Ibihugu bya Afurika byabimburiye ibindi gusezererwa mu gikombe cy’Isi (Amafoto)

Yanditswe na Manzi Rema Jules
Kuya 21 Kamena 2018 saa 08:02
Yasuwe :
0 0

Ibihugu bibiri muri bitanu byaserukiye Afurika mu gikombe cy’Isi byamaze gusezererwa nyuma yo gukina imikino ibiri gusa, u Burusiya na Uruguay biba ibya mbere bikatishije itike ya 1/8 cy’irangiza.

Misiri yari iri mu itsinda A niyo yabanje gusezererwa mu gikombe cy’Isi nyuma yo gutsindwa imikino ibiri imaze gukina ikaba yatahanye muri iryo tsinda na Saudi Arabia nayo itarabonye inota na rimwe kuri atandatu.

U Burusiya buri gukinira imbere y’abafana babwo, bwabimburiye ibindi bihugu gukatisha itike ya 1/8 nyuma yo gutsinda Misiri ibitego 3-1 ku wa Kabiri, bukaba bwazamukanye na Uruguay yatsinze Saudi Arabia igitego 1-0 cya Luis Suarez kuri uyu wa Gatatu.

Mu itsinda B, Cristiano Ronaldo yongeye kwerekana ko abamufata nk’umukinnyi wa mbere ku Isi batibeshya, afasha Portugal gutsinda Maroc igitego kimwe ku busa cyabonetse hakiri kare cyane aba ari nacyo kirangiza umukino naho bigoranye, Espagne itsinda Iran igitego kimwe ku busa cya Diego Costa.

Muri iri tsinda imibare iracyakomeye cyane kuko uretse Maroc, yari ihagarariye Afurika, yamaze gusezererwa itabonye inota na rimwe mu mikino ibiri, andi makipe yaba Iran ifite amanota atatu cyangwa Espagne na Portugal zifite ane, buri imwe iracyafite amahirwe yo kubona itike ya 1/8.

Hazitabazwa umunsi wa nyuma aho Espagne isabwa gutsinda byanze bikunze Maroc naho Portugal yo kugira ngo ibone itike ikaba isabwa gutsinda Iran ibitego byinshi, byayifasha kuyobora iri tsinda ariko n’iyo yanganya ikaba yagira amanota atanu ku buryo yahita ikomeza mu kindi cyiciro.

Muri iki gikombe, Cristiano Ronaldo yandikiyemo amateka mashya kuko igitego yatsinze Maroc cyari icya 85 atsindiye Portugal mu mateka, byatumye ahita aba umukinnyi wa mbere umaze gutsindira ikipe y’igihugu ibitego byinshi ku mugabane w’u Burayi akuyeho agahigo ka Ferenc Puskás watsindiye Hungary ibitego 84.

Imikino iteganyijwe kuri uyu wa Kane tariki 21 Kamena

-  Saa 14:00: Denmark vs Australia
-  Saa 17:00: U Bufaransa vs Peru
-  Saa 20:00: Argentine vs Croatia

Cristiano Ronaldo yishimira igitego kimwe yatsinze Maroc
Niwe mukinnyi umaze gutsinda ibitego byinshi muri iri rushanwa
Yaciye agahigo kandi kari gasanzwe gafitwe na Ferenc Puskás ko gutsindira ikipe y’igihugu ibitego byinshi ku mugabane w’u Burayi
Diego Costa yishimira igitego cyahesheje Espagne intsinzi
Iran yarwanaga no kubona inota kugira ngo yizere amahirwe gukomeza mu cyiciro gikurikiraho
Abasore ba Iran bagerageje kwihagararaho ariko biranga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza