Richard Tardy yagizwe ushinzwe ibya tekinike muri FERWAFA

Nyuma y’imyaka igera kuri ibiri nk’umutoza w’Amavubi y’abatarengeje imyaka 17, ndetse n’uw’abatarengeje 20, Umufaransa Richard Tardy FERWAFA yamugize ushinzwe tekinike (Directeur technique) mu Ishyirahamwe ry’Umupira w’Amaguru mu Rwanda (FERWAFA).

Nk’uko tubikesha Rwanda Newa Agency, uyu murimo azawufatanya no gukomeza gutoza amavubi y’abatarengeje imyaka 17 na 20.

Uyu mugabo w’Umufaransa yatangiye kuba umutoza mu Rwanda kuva mu mwaka wa 2010. Kontaro ye yambere yayirangizanyije insinzi zigera kuri 2.

Muri zo harimo kwegukana umwanya wa kabiri mu gikombe cya Afurika cy’abari munsi y’imyaka 17, ndetse ndetse no kugeza iyi kipe mu gikombe cy’Isi.

Ibi bikaba ari bimwe mu byatumye FERWAFA ihitamo kumusinyisha indi kontaro y’imyaka ibiri kuko mbere ye u Rwanda ntirwari ruzwi mu marushanwa y’igikombe cy’Isi mu mupira w’amaguru.

Richard Tardy mbere y’uko aba umukozi mu Ishyirahamwe ry’Umupira w’Amaguru mu Rwanda (FERWAFA), yanyuze mu Ishyirahamwe ry’ Umupira w’Amaguru mu Bufaransa ndetse no muri Maroc.

Kugeza mu mwaka 2014 azakora nk’ushinzwe tekinike mu bakinnyi b’Abanyarwanda, ndetse nk’umutoza mu makipe y’igihugu y’abatarengeje imyaka 17 na 20.