Mu Rwanda hatangiye umukino mushya “Chanbra” ukinishwa inkota

Yanditswe na Manzi Rema Jules
Kuya 25 Nzeri 2017 saa 09:47
Yasuwe :
0 0

Ishyirahamwe ry’umukino wo kurwanisha inkota Chanbra, ryari rimaze imyaka itatu rikorera mu Rwanda ryigisha abakinnyi rinakoresha amarushanwa atandukanye, ryafunguye ibikorwa byaryo ku mugaragaro rihiga guhesha igihugu imidali.

Umukino wa Chanbra ufite inkomoko mu Buyapani ukaba wari mu muco w’ubwoko bw’Aba- Samurai mu myaka ya 1600 nk’uburyo bwo kwirinda. Waje kuvugururwa, ukorerwa amategeko mashya unashyirwa mu mikino mpuzamahanga mu 1971 na Tetsundo Tanabe ari we ufatwa nk’umukurambere wawo akaba ari nawe uwuyobora ku rwego rw’Isi.

Mu Rwanda uyu mukino wahageze bwa mbere mu 2013 utangijwe n’Umuyapani, Tsutomu Takahashi wari uje gukora muri Japan International Cooperation Agency (JICA). Muri iyi myaka yari amaze kuwigisha Abanyarwanda bagera kuri 350 barimo abakiri bato ndetse n’abakuru.

Mu muhango wo kwerekana uyu mukino ku mugaragaro no kwemeza Ishyirahamwe ryawo mu Rwanda ku rwego mpuzamahanga wabereye i Remera kuri stade Amahoro kuri iki Cyumweru, Takahashi yatangarije IGIHE ko ageze ku nzozi yahoranaga zo kubona urubyiruko rw’u Rwanda rukina Chanbra kandi ko azakomeza kurushyigikira uko ashoboye.

Yagize ati “Uyu ni umukino mwiza, ufasha umuntu kugira ubuzima bwuzuye. Ubusanzwe iyo tuwukina dukoresha inkota gusa aha mu kwitoza dufite ibindi bikoresho byabugenewe bizisimbura kuko harimo abana bato batakoresha inkota. Mu Rwanda narahakunze kuko abantu bagaragaje inyota yo kumenya uyu mukino baranawukunda.”

Uyu mugabo ufite dani ya gatandatu imwemerera kuba yakwigisha uyu mukino aho ariho hose ku Isi, yavuze ko mbere bakoraga amarushanwa yoroheje yo kumenyereza abakinnyi ariko ubu bagiye kujya bitabira amarushanwa akomeye no mu bindi bihugu kandi yizeye ko Abanyarwanda bazajya bitwara neza.

Umunyamabanga w’Ishyirahamwe ry’uyu mukino, Rugigana Jean Claude yatangaje ko ubu imbaraga bagiye kuzishyira mu kongera abanyamuryango n’abakina uyu mukino mu gihugu hose ndetse no gushaka ubuzima gatozi.

Yagize ati “Turishimye kuba dutangije uyu mukino ku mugaragaro. Twari tumaze imyaka hafi itanu twitoza, tunategura amarushanwa asanzwe. Ubu tugiye kongera imbaraga mu gushaka abanyamuryango bashya ndetse no gushaka ubuzima gatozi kugira ngo twemerwe na komite olimpike nk’andi mashyirahamwe”.

Uwimanimpaye Florence w’imyaka 16 umaze imyaka ibiri yiga Chanbra, yabwiye IGIHE ko mbere atakundaga imikino ariko mu 2013 yagiye i Nyarutarama asanga barimo kwitoza arabikunda atangira kujya awitoza na we kugeza ubu ukaba warabaye umuco ndetse ukaba unamufasha mu masomo asanzwe yo ku ishuri.

Kugeza ubu iri Shyirahamwe rikaba rigizwe n’amakipe atanu yose akorera muri Kigali harimo New Vision Chanbra Club ya Nyarutarama, United Chanbra Club ya Kimisagara, Strong Chanbra Club ya Kabuga, Samurai Chanbra Club y’i Remera na Sulfo Chanbra Club y’uruganda rwa Sulfo Rwanda.

Abatoza bamaze kugera ku rwego rwo gutoza bagera kuri 30 bamaze kwambara imikandara naho abakina uyu mukino bagera kuri 350.

Abakinnyi ba Chanbra bateze amatwi umwarimu wabo abaha impanuro z'uko bazamura impanpo zabo
Abawukina uyu mukino baba bambaye imyambaro ibarinda gukomeretsanya
N'abakuze ntibatanzwe mu gukina Chanbra
Takahashi avuga ko yishimiye uko mu Rwanda bakiriye uyu mukino mushya
Tsutomu Takahashi amaze imyaka itanu mu Rwanda yigisha uyu mukino
Tsutomu Takahashi watangije uyu mukino mu Rwanda ari kumwe n'Umunyamabanga Nshingwabikorwa w'Ishyirahamwe ry'uyu mukino, Rugigana Jean Claude

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza