Kwamamaza

Urunturuntu no gushinjanya ubwambuzi bwa matola hagati ya Sunrise FC na Nyagatare FC

Yanditswe kuya 2-12-2016 saa 10:22' na Manzi Rema Jules


Ishyamba ri ryeru hagati y’amakipe abiri y’umupira w’amaguru yose yo mu Karere ka Nyagatare aho Nyagatare FC yo mu cyiciro cya kabiri ishinja Sunrise FC n’umukozi w’Akarere ushinzwe siporo kuyambura ibikoresho byayo birimo matola, imyenda yo gukinana, televiziyo n’ibindi.

Nyagatare FC yari ikipe y’Akarere ndetse kayitera inkunga kugeza umwaka ushize ubwo Sunrise FC yari isanzwe ari iy’Intara y’Uburasirazuba yaragizwaga aka karere kakanayibera umuterankunga mukuru bituma Nyagatare FC yisubirira mu Murenge wa Musheri aho yavukiye.

Kuva Sunrise FC yagera i Nyagatare umwuka ntiwigeze uba mwiza hagati yayo n’iyo yasanze kuko ishinjwa gutwara ibikoresho hafi ya byose byari ibya Nyagatare FC ibifashijwemo na Twahirwa Theoneste ushinzwe siporo mu Karere nk’uko Umunyamabanga wa Nyagatare FC, Aimable Sandro yabibwiye IGIHE.

Ati “Mu nama y’ubuyobozi bwa Sunrise FC n’Akarere yabaye ejo bundi natwe twari twoherejeyo intumwa ya Nyagatare FC. Bageze ku kibazo cy’ibikoresho byacu, Perezida wa Sunrise, Ndungutse, ababwira ko ibyo bikoresho batabikeneye byagasubijwe ba nyirabyo.

"Ukuriye urubyiruko avuga ko ibikoresho badashobora kubitanga ngo kuko babihaye Sunrise FC kugira ngo abana bajye babikoresha. Yongeraho ko inkunga yose yahabwaga Nyagatare FC yahagaritswe kuko itakiri iy’Akarere.”

Mu kiganiro n’Umuyobozi wa Sunrise FC, Ndungutse Jean Bosco yemereye IGIHE ko ibyo bikoresho koko ajya abibona ariko ataribo babisabye kuko bafite ibyabo bityo ikibazo kikaba cyakemuka ari uko ubuyobozi bwa Nyagatare FC n’Akarere bwicaye bukaganira.

Ati “Hari ibikoresho nzi biri muri Sunrise bya Nyagatare FC nka bwa buntu batereka mu kibuga, wenda ngo na matola zingahe, ndabyemera njyewe ariko ntabyo dukeneye rwose. Urumva ntitwakoresha imyenda yanditseho Nyagatare turi Sunrise kandi dufite ibyacu.”

Umukozi w’Akarere ushinzwe siporo, Twahirwa Theoneste, ari nawe ushyirwa mu majwi cyane kuri iki kibazo, yemereye IGIHE ko ibyo bikoresho byafatiriwe ariko ntiyemeranya na Aimable Sandro ku cyatumye byamburwa Nyagatare FC.

Yagize ati “Ibikoresho byaguzwe n’Akarere kabigurira ikipe yako. Icyo gihe Nyagatare FC yari ikipe y’Akarere. Nyuma uwitwa Bonny na Aimable Sandro baza kuvuga ko ikipe atari iy’Akarere ari iyabo bwite. Iyi niyo mpamvu ibikoresho byari byaguzwe twabibitse kuko ntitwagurira ikipe y’abantu ku giti cyabo ibikoresho.”

Uyu muyobozi avuga ko ahubwo uretse n’ibyo babitse ngo hari n’ibindi byaburiwe irengero mu bikoresho bari baguze ku buryo bashobora gukurikirana Nyagatare FC ho ubujura kuko ubwo abayobozi bayo bazaga kuyitwara aho Akarere kayicumbikiraga bayijyanye mu Murenge wa Musheri aribwo byabuze.

Nubwo aya makimbirane no kwitana ba mwana bikomeje, Twahirwa avuga ko ku nyungu zo guteza imbere umupira w’amaguru na siporo muri rusange mu Karere, barimo kugerageza uko iyi Nyagatare FC yakongera kuba iy’Akarere nibura ikajya izamura abakinnyi bato bajya muri Sunrise FC, zose zikabaho nta kibazo.

Gusa ngo ibi nibyanga, ibikoresho byo ntibizigera byongera guhabwa Nyagatare FC ahubwo bizajya bikoreshwa n’abakozi b’Akarere mu gihe bari muri siporo cyangwa bishakirwe ikindi bikora.

Ubuyobozi bwa Sunrise FC buvuga ko ibikoresho bihari ariko batigeze babisaba
Byateje ikibazo ubwo ku mukino wa Rayon Sports na Sunrise FC abana batora imipira bari bambaye inyenda ya Nyagatare FC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved