Sugira Ernest na Emery Bayisenge bakomeje kwigaragaza mu makipe bagiyemo

Yanditswe na Ishimwe Israel
Kuya 10 Ukwakira 2016 saa 01:54
Yasuwe : XX
0

Abakinnyi b’Abanyarwanda bagiye gukina hanze uyu mwaka bakomeje kwitwara neza by’umwihariko rutahizamu Sugira Ernest waguzwe na AS Vita Club avuye muri AS Kigali yatsinze igitego cyahesheje ikipe ye intsinzi na ho myugariro Emery Bayisenge atsinda igitego cya mbere muri KAC Kénitra, biyihesha kubona amanota atatu nyuma y’imikino itanu idatsinda.

Sugira Ernest wavuye mu Rwanda atanzweho akayabo ka miliyoni 102 z’amafaranga y’u Rwanda akomeje kugaragaza ko icyizere yagiriwe n’umutoza Jean-Florent Ikwange Ibengé wa AS Vita Club kitapfuye ubusa kuko mu mikino itatu ya shampiyona yo muri Congo Kinshasa(Linafoot) amaze gukina afite ibitego bitatu harimo n’icyo yatsinze kuri iki Cyumweru bakina na Rojolu FC.

Iki gitego rukumbi cyabonetse kuri uyu mukino, Sugira yagitsinze ku munota wa 73 nyuma y’iminota itanu yinjiye mu kibuga asimbuye rutahizamu wahoze akinira Amavubi, Etekiama Agiti bita Birori Dady.

Sugira wari rutahizamu nimero ya mbere mu ikipe y’Igihugu Amavubi ndetse akaba ari umwe mu bakinnyi bigaragaje cyane mu mikino ya CHAN yabereye i Kigali mu ntangiriro z’uyu mwaka mu kiganiro yagiranye na IGIHE yavuze ko agifite byinshi byo gukora kuko ikipe ye ifite ba rutahizamu bakomeye cyane ku buryo kubona umwanya uhoraho bikimugoye.

Ati “Nibyo ndimo gukora cyane kuko abafana ni ibitego banyitezeho nta kindi. Gusa nabanza mu kibuga cyangwa nkinjira nsimbuye ntacyo bintwaye, icya mbere ni uko nkora ibyo umutoza ansabye. Birumvikana nta mwanya wo kwicara, ngomba gukoresha imbaraga zose kugira ngo mfate umwanya uhoraho kandi nkomeze gutsinda kuko nicyo cyanzanye.”

Si Sugira wenyine wavuye mu Rwanda uyu mwaka ajya gukina hanze witwaye neza mu mpera z’icyumweru kuko myugariro w’Amavubi wahoze muri APR FC, Emery Bayisenge yatsinze igitego cya mbere muri shampiyona ya Maroc cyafashije ikipe ya KAC Kénitra kuva mu myanya ya nyuma ku rutonde rw’agateganyo.

KAC Kénitra yakinaga na Olympic Safi iyitsinda ibitego bibiri kuri kimwe kuri iki Cyumweru. Iyi kipe yari imaze imikino itanu itsindwa nubundi yabanje kwinjizwa igitego ku munota wa 58 w’umukino cya Mohamed Hamdan, cyishyurwa na Emery Bayisenge ku munota wa 70 bituma ikipe ye igaruka mu mukino.

Nyuma y’iminota itanu gusa, Issam El Farssi yatsinze igitego cya kabiri ari na cyo cyafashije iyi kipe ya Bayisenge kubona amanota atatu ya mbere kuva yayigeramo ndetse ikaba yahise iva ku mwanya wa nyuma yariho nta nota na rimwe ijya ku mwanya wa 14 hejuru ya Kasba Tadla ya 15 ifite inota rimwe na FUS Rabat ya nyuma itarabasha kubona inota.

Sugira Ernest akomeje kwitwara neza muri AS Vita Club
Emery Bayisenge yafashije KAC Kénitra kubona amanota atatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza