Iteramakofe: Ibyo wamenya ku mukino w’amateka uzahuza Mayweather na Conor McGregor

Yanditswe na Manzi Rema Jules
Kuya 24 Kanama 2017 saa 03:52
Yasuwe :
0 0

Mu mpera z’iki cyumweru, mu rukerera rwo ku wa 26 Kanama 2017, abakunzi b’imikino y’iteramakofe bategerezanyije amatsiko umukino uzahuza ibikomerezwa Conor McGregor na Floyd Mayweather ukazabera i Las Vegas muri Leta Zunze Ubumwe za Amerika.

Aba bagabo bombi, Floyd Joy Mayweather Jr. w’imyaka 40 ukomoka muri Amerika ugiye kugaragara akina iteramakofe nyuma yo kurihagarika mu 2015 na Conor Anthony McGregor w’imyaka 29 ukomoka muri Ireland umenyerewe mu mukino baterana amakofe ariko banagundagurana, Mixed martial arts (MMA) bazahura kuri iki Cyumweru mu rukerera ku masaha yo mu Rwanda.

Ni umukino byemejwe ko uzabaho muri Kamena uyu mwaka gusa ukaba warifuzwaga n’abatari bake ahanini kubera uburyo McGregor yakunze kwigamba ko ari we muntu wenyine wabasha gutsinda Mayweather ufatwa nk’umwami w’iteramakofe muri iki gihe dore ko kugeza ubu afite agahigo ko kuba ataratakaza umukino n’umwe mu mateka ye, 49 yabashije gukina yose akaba yarayitsinze.

Akayabo k’amafaranga…

Mu 2015 Mayweather ahura na Manny Pacquiao mu mukino wagurishije ukanarebwa n’amamiliyoni y’abafana ku isi ku mateleviziyo kurusha undi wose mu mateka y’iteramakofe kuko winjije miliyoni 600 z’amadorali ya Amerika. Icyo gihe Mayweather yahawemo akayabo ka 230 mu gihe Pacquiao yahawe agera kuri miliyoni 150.

Kuri iyi nshuro biteganyijwe ko umukino wa McGregor na Mayweather ushobora kwinjiza asaga miliyoni 700 z’amadorali ya Amerika nk’uko ikinyamakuru Telegraph kibitangaza.

Kwinjira kuri uyu mukino bisaba iki?

Uyu mukino uzabera muri T-Mobile Arena i Las Vegas ijyamo abantu ibihumbi 20. Amatike yatangiye kugurishwa iya make ikaba igura amayero ibihumbi 18 ni hafi miliyoni 17 z’amanyarwanda naho ihenze igura ibihumbi 30 ni ukuvuga arenga miliyoni 29 z’amafaranga y’u Rwanda.

Uduhigo tw’aba bagabo…

Mayweather umaze gusezera kuri uyu mukino ubugira kabiri ariko nyuma akisubiraho akagaruka, afite amateka yo kuba mu mikino 49 yakinnye ataratsindwa na rimwe ndetse afatwa na benshi nk’umwami w’iteramakofe muri iki gihe. Azwiho cyane kumenya kureba uwo bahanganye, uko ahagaze n’uko akoresha umubiri we ku buryo bimworohera kumenya igihe cyo gusatira no kwikingira.

Naramuka atsinze uyu mukino azaba akoze amateka atarakorwa n’undi muntu wese kuko azaba anatambutse ku munyabigwi, Rocky Marciano wakinaga iteramakofe ry’abafite ibiro byinshi, wasezeye akinnye imikino 49 adatsinzwe bityo Mayweather akazaba agize 50 adatsindwa mu gihe McGregor we amaze gukina imikino 24 gusa, akaba yaratsinze 21.

Mu mukino w’aba bagabo nubwo badasanzwe bakina ubwoko bumwe bw’iteramakofe, hemejwe ko hazakurikizwa amategeko ya boxing isanzwe. Ibi bivuze ko McGregor atazaba yemerewe gukoresha imigeri cyangwa guturana hasi, ubusanzwe aba yemerewe iyo akina imikino njyarugamba (mixed martial arts).

Mayweather (ibumoso) na Conor McGregor bagiye guhurira mu mukino w'amateka
Mayweather na Conor McGregor bari bamaze igihe bifuza kumvana imitsi
Umukino uzahuza Mayweather na Conor McGregor ushobora kwinjiza abarirwa muri 700 z’amadorali ya Amerika
Conor McGregor afite amateka mu mukino w'iteramakofe
McGregor w'imyaka 29 apima ibiro 70 n'uburebure bwa 1.75 m
Mayweather ahura na Manny Pacquiao wari umukino w'injyanamuntu
Mayweather yatsinze Manny Pacquiao mu 2015 mu mukino wanditse amateka mu isi y'iteramakofe
Mayweather amaze gutsinda imikino 49 yose yakinnye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza