Imihanda ya Bugesera igiye kongera gutumukamo ivumbi mu isiganwa ry’amamodoka

Yanditswe na Manzi Rema Jules
Kuya 18 Gicurasi 2017 saa 03:32
Yasuwe :
0 0

Mu mpera z’iki cyumweru, mu bice bitandukanye by’Akarere ka Bugesera hazabera isiganwa ry’amamodoka “Sprint Rally 2017” rya mbere muri uyu mwaka, rizatabirwa n’imodoka icyenda zirimo eshatu z’Abarundi n’esheshatu z’Abanyarwanda.

Iri siganwa ribanziriza andi ane ateganyijwe muri uyu mwaka, rizaba ku wa Gatandatu tariki 20 Gicurasi, ku ntera ya kirometero 106 rikazatangira saa sita z’amanywa. Abasiganwa bazanyura mu mihanda y’i Bugesera irimo Rweru-Gako na Nemba-Munazi.

Umunyamabanga w’Ishyirahamwe ry’umukino wo gusiganwa mu mamodoka mu Rwanda (RAC), Cyatangabo Ange François, yatangaje ko muri iri siganwa nta modoka zo muri Uganda zizaryitabira nk’uko bisanzwe kuko ryahuriranye n’uko nabo bafite irindi bari gutegura.

Yagize ati “Isiganwa ryo kuri uyu wa Gatandatu rizitabirwa n’imodoka icyenda zirimo eshatu z’Abarundi n’iz’Abanyarwanda. Musanzwe muzi ko Abanya-Uganda nabo bitabira ariko kuri iyi nshuro ntabwo byakunze kuko nabo bafite isiganwa bari gutegura mu cyumweru gitaha.”

Cyatangabo avuga ko ibi nta ngaruka bizagira ku migendekere myiza y’irushanwa ahubwo ko bizaha umwanya imodoka z’Abanyarwanda wo huhangana no kureba urwego rwabo cyane ko hari n’abagera kuri batatu bazaba baryitabiriye bwa mbere.

Muri iri siganwa, RAC izaba inatanga ubutumwa bujyanye no gushishikariza abantu kwirinda impanuka zo mu muhanda, bibutsa abatwara amagare ko nabo bakwiriye kujya bakoresha ingofero zabugenewe (Casque) igihe bari mu muhanda n’aho abatwara moto bagashishikarizwa kuzikoresha neza.

Sprint Rally izakurikirwa na Rwanda Mountain Gorilla Rally iteganyijwe hagati ya tariki 8-10 Nzeri, ikurikirwe na Huye Rally yo izaba hagati ya tariki 28 na 29 uko kwezi, naho Rally de Milles Collines isoza umwaka w’amarushanwa yo gusiganwa mu mamodoka izabe hagati ya tariki 15 -16 Ukuboza 2017.

Mohammed Abbas Roshanali n’umufasha we mu kuyobora, Lee Youssef Habimana bakinira u Burundi nibo bari begukanye iri siganwa ryabaye muri Gicurasi umwaka ushize.

Urutonde rw’abakinnyi bazitabira Sprint Rally 2017

Abanyarwanda

Gakwaya Claude na Mugabo Claude bazaba batwaye imodoka ya Subaru Impreza; Mutuga Janvier na Kayitankore Lionel bazakoresha Toyota Corolla; Semana Genese na Hakizimana Jacques bazaba batwara Peugeot 205 GTI; Nshimiyimana Adolphe na Semuhungu Baptiste bo bazifashisha Toyota Celica GT4; Nizette Christophe na Murenzi Alain bazatwara Peugeot 106 na Sekamana Furaha na Nsanzumuhire Oscar bazaba batwaye Peugeot 205 GTI.

Abarundi bazaryitabira

Giessen Jean Jean na Maceri Diaz bazaba batwaye Toyota Celica; Remezo Christian na Bahezagire Felix bo bazakoresha Toyota Celica na Din Imtiaz na Bigirimana Christophe bazakoresha Toyota Avensis.

Sprint Rally 2017 izitabirwa n'imodoka icyenda zirimo eshatu z'i Burundi n'esheshatu zo mu Rwanda
Ivumbi rigiye kongera gutumuka mu mihanda yo mu Karere ka Bugesera
Muri aya marushanwa abafana baba ari benshi ku mihanda riba rinyuramo
Mu isiganwa ry'uyu mwaka nta modoka zo muri Uganda zizaryitabira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza