“CIMERWA Golf Tournament”, irushanwa rigiye kuba ku nshuro ya mbere rizatwara miliyoni 30Frw

Yanditswe na Manzi Rema Jules
Kuya 31 Kanama 2017 saa 11:29
Yasuwe :
0 0

Kigali Golf Club ifatanyije n’uruganda rwa CIMERWA rutunganya sima, yateguye irushanwa rizatwara hafi miliyoni 30 z’amanyarwanda, ryiswe “CIMERWA Golf Tournament” rigiye kuba ku nshuro ya mbere mu mpera z’iki cyumweru rikazitabirwa n’abakinnyi batandukanye babigize umwuga n’abishimisha.

Iri rushanwa rizabera i Nyarutarama ahasanzwe hakinirwa golf kuwa Gatandatu tariki 2 Nzeri 2017,biteganyijwe ko rizitabirwa n’abakinnyi bo mu byiciro bitandukanye by’Abanyarwanda n’abanyamahanga bakorera mu Rwanda nk’uko kapiteni wa Kigali Golf Club, Kashaka Karegeya Devis yabitangarije IGIHE.

Yagize ati “Mbere na mbere ndashimira CIMERWA kuba yaremeye gufatanya natwe mu gutegura rimwe mu marushanwa akomeye cyane rizaba kuri uyu wa Gtandatu. Mu izina rya Kigali Golf Club, twishimiye ubu bufatanye kandi bitari ku nshuro ya mbere ngo birangire ahubwo bikazahoraho.”

Yakomeje agira ati “Mu irushanwa rya CIMERWA Golf Tournament rigiye kuba, tuzaba dufitemo abakinnyi bo mu byiciro bitandukanye, abagabo n’abagore kandi turizera ko rizaba ryiza cyane.”

Umuyobozi mukuru wa CIMERWA, Bheki Mthembu we yavuze ko gutera inkunga iri rushanwa ari igikorwa kiyongera ku bindi bagiramo uruhare byaba imyidagaduro no gufasha abaturage kugira ubuzima bwiza.

Yagize ati “Kuri twe nka CIMERWA ni ishema rikomeye kugirana ubufatanye n’amashyirahamwe y’imikino by’umwihariko Kigali Golf Club. Twasanze ari ngombwa ko ku nshuro ya mbere, CIMERWA yatera inkunga irushanwa rya golf ariko rikaba ari itangiriro ry’ibindi byiza tuzageranaho dufatanyije.”

Yongeyeho ko CIMERWA nk’uruganda rukorera mu Rwanda, rusanzwe rugira uruhare mu bikorwa bitandukanye bizamura imibereho y’abaturage, by’umwihariko muri siporo bakaba bafashaga amakipe y’i Rusizi aho rukorera gusa ubu bakaba bagiye no muri golf kugira ngo abayikina bazagire urundi rwego bageraho mu gihe kiri imbere.

Yavuze ko muri iri rushanwa CIMERWA yashyizemo miliyoni 30 z’amafaranga y’u Rwanda muri rusange, haba ku bihembo bizatangwa ku batsinze, ibikoresho no mu bikorwa by’imyiteguro.

Iri rushanwa rigiye kuba ku nshuro ya mbere ariko rizakomeza kubaho
Kashaka Karegeya Devis ari kumwe na Bheki Mthembu, uyobora Cimerwa
Ibikombe bizatangwa ku bazatsinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza