Igikombe cy’Isi: U Bubiligi buracakirana n’u Bufaransa mu mukino uhanzwe amaso

Yanditswe na Ishimwe Israel
Kuya 10 Nyakanga 2018 saa 08:54
Yasuwe :
0 0

Saa mbili z’ijoro ku isaha ya Kigali, abakunzi ba ruhago baraba bahanze amaso umukino w’ishiraniro wa ½ cy’Igikombe cy’Isi kiri kubera mu Burusiya, uhuza u Bubiligi n’u Bufaransa ku mugoroba wo kuri uyu wa Kabiri.

Uyu mukino wa mbere muri iki cyiciro urabera kuri Krestovsky Stadium mu Mujyi wa Saint Petersburg ni uwa 74, uhuza ibihugu byombi mu marushanwa yose.

U Bufaransa bwatsinze imikino ibiri iheruka kubuhuza n’u Bubiligi mu Gikombe cy’Isi bwageze muri ½ busezereye Uruguay nyuma yo kuyitsinda ibitego bibiri ku busa, mu gihe Les Diables Rouges yasezereye Brazil kuri 2-1.

Ni ku nshuro ya mbere, ibihugu byombi bihuriye mu irushanwa kuva mu Gikombe cy’Isi cya 1986 aho u Bufaransa bwatsinze u Bubiligi ibitego 4-2 mu gukinira umwanya wa gatatu. Bwa mbere, u Bufaransa bwatsinze u Bubiligi mu mukino w’ijonjora rya mbere mu cy’Isi cya 1938 (3-1).

Umukino wa gicuti uheruka guhuza ibihugu byombi wabereye i Paris mu 2015, warangiye u Bubiligi butsinze u Bufaransa 4-3.

U Bufaransa burakina ku nshuro ya gatandatu muri ½ cy’Igikombe cy’Isi, bwageze ku mukino wa nyuma mu 1998 na 2006, mu gihe u Bubiligi bugeze muri ½ ku nshuro ya kabiri; mu 1986 bwatsinzwe na Argentina.

Les Bleus bagaruye mu kibuga Blaise Matuidi utaragaragaye ku mukino wa Uruguay kubera amakarita abiri mu gihe u Bubiligi budafite Thomas Meunier.

Ubusatirizi bw’amakipe yombi buhagaze neza kuko rutahizamu w’u Bufaransa, Antoine Griezmann amaze gutsinda ibitego birindwi mu mikino itandatu yo gukuranamo mu marushanwa y’i Burayi n’ay’igikombe cy’Isi. Romelu Lukaku amaze kugira uruhare mu bitego 20 (yatanze imipira itatu, atsinda 17) mu mikino 13 yakiniye u Bubiligi mu marushanwa yose.

Undi mukinnyi witezwe ni Kylian Mbappé winjije ibitego bitatu, ndetse akaba ariwe muto ufite byinshi inyuma ya Pele watsinze bitandatu mu 1958 birimo bitatu yabonye Brazil ihura n’u Bufaransa muri 1/2.

U Bufaransa bwatakaje umukino umwe muri 13 iheruka yo gukuranamo mu gikombe cy’Isi, ukuyemo iyo bwageze kuri penaliti.

Uyu mukino ukomeye uhuza amakipe afite abakinnyi b’inkorokoro ku mugabane w’u Burayi urasifurwa na Andres Cunha ukomoka muri Uruguay.

Undi mukino wa ½ uzakinwa kuri uyu wa Gatatu, uzahuza Ikipe y’Igihugu y’u Bwongereza na Croatia.

Uyu mukino wa mbere muri iki cyiciro urabera kuri Krestovsky Stadium mu Mujyi wa Saint Petersburg

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza