Imibare igaragaza amafaranga yashowe mu mitegurire y’Igikombe cy’Isi cya 2018

Yanditswe na Manzi Rema Jules
Kuya 14 Kamena 2018 saa 11:32
Yasuwe :
1 0

U Burusiya bwashoye akayabo ka miliyari icyenda z’ama-pound mu gikombe cy’Isi kigomba gutangira kuri uyu wa Kane tariki 14 Kamena 2018.

Amakipe 32 ahagarariye imigabane yose y’Isi agiye kumara ukwezi ahanganiye mu Burusiya mu irushanwa rikurikirwa kurusha andi yose, igihugu kizaryegukana, uretse gufatwa nk’umwami wa ruhago mu gihe cy’imyaka ine kikazanahabwa igikombe na miliyoni 38 z’amadorali ya Amerika (asaga miliyali 32 Frw).

Kugira ngo ubashe kubona neza agaciro k’amafaranga avugwa muri iyi nkuru: (1 pound = 1,160 Frw)

Ibindi wamenya ku mafaranga ari mu gikombe cy’Isi cya 2018

1. Igikombe cy’Isi gihenze mu mateka

U Burusiya bwakoresheje ingengo y’imari ingana na miliyari 9.75 z’ama-pound, ikaba ariyo ya mbere nini ikoreshejwe kuva igikombe cy’Isi cyabaho.

Agera kuri miliyari 3.03 z’ama-pound niyo yashowe mu kubaka no kuvugurura Stade 12 zizakira iri rushanwa mu mijyi 11 rizaberamo.

Agera kuri miliyari 5.1 z’ama-pound yashowe mu kubaka imihanda no gutegura ibijyanye no gutwara abantu n’ibintu mu gihe cy’Igikombe cy’Isi.

Ibibuga by’indege 11 byaravuguruwe mu kwitegura abazitabira iri rushanwa, hashyirwaho gari ya moshi nshya 728 zizatwara abafana ku buntu berekanye amatike yo kwinjira ku bibuga cyangwa icyemezo kiranga umufana.

Leta y’u Burusiya yagiranye amasezerano n’ibigo bitandukanye yo kwica imbwa zo mu gasozi mu mijyi 11 izakira igikombe cy’Isi afite agaciro ka miliyoni 1.2 y’ama-pound.

Kuva kuri Stade ya Kaliningrad iri mu Burengerazuba kugera kuri Stade ya Ekaterinburg iri mu Burasirazuba niho hantu harehare kuko harimo intera ya kilometero 1800.

2. Amatike

Kugeza ubu, 89% by’amatike miliyoni 2374 yo kureba imikino 64 y’igikombe cy’Isi yamaze kugurwa. 46% by’ayaguzwe ni Abarusiya, andi yiharirwa n’Abanya-Amerika n’Abashinwa n’ubwo ibihugu byabo bitazitabira iri rushanwa.

Abadage 55136 nibo baguze amatike yo kuzajya gushyigikira ikipe yabo ifite igikombe cy’Isi giheruka, mu gihe Abongereza 30711 bazaba bari mu Burusiya bashyigikiye Harry Kane na bagenzi be.

Itike ya make yo kuzareba umukino wa nyuma yaguzwe ama-pound 84 (umuntu aguriye ku rubuga rwa FIFA) mu gihe ihenze yaguzwe ama-pound 793.

Itike ya make yo kureba imikino y’amatsinda yaguzwe ama-pound 15,38, zikaba zari zigenewe abatuye mu Burusiya gusa naho abanyamahanga iya make bakaba barayiguraga ama-pound 75,75.

3. Inyungu k’u Burusiya
Biteganyijwe ko u Burusiya buzinjiza agera kuri miliyari 19.5 z’ama-pound avuye muri iri rushanwa, ni ukuvuga hafi miliyali 10 zirenga ku yashowe mu gutegura.

U Burusiya busanzwe bufite abakinnyi 331 000 bazwi bakina ruhago ariko burateganya ko nyuma y’Igikombe cy’Isi bugiye kwakira bwa mbere, umubare uzazamuka ukagera ku 750 000.

Igikombe cy’Isi cyatumye mu Burusiya haboneka imirimo 100 000 harimo n’iyo kubaka ama-stade, imihanda, amahoteli igera ku 13 000 mu gihe abasaga 30 000 bazaba bakora muri iri rushanwa nk’abakorerabushake.

Biteganyijwe ko muri iki gihe cy’Igikombe cy’Isi, u Burusiya buzakira ba mukerarugendo ibihumbi 500 bavuye hirya no hino ku Isi.

Spartak Stadium iri mu Mujyi wa Moscow nayo ni imwe mu zizakinirwaho
Stade izwi nka Krestovsky Stadium, Saint-Petersburg Stadium cyangwa Zenit Arena ni imwe mu zizakinirwaho iyi mikino
Telstar18 niwo mupira wakozwe na Adidas uzifashishwa muri iyi mikino
Luzhniki Stadium iri mu Mujyi wa Moscow izakira umukino wa nyuma w'igikombe cy'Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza