Abasaga 100 bagiye guhatanira imodoka igura miliyoni 72 Frw mu irushanwa rya Golf

Yanditswe na Manzi Rema Jules
Kuya 19 Mutarama 2018 saa 06:53
Yasuwe :
0 0

Mu mpera z’iki cyumweru hateganyijwe irushanwa mu mukino wa Golf biteganyijwe ko rizitabirwa n’abakinnyi basaga 100 barimo ababigize umwuga n’abishimisha, bahatanira ibihembo bitandukanye birimo n’imodoka nshya ifite agaciro ka 72 z’amafaranga y’u Rwanda.

Iri rushanwa rizabera i Nyarutarama rikaba ryarateguwe na Kigali Golf Club ku bufatanye na MTN Rwanda.

Biteganyijwe ko rizatangira ku wa Gatandatu saa kumi n’ebyiri za mu gitondo rigakomeza ku Cyumweru guhera mu gitondo kugeza nimugoroba ari na bwo hazaba umuhango wo gushimira abaryitabiriye no gutanga ibihembo ku batsinze nk’uko Dr Kashaka Karegeya Davis, kapiteni wa Kigali Golf Club yabitangarije abanyamakuru.

Yagize ati “Turimo gutegura irushanwa rya MTN Open rigiye kuba ku nshuro ya 17 kandi twishimiye cyane ubufatanye twagiranye na MTN mu gihe kirekire, kuva mu 2000 batera inkunga iri rushanwa kugeza ubu. Uyu mwaka ibisabwa kugira ngo umuntu yitabire iri rushanwa ni ukuba ari umunyamuryango wa Kigali Golf Club cyangwa akazaza mu batumirwa ba MTN.”

Uretse ibihembo birimo telefone zigezweho, amatike y’indege yo kujya muri Afurika y’Epfo na Dubai, ibikombe n’ibindi, muri iri rushanwa harimo igihembo gikuru cy’imodoka nshya ifite agaciro ka miliyoni zisaga 72 Frw yatanzwe n’ikigo cy’ubucuruzi cya Victoria Motos.

Mu bisabwa kugira ngo umuntu yemererwe kujya mu bayihatanira ni ukuba ari muri kimwe mu byiciro byemerewe gukina by’umwihariko akaba akoresha umurongo w’itumanaho wa MTN kandi nibura mu gihe cy’icyumweru yarakoze ibijyanye no kuhereza amafaranga kuri Mobile Money.

Uzaba yujuje ibyo bisabwa azahangana n’abandi mu gutera agapira bakinisha golf uzabasha kugakubita kagahita kinjira mu mwobo ari uwa mbere akaba ariwe uzahita ahabwa imfunguzo z’iyi modoka kuri ubu iparitse aho bazakinira.

Alain Numa ushizwe imenyekanishabikorwa muri MTN yatangaje ko imyaka yose bamaze batera inkunga ‘MTN Open’ biri mu rwego rwo kwegera abakiliya no kwishimana na bo biciye mu mikino nk’ikiraro gihuza abantu b’ingeri zitandukanye.

Yagize ati “Nk’uko bamwe bajya babivuga, Golf ni umukino ukinwa n’abantu bafite icyiciro runaka barimo kandi kugira ngo tubegere tuganire batubwire ibyo bakeneye, ni ukubasanga mu mukino bakunda.”

Yanavuze ko muri uyu mwaka, MTN izaba yizihiza isabukuru y’imyaka 20 imaze itangiye gukorera mu Rwanda ibirori bikaba bitangiye kare bikazakomeza kugera umwaka urangiye ndetse no mu Ugushyingo hakaba hari irindi rushanwa riteganyijwe kandi rizaba rikomeye cyane.

Mu bandi baterankunga b’iri rushanwa harimo Satguru Travels, Brussels Airlines na Victoria Motos ari nayo yatanze imodoka izatangwa nk’igihembo gisumba ibindi.

Alain Numa ushizwe imenyekanishabikorwa muri MTN akina Golf
Imodoka izatangwa ku mukinnyi uzabasha gutera agapira kagahita kerekeza mu mwobo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza