize ati “Umukobwa tugiye kubana twamenyanye mu 2012 duhuriye mu kigo cy’amashuri mu Rugunga [APE Rugunga] turakundana ariko tutazi ko twagera kuri uru rwego rwo kubana. Gusa burya nk’uko babivuga uwo Imana iba yaraguteganyirije umubona kare, uko bwacyaga niko nagendaga ndushaho kumukunda nubwo ibyaducaga intege bitaburaga kwiyongera.”

Yakomeje agira ati “Housnat ni umukobwa twahuzaga cyane kuva twamenyana, yanyiyumvagamo akamba hafi mu bibazo nanyuragamo. Urabona abakobwa benshi baba bashaka ko mugirana ibihe byiza nawe umeze neza ariko cya gihe wahangayitse, ibintu byose byabaye ibibazo ntakwegere.”

“Aha niho we yabaga iruhande rwanjye kurushaho, akampumuriza. Ikindi ntabwo yankundiye ko ndi umustar cyangwa ibindi abantu bashobora gutekereza kuko twakundanye nkiri mu Isonga FC ntanabona umwanya mbese nari ndi aho ngaho gusa.”

Bazakora ubukwe muri uku kwezi

Sibomana uri mu bakinnyi 31 umutoza w’Amavubi Antoine Hey yahamagaye kuri uyu wa Gatatu bagomba kuzitabira ikizami cy’imbaraga cya kabiri, avuga ko uko yagiye atera imbere atashoboraga guhemukira umukunzi we ndetse na we akaba yarazaga no kumufana ku kibuga kenshi biri no mu byamwongereraga imbaraga.

Amasezerano ya Sibomana muri APR FC azarangirana n’uyu mwaka w’imikino hakaba hari amakipe atandukanye ku Mugabane w’u Burayi akomeje kumwifuza gusa avuga ko ubu umutima we uri kuri APR FC no gutegura ubukwe bityo ibyo kuguma mu Rwanda cyangwa kujya hanze azabifataho umwanzuro nyuma.

Uyu aje yiyongera ku bandi bakinnyi ba APE FC bakoze ubukwe mu mezi ya vuba barimo Rugwiro Herve, Buteera Andrew, Nshimiyimana Amran na Habyarimana Innocent.

Ifoto y'ubuto bwa Sibomana n'iy'umukunzi we Uwase n'uko basigaye bangana ubu
Sibomana avuga ko Uwase yamubaga hafi cyane mu bibi n'ibyiza atamukunze hari icyo amushakaho kindi
Uwase mu mwambaro wa APR FC umukunzi we akinira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza