Umugande mu bahatanira igihembo cy’umukinnyi mwiza w’Umunyafurika

Yanditswe na Uwishyaka Jean Louis
Kuya 16 Ukwakira 2016 saa 08:59
Yasuwe : XX
0

Umugande Dennis Onyango, umuzamu w’ikipe ya Mamelodi Sundowns yo muri Afurika y’Epfo, yashyizwe ku rutonde rw’abakinnyi 30 bazatoranywamo uwitwaye neza ukomoka ku mugabane wa Afurika.

Yaya Toure wari wabaye uwa kabiri mu bakinnyi beza ku mugabane wa Afurika umwaka ushize, kuri iyi nshuro ntari kuri uru rutonde rw’aba bakinnyi bashyizwe ahagaragara na CAF bazatoranywamo uwahize abandi muri uyu mwaka.

Umukinnyi uzegukana iki gihembo gitangwa n’impuzamashyirahamwe y’umupira w’amaguru muri Afurika, CAF, azamenyekana tariki 5 Mutarama 2017, mu birori bizabera mu Mujyi wa Abuja muri Nigeria.

Gnégnéri Yaya Touré utagaragara ku rutonde rw’uyu mwaka, afite iki gihembo inshuro enye zikurikiranya kuva muri 2011 kugera 2014.

Kubura k’uyu mukinnyi wafashije Manchester City kwegukana igikombe cy’igihugu mu Bwongereza umwaka ushize, bije bikurikira kutumvikana n’umutoza Pep Guardiola byatumye kuva shampiyona y’uyu mu mwaka muri iki gihugu yatangira nta mukino n’umwe arakina.

Umunya Gabon ukinira Borussia Dortmund, Pierre-Emerick Aubameyang wegukanye iki gihembo umwaka ushize, n’ubundi niwe uyoboye abahabwa amahirwe yo kwegukana icy’uyu mwaka hamwe n’Umunya-Algeria, Riyad Mahrez witwaye neza muri shampiyona y’u Bwongereza, afasha Leicester City kwegukana igikombe ndetse anatorwa nk’umukinnnyi w’umwaka muri iyi shampiyona ikunzwe kurusha izindi ku Isi.

Umuzamu wa Mamelodi Sundowns Dennis Onyango, wafashije iyi kipe kugera ku mukino wa nyuma wa CAF Champions League, ndetse na Uganda kubona itike y’igikombe cya Afurika cy’umwaka utaha kizakinirwa muri Gabon nawe ari kuri uru rutonde.

Kuri uru rutonde kandi hanagaragaraho kabuhariwe wo mu myaka yashize, Umunya- Cameroon Samuel Eto’o ukinira Antalyaspor muri Turikiya ufite iki gihembo inshuro enye. Aramutse atwaye icy’uyu mwaka yaba akoze amateka yo kucyegukana inshuro eshanu.

Urutonde rw’abakinnyi 30 batoranyijwe, amakipe n’ibihugu bavukamo

Ahmed Musa - Leicester City - Nigeria, Andre Ayew - West Ham - Ghana, Aymen Abdennour - Valencia - Tunisia, Benjamin Mounkandjo - Lorient - Cameroon, Cedric Bakambu - Villareal - DR Congo, Dennis Onyango - Mamelodi Sundowns - Uganda, El Arabi Hillel Soudani - Dinamo Zagreb - Algeria, Eric Bailly - Manchester United - Ivory Coast, Hakim Ziyech - Ajax - Morocco, Islam Slimani - Leicester City - Algeria, Itumeleng Khune - Kaizer Chiefs - Afurika y’Epfo, John Mikel Obi - Chelsea - Nigeria, Kalidou Koulibaly - Napoli - Senegal, Keegan Dolly - Mamelodi Sundowns – Afurika y’Epfo, Kelechi Iheanacho - Manchester City - Nigeria, Khama Billiat - Mamelodi Sundowns - Zimbabwe, Mbwana Samatta - Genk - Tanzania, Mehdi Benatia - Juventus - Morocco, Mohamed El Neny - Arsenal - Misiri, Mohamed Salah - Roma - Misiri, Pierre-Emerick Aubameyang - Borussia Dortmund - Gabon, Riyad Mahrez - Leicester City - Algeria, Sadio Mane - Liverpool -Senegal, Samuel Eto’o - Antalyaspor -Cameroon, Serge Aurier - PSG - Ivory Coast, Victor Wanyama - Tottenham - Kenya, Wahbi Khazri - Sunderland - Tunisia, William Jebor - Wydad Casablanca -Liberia, Yannick Bolasie - Everton - DR Congo, Yao Kouasi Gervais ’Gervinho’ - Hebei Fortune - Ivory Coast

Onyango ni we mugande rukumbi uri kuri uru rutonde

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE