Umunyamakuru Rutamu wa Radio 1 yashimangiye ko nyuma y’Igikombe cy’Isi azajya ‘guhinga’

Yanditswe na Manzi Rema Jules
Kuya 1 Nyakanga 2018 saa 11:01
Yasuwe :
0 0

Umunyamakuru Rutamu Elie Joe ukorera Radio 1, umwe mu bakunzwe mu gihugu kubera kogeza imipira , yashimangiye ko azakomera ku ijambo rye nyuma y’Igikombe cy’Isi cya 2018, akava mu itangazamakuru nk’uko yabisezeranyije, ubwo yavugaga ko Argentine nidatwara iki gikombe azahita asezera muri uyu mwuga.

Ni isezerano yari yaratanze mbere y’itangira ry’Igikombe cy’Isi kiri kubera mu Burusiya, ubwo yavugiraga kuri mikoro ya Radio 1 ko Argentine afana bikomeye, nidatwara iri rushanwa azahita asezera mu mwuga w’Itangazamakuru.

Rutamu wari umaze imyaka ibiri kuri iyi radio akorana na Rugimbana Théogène, yahise avuga ko agomba kuva muri uyu mwuga, ubwo Argentine yari imaze gusezererwa n’u Bufaransa muri 1/8, buyitsinze ibitego 4-3.

Yahise asezera ku bafana, avuga ko mu gihe cyose igikombe cy’Isi kizaba kirangiye, ijwi rye ritazongera kumvikana mu itangazamakuru nk’umunyamakuru.

Yagize ati “Umukino wa nyuma w’igikombe cy’Isi uzarangira nanjye mva muri izi studio njya guhinga, njya gukora ibindi ni byo …Mu buryo budasubirwaho, Igikombe cy’Isi kirarangira ku itariki 15 Nyakanga 2018, ndangize amasezerano y’aba bantu bose turi kwamamariza namwe ‘abafana’ muryoherwa, ubundi nanjye ndajya guhinga no korora inka.”

Icyemezo cya Rutamu cyatumye benshi mu basanzwe bakurikirana ibiganiro bye bagira intimba ndetse bamwe bahamagara kuri radio bamusaba kwisubiraho, ariko akaba yabwiye mugenzi we Rugimbana ko impamvu imwe gusa yatuma ahindura umwanzuro yafashe ari uko yaba abisabwe n’Umukuru w’igihugu gusa.

Si ubwa mbere Rutamu atanze isezerano ku bamukurikira kandi akarisohoza kuko ubwo yari ashinzwe imibereho y’abakinnyi muri Sunrise FC ‘Team manager’, yavuze ko Rayon Sports nibatsinda imikino ibiri azahita asezera kuri izo nshingano, kandi yarabikoze.

Rutamu yatangiriye itangazamakuru kuri RC Nyagatare akomereza kuri Radio Salus. Yakoreye Radio Flash na Isango Star ahava ajya kuri Radio Rwanda, mu 2016 ajya kuri Radio 1 aho ikiganiro cye na Rugimbana Théogène kiri mu bya siporo bikunzwe mu gihugu.

Rutamu yemeje ko Argentine nidatwara igikombe azasezera mu itangazamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza