Umutoza wa Rayon Sports yasabye inkunga y’amasengesho mbere yo guhura na Onze Créateurs

Yanditswe na Manzi Rema Jules
Kuya 17 Werurwe 2017 saa 07:24
Yasuwe :
0 0

Umutoza Masoudi Djuma yemeye ko urugamba rumuri imbere n’abasore be rwo gushaka ibitego kuri Onze Créateurs no kuyibuza gutsinda rutoroshye asaba abakunze ba Rayon Sports kuzaza kubashyigikira ari benshi ariko bakanabatera inkunga y’amasengesho.

Rayon Sports igomba kwakira Onze Créateurs mu mukino wo kwishyura kuri uyu wa Gatandatu kuri Stade Amahoro saa 15:30 ndetse iyi kipe yamaze kugera mu Rwanda.

Nyuma y’imyitozo yo kuri uyu wa Kane Rayon Sports yakoreye kuri iyi stade izaberaho umukino, Masoudi Djuma yavuze ko mu myiteguro nta bintu byinshi yakoze uretse kuganiriza abakinnyi be akabumvisha akamaro k’umukino bagiye gukina n’icyo basabwa kuwukoramo.

Yagize ati “Imyiteguro ntabwo ari ibintu byinshi. Icya ngombwa ni uko imbere y’abakunzi bacu, imbere y’Abanyarwanda dushaka intsinzi. Nta bindi byinshi tuza gukora.”

Yakomeje agira ati “Tuzi ko tugomba gukora ibintu bibiri kandi bitazatworohera. Tugomba kurinda izamu ntibatsinde ibitego kandi tukanashaka ibitego. Mbere ntabwo twari tuzi uburyo iyi kipe ikina ariko twasanze ikina imipira niremire. Birasaba ko tugomba kuba twiteguye cyane inyuma mu bwugarizi.”

Masoudi ufite intego zo kugeza Rayon Sports mu matsinda byanze bikunze uyu mwaka, yasabye abakunzi ba Rayon Sports kuzaza kuyishyigikira ari benshi kugira ngo batere imbaraga abakinnyi ariko anasaba ko bayitera inkunga y’amasengesho kuko akazi kayitegereje katoroshye nubwo afite icyizere ko bazakora ibyo basabwa bagakomeza muri iri rushanwa.

Mu bakinnyi Rayon Sports ishobora kuzakina uyu mukino idafite harimo Kakure Mugheni Fabrice n’umuzamu wa kabiri Mutuyimana Evariste barwaye ndetse na myugariro Mutsinzi Ange Jimmy wahawe ikarita itukura mu mukino wo kwishyura wa Al Wau Salaam kimwe na Rwatubyaye Aboudul utaremererwa gukina amarushanwa Nyafurika.

Mu ijonjora rya mbere Rayon Sports yasezereye Al Wau Salaam yo muri Sudani y’Epfo iyinyagiye ibitego 6-0 mu mikino yombi.

Kugira ngo igere mu matsinda nk’uko ariyo ntego, Rayon Sports irasabwa gutsinda no gusezerera Onze Créateurs igategereza ikipe imwe izaba yasezerewe muri CAF Champions League yayisezerera nayo igahita ijya mu matsinda.

Myugariro Manzi Thierry ababaye nyuma yo guhusha igitego mu myitozo
Nubwo atarahabwa uburenganzira bwo gukina amarushanwa mpuzamahanga, Rwatubyaye Aboudul yari yaje gufatanya imyitozo na bagenzi be
Masoudi Djuma yasabye inkunga y'amasengesho ku bakunzi ba Rayon Sports no kuza ku kibuga kuyishyigikira ari benshi
Muhire Kevin (ufite umupira) ashobora gukina uyu mukino kubera kubura kwa Mugheni Fabrice
Abakinnyi n'abatoza mu nama nyuma y'imyitozo
Aganira n'abanyamakuru, abafana bari benshi bashaka kumva icyo atangaza
Aha Umutoza Masoudi Djuma yasobanuriraga abayobozi b'iyi kipe barimo Perezida Gacinya Denis n'Umunyamabanga Gakwaya Olivier uburyo Rayon Sports ishobora gusezereramo Onze Createurs
Bashunga Abouba (mu izamu) yasimbuye Mutuyimana Evariste urwaye
Imyitozo yo kuri uyu wa Kane yari ikomeye cyane
Kwizera Pierrot (wambaye 23) areba uko bagenzi be bitwara mu myitozo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza