Sunrise: Abakinnyi bahagaritse imyitozo nyuma y’amezi atatu badahembwa

Yanditswe na Jah d’eau Dukuze
Kuya 1 Ukuboza 2016 saa 10:13
Yasuwe :
0 0

Abakinnyi b’ikipe ya Sunrise bamaze iminsi ibiri badakora imyitozo, nyuma yo kubwirwa kenshi ko bari buhabwe amafaranga ariko ntibayabone.

Abakinnyi b’iyi kipe batangarije IGIHE ko abari bayisanzwemo kugeza uyu munsi bamaze guhabwa imishahara y’ukwezi kwa cyenda gusa, mu gihe ukwezi kwa munani, ukwa cumi n’ukwa cumi na kumwe n’ubu batari bayabona.

Aba bakinnyi ngo bari babwiwe ko bari buhabwe amafaranga yabo mbere yo gukina n’ikipe ya Rayon ports ariko ntibyakunda, ndetse bongera kubwirwa ko bari bwishyurwe mbere yo kwerekeza i Rubavu gukina na Etincelles gusa na bwo biza kurangira bagiyeyo ntayo bahawe.

Ibi byatumye abakinnyi benshi bafata icyemezo cyo kwitahira nyuma y’umukino batsinzwemo na Etincelles, aho batangaza ko bari barambiwe kutabwizwa ukuri n’ubuyobozi.

Aha ariko mu ijoro ryo kuri uyu wa Gatatu tariki ya 30 Ugushyingo, rishyira iya mbere Ukuboza, ni bwo ubuyobozi bw’iyi kipe bwaje guhamagara abakinnyi bubabwira ko bagaruka mu myitozo maze bakazishyurwa kuwa Gatanu.

Umunyamabanga w’iyi kipe Rebero Emmanuel, yaje kubihamiriza IGIHE agira ati “Ni byo abakinnyi bari bamaze iminsi badakora imyitozo, gusa twaje kubahamagara ngo bagaruke maze amafaranga yabo tuzayabahe ku munsi w’ejo”.

“Twari twagize ibibazo bitandukanye, birimo kubanza kwishyura imyenda ikipe yasize mbere yo kuza i Nyagatare ndetse haza no kuzamo ikindi kibazo ko uturere tutari twatanga miliyoni 30 twemeye kuzatanga zo guherekeza iyi kipe ikaza i Nyagatare. Turizera ko bigiye gukemuka kandi tukongera tukitwara neza.”

Ikipe ya Sunrise kuri ubu iri ku mwanya wa kane n’amanota 10, aho nyuma yo gutangira neza shampiyona, kugeza magingo aya ifite inota rimwe mu mikino itatu iheruka gukina, ikintu abakinnyi basanga giterwa n’ibi bibazo.

Sunrise yari yatangiye neza shampiyona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza