IGIHE.com > Imikino > Football
UCL: Manchester United na Borussia Dortumund zakatishije itike ya ¼

UCL: Manchester United na Borussia Dortumund zakatishije itike ya ¼


Yanditswe kuya 20-03-2014 - Saa 02:23'

Babifashijwemo na Robin Van Persie watsinze ibitego bitatu, Manchester United yishyuye Olympiacos inayisezerera muri UEFA champions league mu gihe intsinzi ya Zenit y’ibitego 2-1 itari ihagije ngo bakuremo Borussia Dortumund yabatsindiye iwabo 4-2.

Manchester United 3-0 Olympiacos (Aggr 3-2)

Manchester United yakoze ibyo yasabwaga yishyura ibitego 2 bari batsindiwe mu Bugereki na Olympiacos bakanayisezerera, byagabanyije igitutu ku mutoza wayo, David Moyes.

Moyes wari wanyagiwe muri shampiyona na mukeba Liverpool ibitego 3-0 yasabwa gukuramo Olympiacos ngo agabanye ibihuha byavugaga ko agomba gusezera Old Traffold, yafashe icyemezo cyo kubanza mu kibuga Ryan Giggs w’imyaka 40, atigeze aha icyizere ubunararibonye bwe.

Ku munot wa 25, Robin Van Persie wari warakemanzwe imikinire ye muri iyi minsi, yakoreweho ikosa mu rubuga rwa Olympiacos na José Holebas, penaliti itanzwe ayinjiza neza.

Olympiacos yokeje igitutu Manchester United binyuze ku basore bayo David Fuster na Alejandro Dominguez ariko umunyezamu wa Manchester United, David De Gea.

Robin Van Persie yacubije iki gitutu atsinda igitego ku mupira yari ahawe na Wayne Rooney, amakipe yombi ajya kuhuka hashakwa igitego cy’intsinzi cyo gusezerera indi.

Nyuma y’iminota itandatu bavuye mu rwambariro, Van Persie yahinduye inzozi impamo atsindira Manchester ku mupira wo guhana ikosa wabanje gusimbukwa na Wyne Rooney bituma baraza umunyezamu.

Ni ku nshuro ya gatatu kuva ageze muri Manchester United, Van Persie atsinda ibitego bitatu mu mukino umwe wenyine (hat-tricks); Southampton na Aston Villa umwaka ushize.

Borussia Dortmund 1–2 Zenit St. Petersburg (Aggr 5-4)

Ikinyuranyo cy’ibitego bibiri byo hanze Dortumund yatsindiye mu Burusiya yari impamba ku basore ba Jurgen Klopp wakinnye umukino wa nyuma na Bayern Munich i Wembley umwaka ushize 2013.

Ku munota wa 16, Umunyabrazil Hulk yatsindiye Zenit igitego cyahise cyishyurwa na Sebastian Kehl mbere yo kujya kuruhuka.

Sebastian Kehl yabaye umukinnyi wa kabiri ukuze, imyaka 34, utsindiye Dortumund igitego muri champions league nyuma ya Michael Zorc watsinze igitego Galatasaray mu 1997 afite imyaka 35.

Igitego cy’umutwe cy’Umunya Venezuela Jose Rondon cyokeje igitutu Dortumund yari imbere y’abafana bayo, isabwa gukosora byinshi niba ishaka kugera ikirenge mu rugendo yakoze umwaka ushize.

Umutoza wa Zenit Luciano Spalletti yarasezerewe asimbuzwa Andreas Villas Boas wirukanywe muri Chelsea na Tottenham utangira akazi kuri uyu wa Kane.

Tombola y’uko amakipe azahura muri ¼ izaba kuri uyu wa Gatanu tariki ya 21 Werurwe 2014. Imikino ibanza izaba tariki ya 1-2 Mata naho iyo kwishyura ikinwe tariki ya 8-9 Mata 2014.

Amakipe yabonye itike ya ¼

FC Barcelona (Espagne)

Manchester United (u Bwongereza)

Atlético Madrid (Espagne)

Paris Saint-Germain (u Bufaransa)

Chelsea (u Bwongereza)

Real Madrid (Espagne)

Borussia Dortmund (u Budage)

Bayern Munich (u Budage)

titythierry@igihe.com

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO