Uko amakipe akinamo Abanyarwanda hirya no hino ku Isi yitwaye

Yanditswe na IGIHE
Kuya 2 Ukwakira 2017 saa 10:24
Yasuwe :
0 0

U Rwanda rumaze kugira abakinnyi benshi b’umupira w’amaguru bakina mu bihugu bitandukanye haba muri Afurika no ku mugabane w’u Burayi; bamwe amakipe yabo ahagaze neza nka Shakhtyor Soligorsk ya Sibomana Patrick muri Belarus naho izindi ziri mu bibazo nka AFC Tubize ya Nirisarike Salomon mu Bubiligi.

Mu mpera z’iki cyumweru menshi muri aya makipe akinamo Abanyarwanda yarakinnye gusa abakoze akazi gakomeye bakanigaragaza barimo Kagere Meddie wahoze akinira Amavubi wafashije Gor Mahia yo muri Kenya na Danny Usengimana watsindiye Singida United.

Uko amakipe akinamo Abanyarwanda yitwaye muri rusange:

U Bubiligi: AFC Tubize yo mu cyiciro cya kabiri mu Bubiligi ikinamo myugariro w’Amavubi, Nirisarike Salomon ntiyitwaye neza kuko yatsindiwe mu rugo na Westerlo ibitego 2-1 gusa uyu Munyarwanda ntiyari muri 18 bifashishijwe.

Muri uyu mukino AFC Tubize yahawe ikarita itukura ya Marco Weymans ku munota wa 29 gusa byatumye itsindwa ibitego bibiri bya Daniel Christensen ku munota wa 55 na Ighodaro Christian kuwa 75 iza gutsindirwa impozamarira na Florent Stevance kuwa 77 bituma umukino urangira ari ibitego 2-1.

Nyuma y’imikino umunani, iyi kipe niyo ya nyuma ku rutonde rw’agateganyo rwa shampiyona y’icyiciro cya kabiri ikaba ifite amanota atanu gusa. Yatsinze rimwe, inganya kabiri itsindwa gatanu.

Belarus: Shakhtyor Soligorsk ikinamo Sibomana Patrick yitwaye neza mu mpera z’iki cyumweru itsinda FK Slutsk ibitego bibiri ku busa yayisuye byatumye yisubiza umwanya wa mbere ku rutonde rwa shampiyona n’amanota 56 irusha mukeba, BATE Borisov amanota abiri mu gihe bageze ku munsi wa 24.

Gusa Sibomana ntabwo yagaragaye muri uyu mukino kuko agifite ikibazo cy’imvune yagize muri Kamana uyu mwaka akaba azamara ibyumweru bibiri hanze y’ikibuga.

Kenya: Gor Mahia ikinamo Abanyarwanda batatu, kagere Meddie, Mugiraneza Jean Baptiste na Tuyisenge Jacques yanditse amateka itsinda umukino wa 10 wikurikiranya ubwo yahurana na Bandari FC kuri uyu wa Gatandatu.

Igitego cya mbere cya Gor Mahia cyatsinzwe na Francis Kahata, mu gice cya kabiri Meddie Kagere atsinda icya kabiri ari nacyo cya 10 atsinze muri uyu mwaka naho icya gatatu muri uyu mukino cyatsinzwe na Wellington Ochieng mbere y’uko Paul Nkata atsinda impozamarira mu minota ya nyuma.

Muri uyu mukino Jacques Tuyisenge na Meddie Kagere nibo Banyarwanda babanje mu kibuga naho Mugiraneza Jean Baptiste Migi yari ku ntebe y’abasimbura.

Afurika y’Epfo: Free State Stars yo mu cyiciro cya mbere ikinamo umunyezamu w’Amavubi, Kwizera Olivier yitwaye neza yasuye Maritzburg United iyitsinda igitego 1-0. Ni umukino Kwizera yicaye ku ntebe y’abasimbura iminota 90 kuko izamu ryabanjemo umunya- Côte d’Ivoire, Badra Ali Sangaré.

Ku munsi wa gatandatu wa shampiyona, Free State Stars, iri ku mwanya wa 11 n’amanota arindwi naho Baroka FC ifite 15 iri ku mwanya wa mbere.

Zambia: Zesco United ya Iranzi Jean Claude yitwaye neza imbere ya Real Nakonde iyitsinda ibitego bibiri ku busa gusa uyu mukino Iranzi ntiyawukinnye ndetse na rutahizamu ukomoka muri Uganda, Davis Kasirye wahoze akinira Rayon Sports ntiyawugaragayemo.

Tanzania: Muri shampiyona ya Tanzania Abanyarwanda babiri bakina muri Singinda United bitwaye neza. Rusheshangoga Michel yari mu kibuga ndetse rutahizamu Danny Usengimana niwe watsinze igitego kimwe rukumbi cy’ikipe ye ihura na Azam FC mu mukino warangiye amakipe anganyije igitego kimwe kuri kimwe.

Muri iki gihugu kandi, Simba SC ikinamo kapiteni w’Ikipe y’Igihugu Amavubi, Haruna Niyionzima nayo yitwaye neza itsinda Stand United ibitego bibiri kuri kimwe.

Kagere Meddie na Jacques Tuyisenge babanje mu kibuga banafasha Gor Mahia kubona amanota atatu
Sibomana Patrick (wambaye umuhondo) ntaragaruka mu kibuga kuva yavunika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza