Rayon Sports yahaye isomo APR FC

Mu mukino wahuje Rayon Sports na APR FC kuri uyu wa Gatandatu muri Shampiyona y’u Rwanda (PNFL : Primus National Football League), warangiye Rayon Sports inyagiye APR FC ibitego bine ku busa.

Abakinnyi batsindiye Rayon ni Kanombe Aphrodis, Cedrick Hamis na Kambale Salita umenyerewe ku izina rya Papy Kamanzi watsinze ibitego bibiri. Imvura y’ibitego nk’iyi ku makipe akomeye ikaba itari iherutse muri shampiyona yo mu Rwanda.

Muri uyu mukino wandikiye amateka ikipe ya Rayon Sport n’iya APR, wabereye kuri Stade Amahoro i Remera yahekaga kuzihuza mu gikombe cy’isabukuru ya FPR ariko icyo gihe bakaba barinjiraga ubuntu. Igice cya mbere cyarangiye amakipe yombi afite ubusa ku busa, icya kabiri kibonekamo ibitego bine.

Mu minota ya mbere y’igice cya kabiri, ni bwo Rayon Sports yabanje gutsinda igitego cyayo cya mbere cyatsinzwe na Aphrodis Kanombe. Ntibyatinze kuko APR yahise yishyura iki kitego ariko nticyemerwa kuko umunyezamu wa Rayon Sports yari yakoreweho ikosa.

Umukino wakomeje, ku munota wa 12 w’igice cya kabiri, Cedrick Hamis ashyiramo icya kabiri cya Rayon. Ku munota wa 18 w’iki gice, ni bwo Kambale Salita yatsinze igitego cya gatatu, ntibyatinda ashyiramo n’icya kane cyabonetse ku munota wa 26.

Abakinnyi ba Rayon Makenzi, Fuwadi na Djamal bari barwaye, bose bitabiriye uyu mukino babanzamo.

Undi mukino wari ukomeye wabereye i Huye, warangiye Mukura itsinze Kiyovu ibitego bibiri ku busa. Kugeza magingo aya, ku mukino wa 20 wa shampiyona, Rayon Sports ikomeje kuza ku mwanya wa mbere n’amanota 41.

Uko indi mikino yagenze

Police FC 2-1 Isonga ;

Mukura V.S 2-0 Kiyovu ;

Etincelles 1-1 Marines.

Amwe mu mafoto ya nyuma y’insinzi ya Rayon Sports