Tottenham vs Liverpool: Amakuru avugwa mu makipe yombi mbere y’umukino wa nyuma wa UEFA Champions League

Yanditswe na Eric Tony Ukurikiyimfura
Kuya 1 Kamena 2019 saa 11:43
Yasuwe :
0 0

Hirya no hino ku Isi, abakunzi b’umupira w’amaguru amaso yabo bayerekeje mu mujyi wa Madrid muri Espagne, haza kubera umukino wa nyuma wa UEFA Champions League hagati y’amakipe abiri yo mu Bwongereza, Tottenham na Liverpool kuri uyu wa Gatandatu guhera saa 21:00.

Ni ku nshuro ya mbere amakipe abiri yo mu Bwongereza ahuriye ku mukino wa nyuma w’iri rushanwa rihuza amakipe akomeye i Burayi, guhera mu 2008 ubwo Manchester United yahatsindiraga Chelsea.

Abafana b’Abongereza bari hagati y’ibihumbi 70-100 bitezwe mu murwa mukuru wa Espagne, aho bashaka gushyikira amakipe yabo kuri Stade ya Wanda Metropolitano ifite ubushobozi bwo kwakira abafana ibihumbi 68 mu gihe abafana b’amakipe yombi bagabana amatike 33,226.

Liverpool yaherukaga gutsindirwa ku mukino wa nyuma na Real Madrid mu mwaka ushize, yasoje shampiyona imyanya ibiri imbere ya Tottenham ndetse inayirusha amanota 26, ariko si ibyo kwitwaza uyu munsi kuko ari urundi rugamba rwihariye.

Umutoza wayo, Jürgen Klopp watangiye kuyitoza mu 2015, amaze gutsindwa imikino ya nyuma itandatu harimo ibiri ya UEFA Champions League, mu 2013 ari muri Borussia Dortmund n’umwaka ushize ari muri Liverpool, ariko ngo burya ntabwo ibihe bihora ari bimwe.

Ati” Ibihe biratandukanye kandi n’amakipe aratandukanye. Niba ari njye mpamvu yo gutakaza iyo mikino ya nyuma itandatu ubwo buri wese yabyibazaho. Umwaka ushize cyari igitego cyiza, dutsindwa bibiri by’amafuti, dutakaza gutyo. Ntabwo ari uko ntagira amahirwe. Sinibona nk’umuhombyi.”

Liverpool imaze kwegukana UEFA Champions League inshuro eshanu, aho iya nyuma yatwaye ari iya 2005. Mu 2007 yatsindiwe ku mukino wa nyuma na AC Milan, umwaka ushize, itsindwa na Real Madrid.

Ku rundi ruhande, ni ku nshuro ya mbere Tottenham igiye gukina umukino wa nyuma w’irushanwa ry’i Burayi ndetse nta gikombe icyo aricyo cyose iregukana mu myaka 11 iheruka nyuma yo gutwara League Cup mu 2008.

Ikibazo gikomeye umuntu yakwibaza ku bakina uyu mukino, ni uko rutahizamu wa Tottenham, Harry Kane, yaba ari bubanze mu kibuga. Uyu mukinnyi umaze gutsindira ikipe ye ibitego 24 muri uyu mwaka w’imikino, yavuze ko ubu ameze neza nyuma yo kuvukinira mu mukino ubanza wa ¼ bahuyemo na Manchester City.

Ubwo umutoza we, Mauricio Pochettino, yaganiraga n’abanyamakuru kuri uyu wa Gatanu, yavuze ko atarafata umwanzuro ku bazakina kuko yari agisigaje imyitozo ya nimugoroba.

Ati” Biragoye, uba usabwa gufata icyemezo, n’ejo ugafata ikindi. Dufite amakuru ahagije kandi tuzakoresha buri kimwe ngo dutsinde.”

Ku ruhande rwa Liverpool, Klopp yavuze ko Roberto Firmino ameze neza nyuma y’uko uyu munya-Brésil adakinnye umukino wo kwishyura wahuje ikipe ye na FC Barcelone muri ½ mu gihe Naby Keïta akiri hanze.

Uburyo amakipe yombi yisanze i Madrid

Amakipe yombi yagize ibihe bidasanzwe mu rugendo rugana muri uyu murwa mukuru wa Espagne.

Liverpool yatsinze FC Barcelone ibitego 4-0 i Anfield nyuma yo gutsindwa ibitego 3-0 mu mukino ubanza mu gihe Lucas Moura yatsinze ibitego bitatu mu gice cya kabiri, afasha Tottenham gutsindira Ajax iwayo ibitego 3-2 mu gihe iyi kipe yo mu Buholandi yari yabatsindiye mu Bwongereza igitego 1-0.

Amakipe yombi yari yavuye mu matsinda mu buryo bugoranye, aho Liverpool yo yanatsinzwe imikino itatu yakiniye hanze.

Tottenham yisanze mu minota 20 ya nyuma y’umukino yasezerewe ubugira gatanu- mu mikino itatu ya nyuma yo mu itsinda, muri ¼ ihura na Manchester City ndetse no muri ½ ihura na Ajax.

Ikipe iyo ariyo yose yegukana igikombe uyu munsi, nabwo iraza kuba ifite agahigo ko gutsindwa imikino ine guhera mu 2003/04 ubwo UEFA Champions Legue yatangiraga gukinwa muri ubu buryo. Milan AC yegukanye igikombe mu 2007 yaratsinzwe imikino itatu.

Ni ku nshuro ya mbere amakipe atarayoboye amatsinda ahuriye ku mukino wa nyuma guhera mu 2010 ndetse ni ku nshuro ya mbere umukino wa nyuma uhuriyeho amakipe abiri nta n’imwe muri yo yatwaye shampiyona y’iwabo muri iki kinyejana cya 21.

Liverpool igiye gukina umukino wa nyuma wa European Cup/Champions League ku nshuro ya cyenda, aho nta yindi kipe yo mu Bwongereza irabikora. Imaze kwegukana igikombe inshuro eshanu mu gihe yatsinzwe mu nshuro ebyiri ziheruka (2007 na 2018).

Ni ubwa mbere Tottenham igiye gukina umukino wa nyuma wa European Cup/Champions League. Inshuro eshanu amakipe yageze ku mukino wa nyuma bwa mbere, agatsindwa ni: Chelsea 2008, Arsenal 2006, Monaco 2004, Bayer Leverkusen 2002 na Valence 2000.

Ikipe iheruka gutakaza imikino ibiri ya nyuma yikurikiranya muri Champions League ni Valence mu 2000 ndetse no mu 2001.

Sadio Mané ashobora kuba umukinnyi wa mbere ubashije gutsinda mu mikino ya nyuma y’iki gikombe cy’i Burayi yikurikiranya kuva bigezweho na Franz Roth wa Bayern Munich mu 1975 no mu 1976.

Sadio Mane ategerejweho kuba umukinnyi wa mbere utsinze ku mukino wa nyuma yikurikiranya guhera mu 1976
Pochettino yavuze ko Harry Kane ameze neza ariko atarafata icyemezo ku babanzamo kuri uyu wa Gatandatu
Jurgen Klopp yavuze ko Firmino ameze neza ndetse amaze iminsi yitoza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza