Sunrise isozanyije 2016 intsinzi ivanze n’agahinda mu bakinnyi

Yanditswe na Jah d’eau Dukuze
Kuya 31 Ukuboza 2016 saa 12:11
Yasuwe : XX
0

Abakinnyi b’ikipe ya Sunrise barangije umwaka wa 2016 batsinda ikipe ya Gicumbi 2-0 gusa nyuma y’umukino ibyishimo biza kuba bike bamaze guhabwa amakuru y’uko ibirarane by’amezi ane bafitiwe bazabihabwa mu mpera z’ukwezi gutaha.

Inkuru z’ibirarane by’abakinnyi ba Sunrise zanditswe bwa mbere ku IGIHE, ubwo bamwe mu bakinnyi bavaga muri Camp bakitahira kubera kubwirwa inshuro nyinshi ko bazishyurwa ariko birangira ntacyo bahawe.

Mushimiyimana Regis ni we wari wagizwe Captain kuri uyu wa gatanu nyuma yaho Serumogo Ally atagaragariye kuri uyu mukino

Ubuyobozi bw’iyi kipe bwagerageje guhosha iki kibazo buha abakinnyi amasezerano atandukanye gusa umwaka wa 2016 urangiye bitabaye. Ubwo twaganiraga n’Umunyamabanga w’iyi kipe, Rebero Emmanuel, tariki ya 30 Ugushyingo, yari yaduhamirije ko mu minsi ibiri bari bube bishyuye abakinnyi gusa biza kurangira icyizere kiraje amasinde.

Uyu yari yagize ati “Ni byo abakinnyi bari bamaze iminsi badakora imyitozo, gusa twaje kubahamagara ngo bagaruke maze amafaranga yabo tuzayabahe ku munsi w’ejo (tariki ya 1/12/2016)”.

“Twari twagize ibibazo bitandukanye, birimo kubanza kwishyura imyenda ikipe yasize mbere yo kuza i Nyagatare ndetse haza no kuzamo ikindi kibazo ko uturere tutari twatanga miliyoni 30 twemeye kuzatanga zo guherekeza iyi kipe ikaza i Nyagatare”.

Sunrise kuri uyu wa Gatanu tariki 30 Ukuboza, yari ifite umukino w’umunsi wa 11 wa shampiyona yahuriragamo na Gicumbi i Nyagatare. Ni umukino muri rusange ikipe ya Gicumbi yihariye gusa birangira Babuwa Samson na Niyonshuti Gadi bafashije Sunrise kwegukana intsinzi ya 2-0.

Nyuma y’umukino, umutoza Ideh Chidi Andrew, yadutangarije ko byari byiza gutsinda kugira ngo biyibagize ibibazo bamazemo iminsi.

Ati “Abakinnyi bari biteguye uyu munsi, babigaragaje. Ibibazo byose bari bafite mu ikipe babishyize inyuma barahatana, bahitamo gukina. Ahari iyi ni impano y’umwaka mushya”.

“Ndizera ko buri umwe azi ibibazo bimaze iminsi mu ikipe ariko byari ngombwa guhatanira icyatumye tuza hano ari cyo gukina umupira. Nubwo bari bafitanye ibibazo n’ubuyobozi bimaze iminsi bicanga abakinnyi kuva ku mukino wa Pepiniere”.

Yakomeje agira ati “Gusa kuri ubu bahisemo kubyiyibagiza bajya mu kibuga barakina kandi babikoze. Intsinzi kuri Gicumbi yari iya mbere Sunrise yari ibonye mu mikino umunani iheruka, nyuma yo gutsinda itatu ya mbere aho umukino baherukaga gutsinda ari uwo batsinzemo Marines 3-0 ku itariki ya 29 Ukwakira.”

Ibibazo by’ibirarane n’amafaranga ya ’recruitment’ abakinnyi batabonye, ni kimwe mu byagiye bisubiza iyi kipe hasi bigatuma n’umusaruro ubura. Kuri ubu abakinnyi bamaze iminota 90 bishimiye umukino, gusa nyuma yawo benshi twaganiriye bagaragazaga agahinda ko kuba bagiye gutangira umwaka mushya imifuka yabo yera nyuma yo kubwirwa ko bazishyurwa tariki ya 20 Mutarama 2017, ikintu batapfa no kwemera 100%.

Abakinnyi ba Sunrise batahanye agahinda nubwo batsinze umukino wa mbere mu mezi abiri
Gicumbi ku rundi ruhande nubwo yatakaje, yatahanye akanyamuneza ko umukino utaha bazawukinira mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza