Abanya-Rubavu bongeye kwizihirwa na siporo rusange nyuma y’umwaka batayitabira (Amafoto)

Yanditswe na Mukwaya Olivier
Kuya 28 Mutarama 2018 saa 06:44
Yasuwe :
1 0

Abaturage b’ingeri zose bo mu Karere ka Rubavu bazindukiye muri siporo rusange yari imaze umwaka idakorwa ku mpamvu zirimo n’izijyanye no guhindagurika k’ubuyobozi.

Iyi siporo yabaye mu gitondo cyo kuri iki Cyumweru, tariki ya 28 Mutarama 2018, yakorewe mu mihanda itandukanye y’i Rubavu yari yahejwemo ibinyabiziga nk’uko bikorwa mu yindi mijyi yo mu gihugu aho imaze gushinga imizi.

Abaturage bazindukiye muri siporo bagaragaje ko ibafitiye akamaro ndetse hari n’abo yakijije uburwayi babitangira n’ubuhamya.

Nyirahabimana Djalia avuga ko akora siporo kuko yamuvuye indwara yo kuribwa amaguru.

Yagize ati “Iyi siporo impamvu nyitabira ni uko nari ndwaye nkajya numva mu maguru harimo ibintu bindya, muganga ampimye asanga nta burwayi mfite. Yansabye kujya nkora siporo niruka nkajya no mu mazi, kuri ubu uburwayi bwaragabanutse nta kibazo nkigira.’’

Nizeyimana Patrick na we yavuze ko umubiri we ukora neza bikanatuma ingingo zidahungabana bitewe no gukora siporo.

Yagize ati “Ubu numva umubiri wanjye umeze neza ndetse ingingo ziri gukora neza bigatuma numva buri gihe mfite imbaraga.’’

Umuyobozi w’Ibitaro bya Gisenyi, Lt Colonel Dr Kanyankore William, yabwiye abaturage bitabiriye siporo ari umuti ku ndwara zinyuranye ndetse inafatwa nk’urukingo.

Yagize ati “Nk’abaganga turababwira ngo murye ibyo mushoboye kurya igihe cyose ukora siporo ariko n’utayikora. Kuri izi ndwara zitandura nta wundi muti kandi nubwo bawuguha ntacyo wamara udakora siporo. Nabonye benshi hano barwaye diabète ariko bampaye ubuhamya ko bakize, bavuye ku binini abandi bari ku nshinge kubera umuvuduko w’amaraso barabihagaritse kuko batangiye siporo.’’

Umuyobozi w’Akarere Ka Rubavu, Habyarimana Gilbert, wari mu bitabiriye siporo yashimangiye akamaro kayo ndetse avuga ko hashyizweho ingengabihe izabafasha kurushaho kwitabira iki gikorwa.

Yagize ati “Buri cyumweru twifuza ko za club zafasha abaturage kubona uburyo bwo gukora siporo. Twumvikanye ko bagiye gushyiramo imbaraga bakinjizamo abaturage bose mu mirenge ariko nibura ku cyumweru cya kabiri tukongera tugahura nk’abaturage ba Rubavu. Ibi bivuze ko tuzajya tubikora kabiri mu kwezi kuko nta kindi bidusaba uretse guhura tukazamura ubuzima bwiza bwacu.’’

Abitabiriye iyi siporo bipimishije ku buntu indwara zitandura, banagirwa inama n’abaganga.

Ubuyobozi bw’Akarere ka Rubavu bwafashe umwanzuro ko iyi siporo izajya ikorwa kabiri mu kwezi kugera ku rwego rw’imirenge yose.

Umunsi ngarukakwezi wahariwe siporo mu Mujyi wa Kigali ‘Car Free Day’ watangiye kuba inshuro ebyiri mu kwezi nyuma y’aho Perezida Paul Kagame mu Ukuboza 2017 yifuje ko yakongererwa amasaha.

“Car Free day” yabaye bwa mbere mu Rwanda ku ya 29 Gicurasi 2016, itangirijwe mu Mujyi wa Kigali iza no kugaba amashami mu bindi bice by’igihugu biri mu Ntara y’Amajyaruguru aho umubare w’abayitabira ugenda wiyongera umunsi mu munsi.

Car Free Day ni umunsi umaze imyaka myinshi witabirwa mu bindi bihugu cyane cyane iby’ibihangange wizihizwa tariki 22 Nzeri buri mwaka. Watangijwe ku rwego rw’Isi mu 2000, mu rwego rwo gukangurira abantu kugabanya kwanduza ikirere bakoresha ibinyabiziga bidasohora imyuka yangiza ahubwo rimwe na rimwe bakagenda n’amaguru cyangwa bagakoresha ibikoresho bitanduza ikirere nk’amagare mu ngendo.

Mu mijyi nka Bogota muri Columbia, Jakarta muri Indonesia, Kaohsiung muri Taiwan, Caracas muri Venezuela; Toronto, Montreal, Ottawa na Winnipeg hose muri Canada ni hamwe mu ho uyu munsi wamaze kuba nk’umuco.

Abaturage b'i Rubavu bitabiriye siporo ari benshi
Siporo rusange yari imaze umwaka idakorwa muri Rubavu
Siporo rusange igiye kuzajya ikorwa inshuro ebyiri mu kwezi
Siporo rusange imaze kwimakazwa mu bice bitandukanye by'igihugu
Iyi siporo yitabiriwe n'abayobozi b'Akarere ka Rubavu
Abaturage bazengurutse imihanda yo mu Mujyi wa Gisenyi
Ni siporo yitabiriwe n'ab'ingeri zitandukanye
Siporo rusange yitabiriwe n'abantu b'ingeri zose
Abitabiriye siporo bapimwe indwara zitandura
Abaturage bishimira ko siporo yabahinduriye ubuzima
Yasobanuye ko yamenye agaciro ko gukora siporo
Umuyobozi w’Ibitaro bya Gisenyi, Lt Colonel Dr Kanyankore William, yabwiye abaturage bitabiriye siporo ari umuti ku ndwara zinyuranye
Umuyobozi w’Akarere Ka Rubavu, Habyarimana Gilbert, yavuze ko hashyizweho ingengabihe izabafasha kunoza uko siporo rusange ikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza