Twizerimana Onesme wari wagiye kubagirwa muri Maroc, yaremye agatima abakunzi ba APR FC

Yanditswe na Manzi Rema Jules, Uwishyaka Jean Louis
Kuya 5 Mutarama 2017 saa 09:53
Yasuwe :
0 0

Rutahizamu wa APR FC Twizerimana Onesme wari umaze ibyumweru bibiri muri Maroc aho yari yagiye kubagwa imvune yagize, yamaze kugaruka mu Rwanda atangaza ko nyuma y’icyumweru kimwe azaba yatangiye gukora imyitozo yoroheje imutegura kugaruka mu kibuga mu gihe cya vuba.

Twizerimana wigaragaje cyane umwaka ushize ubwo yatsindiraga AS Kigali ibitego 13 muri shampiyona mbere yo gutizwa APR FC uyu mwaka, ni umwe mu bakinnyi bari bitezwe cyane kwigaragaza muri iyi kipe y’ingabo z’igihugu ariko kuva yayigeramo ntabwo byamuhiriye ahanini bitewe n’imvune yagize.

Biciye mu bufatanye Ferwafa yagiranye n’Ishyirahamwe ry’Umupira w’Amaguru muri Maroc mu 2015, uyu mukinnyi na Muhire Kevin ukinira Rayon Sports, ku wa 21 Ukuboza 2016 berekeje muri iki gihugu kubagwa ndetse bigenda neza ku buryo bamaze kugaruka mu Rwanda kuri uyu wa Gatatu.

Twizerimana yatangaje ko ubuvuzi bwo muri Maroc bwamutunguye cyane kuko mu gihe yagiye atekereza ko bazabanza kumubaza uko yavunitse, ngo yatangajwe no kubona umuganga ariwe ubimubwira byose ndetse nyuma yo kumubaga amwizeza ko agomba kugaruka mu kibuga nyuma y’ibyumweru bitatu.

Ati “Nibyo mvuye kwivuza. Nagiye tariki 21 mpagera kuri 22, ndarayo mu gitondo bahita bambaga niyo mpamvu mwabonye ko byihuse.”

Abajijwe uburyo bamuvuye bituma agiye kugaruka mu kibuga mbere y’igihe cyatekerezwaga, yagize ati “Nta kidasanzwe bakoze uretse ko ari ibintu bamenyereye. Nkihagera nari nzi ko ngiye kuvuga ukuntu navunitse ahubwo bo bahita bambwira bati ‘imvune ufite ni imitsi ntabwo ari ikintu gikomeye cyane, turahita tukubaga.”

“Bakimara kumbaga, ku munsi ukurikiyeho nahise ntangira imyitozo igorora akaguru. Jyewe nta byo kumara amezi runaka hanze birimo, kugira ngo nkire ndabura icyumweru kimwe mvuye hariya. Ubundi iyo bamaze kukubaga imvune nk’iyi yanjye, umara ibyumweru bitatu, niko muganga yatubwiye. Ubu harabura kimwe ngatangira imyitozo.”

Twizerimana yashyizwe ku rutonde rw’abakinnyi APR FC izifashisha mu mikino ya CAF Champions League izatangira muri Gashyantare uyu mwaka. Yageze muri iyi kipe uyu mwaka atijwe na AS Kigali nayo yari yaramukuye muri Sorwathe FC mu mwaka w’imikino (season) wa 2014/2015.

Biturutse ku bufatanye bwa Ferwafa n’Ishyirahamwe ry’imikino muri Maroc, hamaze kuvurwa abakinnyi benshi bakina mu Rwanda barimo Faustin Usengimana ukinira APR FC, icyo gihe abagwa yakiniraga Rayon Sports, Djamal Mwiseneza (APR Fc), Pacifique Uwimana wakiniraga Isonga FC, Ssentongo Farouk wa Bugesera FC, (icyo gihe yakiniraga APR FC), Ndoli Jean Claude wa AS Kigali (yakiniraga APR FC), Sebanani Emmanuel ‘Crespo’ wa AS Kigali na Blaise Itangishaka (APR FC) wagiyeyo mu mpera z’umwaka ushize n’abandi, kandi bose bagiye bakira neza, bakanagaruka mu kibuga.

Twizerimana Onesme yatangaje ko nyuma y'icyumweru kimwe azatangira imyitozo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza