UEFA Champions League: Real Madird igiye kongera gucakirana na Atletico Madrid

Yanditswe na Uwishyaka Jean Louis
Kuya 21 Mata 2017 saa 12:41
Yasuwe :
0 0

Real Madrid igiye kongera gucakirana na Atletico Madrid zibarizwa mu mujyi umwe, muri ½ cya UEFA Champions League, naho Juventus yo mu Butaliyani yo yatomboye AS Monaco yo mu Bufaransa.

Iyi tombola igaragaza uko amakipe azahura muri iki cyiciro, yabereye I Nyon mu Busuwisi ku cyicaro cya UEFA, kuri uyu wa Gatanu, tariki 21 Mata 2017.

Biteganyijwe ko umukino ubanza uzahuza Real Madrid na Atletico Madrid uzaba tariki 2 Gicurasi ku kibuga cya Santiago Bernabeu naho Juventus ibanze kwakirwa na AS Monaco mu Bufaransa ku munsi ukurikiyeho. Imikino yo kwishyura izahuza aya makipe iteganyijwe kuba tariki ya 9 n’iya 10 Gicurasi ari nabwo hazamenyekana amakipe abiri azahurira ku mukino wa nyuma uzaba tariki 3 Kamena 2017, ku kibuga cy’ikipe y’igihugu ya Pays de Galles/Wales, mu Mujyi wa Cardiff.

Real Madrid igeze muri iki cyiciro nyuma yo gusezerera Bayern Munich yo mu Budage ku giteranyo cy’ibitego 6-3 mu mikino yombi, Atletico yo yasezereye muri ¼ Leicester City yo mu Bwongereza. Juventus yo yihanangirije FC Barcelona iyisezerera ku bitego 3-0 mu mikino yombi naho Monaco yakuyemo Borussia Dortmund iyitsinze ibitego 6-3.

Uretse kuba Real Madrid na Atletico zisangiye umujyi ndetse zikanahora zesuranira muri shampiyona ya Espagne, muri iri rushanwa rikomeye ku mugabane w’u Burayi nabwo ziramenyeranye cyane kuko mu myaka itatu ishize [2014-2016]zahuyemo inshuro ebyiri, zombi zari ku mukino wa nyuma wa UEFA Champions League, bikarangira Real Madrid yegukanye igikombe.

Mu 2014, Real Madrid yanyagiye Atletico Madrid ibitego 4-1 habanje kwitabazwa iminota 30 y’inyongera nyuma y’uko igihe gisanzwe cy’umukino cyari cyarangiye amakipe yombi anganya 1-1. Mu 2016 ho Real yatwaye igikombe cya 11 cy’iri rushanwa itsinze Atletico penaliti 5-3.

Real Madrid iramutse itwaye igikombe cy’uyu mwaka, cyaba kibaye icya 12 ariko yaba inashyizeho agahigo kadafitwe n’indi kipe iyo ari yo yose kuko yaba icyegukanye ishuro ebyiri zikurikiranya kuva mu 1992 iri rushanwa ryahindurirwa izina rikava ku kwitwa ’European Cup’ rikaba ’UEFA Champions League’.

Kugeza ubu Real Madrid niyo kipe y’ubukombe muri iri rushanwa kuko imaze kuryegukana inshuro 11 igakurikirwa na AC Milan yo mu Butaliyani ifite ibikombe birindwi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza