Ab’i Huye banogewe n’imyiyereko ya Moto, Memorial Gakwaya ibura uyegukana

Yanditswe na Jah d’eau Dukuze
Kuya 17 Ukwakira 2016 saa 07:14
Yasuwe : XX
0

Imyiyereko ya Moto ebyiri z’abanya Afurika y’Epfo, yasigiye ibyishimo bidasanzwe abaturage b’Akarere ka Huye bakurikiranaga Memorial Gakwaya yakinwaga mu mpera z’iki cyumweru, dore ko impaka z’uwaje imbere mu modoko zo zitumye irushanwa risozwa hatamenyekanye uwatsinze.

Iri rushanwa ryatangiye kuri uyu wa Gatandatu rigasozwa ku cyumweru, ryari ryitabiriwe n’imodoka 12 zivuye mu bihugu by’u Rwanda, u Burundi na Uganda; gusa ryashojwe hatamenyekanye uwaryegukanye nyuma yaho Mohamed Roshamali waturutse mu gihugu cy’u Burundi atemeye ko Gakwaya Claude yamuje imbere kuri iki cyumweru.

Mayor w'Akarere ka Huye Muzuka Eugene na we yagize umwanya wo kumva uko isiganwa ry'imodoka rimera

Ibi, bikaba byatumye ishyirahamwe ry’ umukino wo gusiganwa ku modoka mu Rwanda rivuga ko rigomba gutegereza nibura andi masaha 48 ngo hamenyekane uwatsinze nkuko umuyobozi w’iri shyirahamwe Gakwaya Christian yabidutangarije.

Yagize ati “Hari utwuma tuba mu madoka yabo dukorana na satellite tureba neza igihe umuntu yahagurukiye n’igihe yahagereye n’umuvuduko yari ho. Utwo ni two tuzifashisha kuko two ntitujya twibeshya”.

“Amategeko atwemerera gutangaza ibihe mu masaha 48 bityo ni bwo tuzabamenyesha uwatsinze nyuma yo kureba neza iby’utwo twuma tuzatwereka”.

Mohamed Roshamali ukinana na Giesen Jeanjean, bari bashoboye kuza ku mwanya wa mbere ku munsi wa mbere w’isiganwa wakinwe kuwa Gatandatu, gusa kuri iki cyumweru ibihe biza kwerekana ko Gakwaya Claude na Mugabo Claude babaje imbere ho amasegonda, ikintu aba batahise bemera bikaza gutuma haziyambazwa irindi koranabuhanga.

Uretse imodoka, iyi minsi ibiri ya Memorial Gakwaya yaranzwe n’imyiyereko ya za moto z’abakinnyi babiri bavuye muri Afurika y’Epfo. Ni moto zakuruye imbaga y’abaturage b’Akarere ka Huye bari baje kureba uko Nick de Wit na Scott Billet bagurutsa moto zigahinduka indege.

Abategura Memorial Gakwaya, bijeje abatuye Huye ko aba basore bombi bazongera bakagaruka n’umwaka utaha, mu gihe biteganyijwe ko umubare w’imodoka uziyongera kurushaho cyane ko Memorial Gakwaya ihora ifite umwihariko buri mwaka.

Memorial Gakwaya cyangwa Rally ya Huye ,iza ku mwanya wa gatanu ku ngengabihe ya shampiyona y’umukino w’imodoka mu Rwanda aho ibanziriza andi masiganwa arimo Kabare Rally, Sprint Rally, Rwanda Mountain Gorilla Rally na Liberation Day Rally, mu gihe iyi izakurikirwa na Rally de L’Est ndetse na Rally des Milles Collines isoza shampiyona y’u Rwanda.

Moto zashimishije abatuye Huye
Imodoka na zo ziyeretse abari baje kuri Stade Huye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza