Umutoza wa Sunrise FC yaciye amarenga ko iyi kipe yerekeza mu manga

Yanditswe na Kanamugire Emmanuel
Kuya 9 Mutarama 2017 saa 08:51
Yasuwe :
0 0

Umunya-Nigeria utoza Sunrise FC, Iddy Ibe Andrew yabwiye ubuyobozi bw’iyi kipe ko niba ntacyo bukoze mu maguru mashya kugira ngo abakinnyi bave mu buzima bubi babayemo burimo no kudahembwa, umusaruro udashobora kuboneka ndetse nibikomeza gutyo bashobora no gusanga itangiye kurwanira kuguma mu cyiciro cya mbere.

Sunrise FC ni imwe mu makipe yakoresheje amafaranga menshi mu isoko ry’igura n’igurisha ry’abakinnyi aho yanarenze imbibi z’u Rwanda ijya kuzana abakinnyi bakomoka muri Nigeria ndetse n’umutoza waho mpuzamahanga, intego ikaba yari ugushaka kurangiza mu myanya ine ya mbere ndetse n’igikombe byashoboka bakaba bagihatanira.

Mu ntangiriro byari byiza dore ko iyi kipe yageze ku mukino w’umunsi wa kane wa shampiyona iri mu ziyoboye itaranatakaza umukino n’umwe.

Gusa ibyari inzozi zo kwegukana igikombe cya mbere mu mateka cyangwa kurangiza mu makipe ane ya mbere ku nshuro ya mbere bishobora kurangira bibaye kurwanira kutamanuka mu cyiciro cya kabiri kuri iyi kipe y’Akarere ka Nyagatare ifite ikibazo gikomeye cy’amikoro nk’uko umutoza wayo yabitangaje amaze gutsindwa na Police FC 2-1.

Ati “Buri muntu wese azi ibirimo kuba kuri Sunrise FC. Turi mu bibazo bikomeye by’ubukene. Ntabwo bitworoheye na gato. Gusa turimo kugerageza gukina umupira w’amaguru, nicyo cyatuzanye. Twaje gukina shampiyona kandi nicyo turimo gukora gusa niba abandi batarimo gukora inshingano zabo ku ikipe ni ikibazo kuko ntabwo ushobora gukora inshingano z’abandi bantu, ukora ibikureba. Gusa niba hari abatujuje ibyo basabwa uyu ni wo musaruro ubona. “

Uyu mutoza yanatangaje ko ku ruhande rwe yifuzaga kugura abakinnyi nka batatu cyangwa bane muri uku kwezi kugira ngo baze gufasha iyi kipe kugaruka ku murongo ariko ngo biri mu biganza by’abayobozi kuba basohora amafaranga.

Ati “Twifuzaga abakinnyi nka batatu cyangwa bane ariko nizeye ko ubuyobozi buzagira icyo bukora amafaranga yo kubikora akaboneka. Kuko namwe murabibona ikipe yanjye nta basimbura ifite, biradusaba kongeramo imbaraga kuko ufite abasimbura beza utsinda imikino yawe. Ntushobora kwitwara neza ufite 11 babanzamo gusa.”

Ibyo uyu mutoza avuga kandi byamashimangiwe na Uwambajimana Leon, myugariro wamenyekanye cyane muri Rayon Sports wavuze ko muri iki gihe abakinnyi ba Sunrise FC bamara umwanya munini batekereza ku mibereho mibi barimo aho gutekereza ku mikino bafite.

Ati “Birimo biratugiraho ingaruka kuko igihe tumaze tudahembwa ni igihe kinini cyane. Mu ikipe harimo ibibazo byinshi byinshi cyane. Urebye ni ibintu birimo biratugora kuko turaza gukina tubitekerezaho ugasanga tuvuye Nyagatare dutinze bikatugora kwinjira mu mukino mu gihe twakabaye tugera ku bibuga kare tukaruhuka tukanitegura neza.”

Sunrise FC yamaze imikino ine ya mbere itaratsindwa ariko kuva ihuye na Rayon Sports ikayitsinda 1-0 tariki 19 Ukuboza 2016, imaze gukina imikino irindwi ikaba yaratsinzemo umwe rukumbi wa Gicumbi FC.

Iyi kipe ihagaze ku mwanya wa karindwi n’amanota 16 mu mikino 12, iracyafite akazi gakomeye mbere y’isozwa ry’imikino y’agace ka mbere ka shampiyona kuko tariki 14 Mutarama igomba kwakira Mukura VS idahagaze neza na yo muri iki gihe, igasura Espoir FC tariki 21 Mutarama nyuma ikakira Musanze FC tariki 28 Mutarama ari nayo izasorezaho.

Umutoza wa Sunrise FC asanga aho ikipe yerekeza atari heza igihe ntacyo ubuyobozi bukoze
Uwambajimana Leon (wambaye Nimero 6) yemeza ko abakinnyi ba Sunrise FC bagowe n'ubuzima babayemo muri iki gihe
Iddy Ibe Andrew yavuze ko akazi ke ari ugutoza ariko niba hari abadakora ibyo bashinzwe ari yo ntandaro yo kwitwara nabi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244