Umubyeyi wa Paul Pogba ukinira Manchester United yitabye Imana

Yanditswe na Manzi Rema Jules
Kuya 13 Gicurasi 2017 saa 06:12
Yasuwe :
0 0

Fassou Antoine, ubyara Paul Pogba ukinira Manchester United mu Bwongereza yitabye Imana mu ijoro ryo kuri uyu wa Gatanu tariki ya 12 Gicurasi 2017, ku myaka 79 nyuma y’igihe kinini yari amaze arwaye.

Amakuru y’urupfu rwa Fassou wibarutse umukinnyi kugeza ubu uhenze mu mateka ya ruhago, Paul Pogba waguzwe miliyoni 105 z’ama-Euro, avuye muri Juventus yo mu Butaliyani muri Kanama 2016 agaruka muri Manchester United, yatangajwe n’ikinyamakuru cyo mu Bufaransa Le Parisien.

Fassou ukomoka muri Guinea yari amaze imyaka 49 aba mu Bufaransa mu Mujyi wa Paris aho yimukiye afite imyaka 30 ari nacyo gihugu umuhungu we Paul Pogba yahisemo gukinira nubwo abavandimwe be babiri, Florentin Pogba na Mathias Pogba bahisemo gukinira Guinea.

Muri Werurwe uyu mwaka nibwo Paul Pogba yari yashyize ifoto kuri instagram ye ari kumwe na se ku munsi w’isabukuru ye y’amavuko yujuje imyaka 79 ayikurikiza amagambo agira ati “Isabukuru nziza mubyeyi mwiza, ndi umunyamugisha kuba ndi umuhungu wawe.”

Muri Euro ya 2016 Fassou wari umaze iminsi arwaye yarihanganye ajya ku kibuga gufana umuhungu we mu ikipe y’Igihugu y’u Bufaransa ndetse nyuma aza gutangariza Telegraph ko nawe yakinnye umupira w’amaguru ndetse ari nawe wawigishije abahungu be batatu bakiri bato.

Yagize ati “Nakinnye umupira ku rwego rwo hasi kurusha uko nabyifuzaga. Nifuzaga ko abahungu banjye bazakina ku rwego rwo hejuru rushoboka. Nabashyiragaho igitutu cyane bakiri bato ari nayo mpamvu bumvaga ibyo bigaga vuba.”

Fassou yitabye Imana umuhungu we Paul Pogba akinira Manchester United afite n’agahigo ko kuba nimero ya mbere mu mateka ya ruhago uhenze, mukuru we Florentin Pogba akinira AS Saint-Étienne mu Bufaransa naho umuto Mathias Pogba akinira Sparta Rotterdam mu Buholandi.

Paul Pogba n'umubyeyi we, Fassou Antoine. Aha ni muri Werurwe ubwo yizihizaga isabukuru y'imyaka 79 y'amavuko
Florentin (ibumoso), Fassou (hagati) na Mathias (iburyo) ubwo bari bashyigikiye Paul Pogba muri Euro 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244