Urubanza ruregwamo De Gaule na Mulindahabi Olivier rwasubitswe rushyirwa muri Nzeri

Yanditswe na Manzi Rema Jules
Kuya 10 Nyakanga 2017 saa 11:48
Yasuwe :
0 0

Kuri uyu wa Mbere, tariki ya 10 Nyakanga, urukiko Rwisumbuye rwa Nyarugenge rwasubitse urubanza ruregwamo Perezida w’Ishyirahamwe ry’Umupira w’Amaguru mu Rwanda, Nzamwita De Gaulle; Murindahabi Olivier wari umunyamabanga waryo na Adolphe Muhirwa, inzobere mu bwubatsi wari warahawe imirimo yo kwiga ibijyanye n’iyubakwa rya hotel ya Ferwafa yatumye aba bagabo bagezwa imbere y’ubutabera.

Mu mwaka ushize kuya 24 Kamena 2016 nibwo urukiko rw’Ibanze rwa Nyarugunga rwagize Perezida Nzamwita De Gaulle umwere ku ‘cyaha cyo gutonesha’ mu gutanga isoko ryo kubaka hoteli ya Ferwafa, ruhanisha Murindahabi Olivier na Adolphe Muhirwa gufungwa amezi atandatu.

Nyuma y’iki cyemezo cyafashwe n’urukiko, ubushinjacyaha bwahise bukijuririra ndetse busaba ko Nzamwita ahabwa igifungo cy’imyaka itatu mu gihe bagenzi be bo bajuriye basaba ko bagirwa abere ku gifungo cy’amezi atandatu wakatiwe nubwo bayamaze muri gereza.

Murindahabi na Adolphe Muhirwa basabye ko bagirwa abere bagakurirwaho igihano bahawe kuko kibazitira mu buryo bw’amategeko.

Mu gitondo cyo kuri uyu wa Mbere, saa mbiri nibwo bagombaga kuburana ku rukiko rwisumbuye rwa Nyarugenge ariko urubanza ruza gusubikwa ruvanwa saa mbili rushyirwa saa munani.

Aya masaha nabwo ntibyakunze kuko umwunganizi mu mategeko wa De Gaulle na Murindahabi, Me Rukangira yagaragaje ko afite urundi rubanza agomba kuburana mu Rukiko rw’Ikirenga.

Aba bombi bahise bagaragaza ko bataburana umwunganizi wabo adahari, urukiko rwanzura ko urubanza rwabo rwimurirwa kuya 7 Nzeri 2017.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza