Mohamed Salah ashobora gusezera mu Ikipe y’Igihugu ya Misiri

Yanditswe na Manzi Rema Jules
Kuya 25 Kamena 2018 saa 04:01
Yasuwe :
1 0

Rutahizamu wa Liverpool Mohamed Salah, ashobora gusezera mu Ikipe y’Igihugu ya Misiri nyuma yo guhura no kwifotozanya n’umuyobozi wa Tchétchénie, Ramzan Kadyrov, bigatuma ashyirwaho igitutu kubera uburyo uyu munyapolitiki afatwa, akaba yaranafatiwe ibihano na Leta Zunze Ubumwe za Amerika.

Ikipe y’igihugu ya Misiri iri mu gikombe cy’Isi mu Burusiya aho iri kwitoreza mu Mujyi wa Grozny.

Ku wa Gatanu nibwo Kadyrov yatumiye ikipe y’Igihugu ya Misiri ngo basangire ku mugoroba, mbere yo kwerekeza mu Mujyi wa Volgograd, aho kuri uyu wa Mbere bagomba gukinira umukino wa nyuma na Arabie Saoudite.

Amafoto y’aba bombi yagiye hanze mbere y’uko Igikombe cy’Isi gitangira, bigaragara ko Salah na Kadyrov bafatanye ukuboko mu bisa n’ikimenyetso cyo kunga ubumwe, bituma ibinyamakuru bitandukanye bishyira igitutu kuri Salah.

Kadyrov ayobora kamwe mu duce tugize u Burusiya guhera mu 2004 ariko yaje gushyirirwaho ibihano na Leta Zunze Ubumwe za Amerika zimushinja guhonyora uburenganzira bwa muntu.

Mu butumwa uyu muyobozi yashyize ku mbuga nkoranyambaga nyuma yo guhura kuwa Gatanu, yagize ati ’Mohamed Salah yadushimiye uburyo twabakiranye urugwiro, uburyo twafashe neza ikipe, uburyo imibereho yabaye myiza n’imyitozo ikagenda neza..”

Kuri uwo munsi nibwo Kadyrov yahaye Salah ubwenegihugu bw’icyubahiro, icyo gihe akaba yaramushyikirije iteka ribyemeza.

Uwo muyobozi yanavuze ko yifuza ko Ikipe y’Igihugu ya Misiri yazasubira muri Tchétchénie nyuma y’Igikombe cy’isi, bakazakina umukino wa gicuti n’ikipe yo muri icyo gihugu yitwa Akhmat Grozny, yitiriwe umubyeyi we wishwe mu 2004.

CNN yatangaje ko uyu mukinnyi atigeze yishimira uko yashyizwe ku karubanda ku byabereye muri Tchétchénie kandi atifuza kugaragara mu bintu biri hanze y’umupira cyangwa izina rye rikaba ryakoreshwa mu mpamvu za politiki.

Umwe mu bayobozi b’Ishyirahamwe ry’Umupira w’Amaguru mu Misiri, Essam Abdel Fattah, yavuze ko ibyo kuba Salah yasezera mu ikipe y’Igihugu ari ibinyoma, ahubwo atazi aho ibinyamakuru biri kubivana.

Yakomeje agira ati “Ibi simbyumva. Turi abashyitsi ku butaka bw’uyu mugabo kandi yaradutumiye ngo dusangire iby’ijoro. Ntabwo dushobora kwanga ikintu nk’icyo kandi ni ibintu bisanzwe.”

Yavuze ko bidakwiye ko abantu bifuza kunenga bagera aho bavanga ibikorwa bya siporo na politiki, avuga ko Ikipe ya Misiriri ari iya siporo ntaho ihuriye n’ibikorwa bya politiki.

Mohamed Salah w’imyaka 26, yigaragaje bikomeye mu mwaka ushize wa shampiyona mu Bwongereza aba umukinnyi watsinze ibitego byinshi, atorwa nk’umukinnyi mwiza w’umwaka ndetse afasha ikipe ya Liverpool kugera ku mukino wa nyuma wa UEFA Champions League.

Mu gikombe cy’Isi ntiyabashije gufasha ikipe ya Misiri kugera kure kuko bitewe n’imvune atakinnye umukino wa mbere yatsinzwe na Uruguay 1-0, itakaza n’uwa kabiri itsinzwe n’u Burusiya 3-1 yakinnye bituma ihita isezererwa ikaza gukina umukino wa nyuma kuri uyu wa Mbere ihura na Saudi Arabia irwanira ishema gusa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza