Dutemberane muri Kigali Arena, inzu idasanzwe y’imikino izajya yakira abantu ibihumbi 10 (Amafoto)

Yanditswe na Eric Tony Ukurikiyimfura
Kuya 29 Gicurasi 2019 saa 08:58
Yasuwe :
0 0

Ahazaza h’u Rwanda ni heza mu mfuruka zose! Mu minsi yashize, ibikorwaremezo by’imikino n’imyidagaduro byari mbarwa kandi nabyo biri ku rwego rudashamaje ariko mu gihe cya vuba, Kigali Arena, iratanga indi sura.

I Remera mu Mujyi wa Kigali, iruhande rwa Stade Amahoro, hari kubakwa inzu y’imikino n’imyidagaduro izajya iberamo imikino itandukanye yo mu nzu, ibitaramo n’inama zikomeye aho izajya yakira abantu ibihumbi 10 bicaye neza.

Umuvuduko iyi nyubako iriho ntusanzwe umuntu arebye uburyo ibindi bikorwaremezo bimara igihe ikinini bikorwa ndetse ugasanga byaranadindiye, ariko yo kuva yatangira, amanywa n’ijoro abafundi baba bari ku gikwa.

Uburyo iri kubakwa vuba kandi neza, ni ibyo gushima ariko na none ni n’umukoro ukomeye ku bandi. Nko ku bafite imishinga y’indi y’ubwubatsi, ni ukwirinda urwitwazo rwatuma idindira kuko tuzajya duhita tubabaza impamvu Kigali Arena yo yuzuye ku gihe, cyangwa se tubasabe mbere kuyigiraho kugira ngo bihutishe ibintu.

Undi mukoro uri ku bakiri bato bifitemo impano. Nta rundi rwitwazo rwo kuvuga ngo mu Rwanda nta bibuga byiza bihari, ntekereza ko n’abandi batatse aho gukorera ibitaramo bahawe umwanya ku buryo bayuzuza bagasarura ayo mafaranga.

Ubwo nabo barasabwa gukora iyo bwabaga, bakaduha ibihangano bitunyura ubundi bakazabona uko bayidutumiramo. Abakinnyi nabo bakaze imyitozo naho ubundi ahazaza ni heza.

Kuri uyu munsi, IGIHE iragutembereza muri iyi nzu kugira ngo utangire utekereze uko uzayibyaza umusaruro. Ifite uburebure bwa metero 18,6 uvuye ku gisenge ndetse ni imwe nzu 10 z’imikino n’imyidagaduro zakira abantu benshi muri Afurika.

Kigali Arena izajya yakira imikino ya Basketball, Volleyball, Tennis na Football ikinirwa mu nzu. Ishobora kwakira ibitaramo, inama mpuzamahanga, ibiterane n’ibindi bikorwa bitandukanye, aho izaba ifite ubushobozi bwo kwakira abantu bari hagati y’ibihumbi umunani n’ibihumbi 11 bitewe n’igikorwa cyabereyemo.

Iyi nzu iri kubakwa na Sosiyete y’Ubwubatsi y’Abanya-Turikiya, Summa- Rwanda, aho mu bakozi 1327 bari kuyubuka uyu munsi, abagera kuri 400 baturuka muri iki gihugu cyo mu Burayi. Summa ni nayo yubatse Kigali Convention Centre.

Kigali Arena igizwe n’ibice bine (zone), aho buri kimwe gifite abo cyagenewe. Winjiriye ku ruhande ruteganye no mu Migina dore ko ariho hazaba hari amarembo makuru, uhingukira muri Zone 4.

Ukihagera, uhingukira ku hazajya hagurishirizwa amatike y’abazajya baza kureba imikino cyangwa ibitaramo mu gihe imbere yaho hari ingazi (escaliers) zifasha abantu kujya cyangwa kuva hejuru muri Stade mu gihe abafite ubumuga bo bashobora kwifashisha ascenseur.

Inyuma gato y’aho bagurira amatike, uhasanga igikoni kizajya gitekerwamo ibintu bitandukanye nk’icyayi, ikawa ndetse n’ibindi abantu bashobora gufata baje ku mukino mu gihe ku ruhande rwaho hagenewe ubwiherero.

Uvuye kuri Zone 4, ugakata ku ruhande rw’ibumuso, hateganye no ku Irimbi ry’Intwari cyangwa kuri FERWAFA, uba ugeze muri Zone 1. Iyi yo iriho imiryango ibiri izajya yinjiriramo amakipe cyangwa abakinnyi baje gukina.

Mu rwambariro rwa buri kipe, hari ahantu hisanzuye ho kwambarira, ubwogero ndetse n’ubwiherero.

Buri kipe izajya iba ifite ibyumba bibiri, bivuze ko ari ibyumba bine bishobora kwifashishwa mu gihe hari imikino ibiri ikurikiranye. Hari kandi n’ikindi cyumba cyagenewe kugorora umubiri no kongera ingufu aho hazashyirwamo ibikoresho bimwe na bimwe bimenyerewe muri Gym.

Kigali Arena izajya yakira abantu bari hagati 8,000 na 11,000 bitewe n'igikorwa cyayibereyemo

Nukomeza ku rundi ruhande, uragera muri Zone 2 izajya yinjiraramo abanyamakuru ndetse n’abandi bantu batandukanye kuko naho hari aho kugurishiriza amatike. Winjiyemo imbere, ubonamo icyumba cyahariwe itangazamakuru, aho rishobora kuganirira n’abatoza, abakinnyi cyangwa rikahakorera imirimo yaryo itandukanye.

Tuvuye muri iki gice n’ubundi tugakomeza mu ruhande twanyuzemo, turagera muri Zone 3. Iyi niyo irimo igice cyagenewe abanyacyubahiro (VVIP), aho ahagana hasi hari urwakiriro ndetse n’uruganiriro rw’aba bantu bakomeye bazajya bitabira ibikorwa bitandukanye bizajya bibera muri Kigali Arena.

Niwitegereza imbere gato ahagana mu ruhande rw’ibumoso, uraza kuhabona igikoni kizajya gitunganyirizwamo ibyo aba banyacyubahiro bazajya bafata mu gihe cy’igikorwa runaka ndetse hazashyirwamo ascenseur izajya izamura ibyo kurya hejuru (aho bazajya baba bicaye).

Umunyacyubahiro (VVIP) ntabwo azajya agira aho ahurira n’abandi kuko we azajya akoresha ascenseur imuvana hasi mu ruganiriro nagera hejuru ashobore gusohoka, akaba yajya mu gice cya kane (kiri hejuru ya VVIP, kizajya cyicaramo abantu basanzwe (ndetse bashobora kuzajya bishyura make), ariko anyuze mu muryango ufungwa ku buryo atari buri wese wahinjira.

Mu gice cya VVIP, hagabanyijemo ibyumba bitandukanye, aho nk’umushyitsi umwe cyangwa umuntu runaka ashobora gufata itsinda ari kumwe na ryo bakicara ukwabo muri icyo cyumba kizaba kirimo televiziyo, bakagira icyo basangira, babishaka bakigira imbere (ahazaba hari intebe), bagakurikira ibibera hasi mu kibuga. Abakozi ba Summa babwiye IGIHE ko ibi byumba bishobora guhuzwa ku buryo nka bibiri bivamo kimwe bitewe n’ubushake bw’ababikoresha.

Kuri buri gice cya Kigali Arena, hari ibyumba byagenewe ibya tekiniki birimo amashanyarazi, amatara n’ibindi bitandukanyemo birimo ibyuma bifasha kongera umwuka muri iyi nzu.

Uko izaba imeze niyuzura

Reka twinjire imbere muri Kigali Arena

Ukihagera ubona ko ari inzu nini itangaje. Hasi hari ikibuga cyisanzuye kizajya gikinirwamo imikino itandukanye twavuze haruguru ndetse gishobora gushyirwamo intebe mu gihe cy’ibitaramo, inama cyangwa ibiterane.

Uvuye ku kibuga, mu mpande zacyo, hari igice cya mbere (metero 6 uvuye ku kibuga) kirimo imyanya y’icyubahiro kuko abazajya bahicara bazajya baba bitegeye cyane ibibera mu kibuga kurusha abandi bose.

Hari ikindi gice gikurikiyeho na cyo cyegereye ikibuga mu gihe hejuru y’ibi bice byombi hari igice cya gatatu gisatiriye igisenge (guhera kuri metero 12 kugeza kuri metero 18.6). Uwicaye muri iki kibuga aba areba abakinnyi bari hasi ye.

Ishimwe Abdul Aziz, utunganya ibishushanyo by’inzu muri Summa- Rwanda Construction na Nshuti M. Yves ushinzwe ubwubatsi n’ubwirinzi muri iyi sosiyete, batembereje IGIHE muri iyi nyubako, batubwiye ko izanashyirwamo televiziyo nini izajya yerekana ibiri kubera muri iyi nyubako.

Ahagana ku Irimbi ry’Intwari hazaba hari inyubako igenewe ibya tekiniki nk’amashanyarazi no kuzimya inkongi. Hari imashini eshatu zizajya zifashishwa mu gucana amatara muri Kigali Arena mu gihe umuriro usanzwe wa REG waba ugize ikibazo mu gihe kandi hari n’uruganda ruyungurura amazi azajya aba yafashwe avuye kuri iyi nzu, akunganira asanzwe ya WASAC.

Kigali Arena yubakanwe ubuhanga kuko mu nkuta zayo hashyirwamo ibituma amajwi azajya aba arimo imbere atajya hanze mu gihe kandi hari n’uburyo iyi nzu irindwa kuba yafatwa n’inkongi y’umuriro ku buryo bworoshye. Ibikoresho byifashishwa mu kubaka iyi nzu harimo ibivanwa mu Rwanda n’ibindi bituruka muri Turikiya.

Ku bazana imodoka ku kibuga, imodoka z’abanyacyubahiro (VVIP) zizajya zishyirwa ku ruhande rwegeranye na Zone 3 mu gihe abandi basanzwe bazajya baparika imodoka zabo ahahoze ikibuga cya FERWAFA.

Biteganyijwe ko Kigali Arena yatangiye kubakwa muri Mutarama uyu mwaka, izuzura mu mpera z’ukwezi gutaha, igatangira kwakira amarushanwa n’ibindi bikorwa bitandukanye dore ko ibi bibuga byayo bizaba byujuje ibisabwa ku rwego mpuzamahanga.

Umuryango w'ingenzi uherereye muri Zone 4 iteganye no mu Migina ndetse hariho ahazajya hagurirwa amatike
Mu bwiherero bw'aho amakipe azaba ari mu rwambariro
Ahazajya habikwa ibikoresho birimo n'intebe
Abantu bazajya bazamuka muri niveau ya kabiri bakoresheje ingazi
Aha hazashyirwamo za ascenseur zishobora kuzajya zinifashishwa n'abafite ubumuga
Icyumba cyagenewe itangazamakuru
Ishimwe Abdul Aziz umwe mu bakozi ba Summa- Rwanda Construction
Uzamuka mu gice cyo hejuru
Imbere muri Kigali Arena, ureba hasi mu kibuga
Igisenge cyatangiye kubakwa ndetse hamwe harasakaye
Hari abazajya bicara mu gice cyo hasi, abandi bicare mu cyo hejuru
Imodoka yifashishwa mu kubaka igisenge
Inkuta zubakwa hifashishijwe n'ibikoresho bituma amajwi adasohoka
Uko Kigali Arena iteye imbere
Abubaka Kigali Arena bakora amanwa n'ijoro
Zone ya gatatu izicaramo VIP (imbere), hakurikireho VVIP, hejuru hicare abasanzwe
Parking y'imodoka z'abazajya bitabira ibikorwa bitandukanye muri Kigali Arena izaba iri hano
Inyubako y'ibijyanye n'amashanyarazi ndetse n'amazi
Kigali Arena irabura igihe gito ngo yuzure
Amazi y'imvura azajya afatwa atunganywe ku buryo yongera gukoreshwa
Hatangiye gushyirwamo ibirahuri
Abanya-Turikiya nibo bubaka Kigali Arena
Mu rwambariro rw'amakipe
Ahazajya hashyirwa amabendera y'ibihugu
Kigali Arena izajya yakira abantu bari hagati 8,000 na 11,000 bitewe n'igikorwa cyayibereyemo
Zone 4 iri hafi kurangira, bari gusiga amarangi
Mu bwogero bwo mu rwambariro
Ibyicaro ni uku bizaba biteye...
Aho abantu bazajya banyura binjira muri stade imbere
Mu gihe izaba yuzuye, ni uko inyuma izajya igaragara

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza