Ubutumwa burebure Minispoc yageneye Rayon Sports mbere yo gukina na Rivers United

Yanditswe na Manzi Rema Jules
Kuya 20 Mata 2017 saa 09:34
Yasuwe :
0 0

Minisiteri ya Siporo n’Umuco (Minispoc) yasabye abakinnyi ba Rayon Sports kuzajya mu kibuga kuri uyu wa Gatandatu ubwo bazaba bahanganye na Rivers United bumva ko bahagarariye miliyoni 12 z’Abanyarwanda, barushaho gukoresha imbaraga kugira ngo baheshe ishema igihugu.

Rayon Sports kuri uyu wa Gatandatu tariki 22 Mata 2017 saa cyenda n’igice izakira Rivers United yo muri Nigeria mu mukino wo kwishyura w’irushanwa rya CAF Confederation Cup isabwamo gutsinda ibitego gatatu kugira ngo ibone itike yo kujya mu matsinda.

Nubwo bisa n’ibikomeye, Minispoc yabwiye abakinnyi ba Rayon Sports ko bishoboka ko batsinda ndetse bagakomeza igihe cyose baba bagiye mu kibuga bumva ko badakina nk’ikipe gusa ahubwo ari ukurwanira ishema ry’igihugu kandi ko n’Abanyarwanda bose babari inyuma nk’uko umujyanama akaba n’umuvugizi w’iyi minisiteri, Karambizi Oleg Olivier yabitangarije IGIHE.

Yagize ati “Ubutumwa dutanga nka Minisiteri ifite Siporo mu nshingano ni nk’ubwo tugenera Umunyarwanda, ikipe y’Igihugu cyangwa indi iyo ihagurutse igiye guhagararira u Rwanda mu mikino itandukanye. Guseruka muri iyo mikino biba byarenze urwego rw’umukinyyi ku giti cye ahubwo byagiye ku rwego rw’Igihugu. Agomba gukina yumva ko ahagarariye miliyoni 12 zimuhanze amaso kandi zizishimira ko igihugu giheshejwe ishema mu ruhando rw’amahanga.”

Yakomeje agira ati “Ikipe ya Rayon Sports izaserukira u Rwanda mu mpera z’iki cyumweru ikina na Rivers United yo muri Nigeria, nubwo izaba ikina nka Rayon Sports, urwego umukino ubarizwamo rutuma gutsinda cyangwa gutsindwa biba iby’u Rwanda muri rusange. Kuba baratsinzwe umukino ubanza ntibikuraho ko bashobora kwishyura ndetse bakanatsinda kuko mu mupira w’amaguru birashoboka. Turizera ko aho bari imyitozo bayikora neza kandi ko n’inama z’abatoza nazo nta kindi zibashishikariza uretse gukina neza no gutsinda igahesha ishema igihugu. Turayifuriza kuzatsinda kandi tunasaba Abanyarwanda kuzayishyigikira nk’ikipe ihagarariye u Rwanda.”

Uretse guhesha ishema igihugu mu mahanga kuko bwaba ari ubwa mbere ikipe yo mu Rwanda ijya mu matsinda y’iri rushanwa rihuza amakipe yatwaye ibikombe iwayo, niramuka ikomeje izahita ihabwa akayabo k’amadorali ya Amerika ibihumbi 275 arenga gato miliyoni 222 mu mafaranga y’u Rwanda.

Ku bakunzi b’iyi kipe bifuza kureba uyu mukino w’ishiraniro, ibiciro byo kwinjira ku kibuga byamaze gushyirwa ahagaragara, aho abifuza kuzicara mu myanya y’icyubahiro (VIP) bazishyura ibihumbi 20 by’amanyarwanda, amafaranga yari atarigera yishyuzwa ku mukino uwo ariwo wose mu mateka ya ruhago y’u Rwanda.

Abashaka kwicara impande z’abanyacyubahiro ahasakaye mu ntebe z’icyatsi bazishyura ibihumbi 10 ah’intebe z’umuhondo bishyure 3000 naho itike ya make y’abazicara ahasigaye hose izaba ari 2000 Rwf.

Abakinnyi ba Rayon Sports basabwe kuzajya mu kibuga bumva ko bahagarariye miliyoni 12 z'Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza