Kwamamaza

NPC Rwanda mu byishimo by’intambwe yateye mu myaka 15 imaze ibayeho

Yanditswe kuya 2-11-2016 saa 13:27' na Manzi Rema Jules


Imyaka 15 irashize mu Rwanda abafite ubumuga batangiye kwidagadura no gukina binyuze muri Komite y’Igihugu y’Imikino y’abafite ubumuga (NPC Rwanda).

Iyi komite yatangiye mu bibazo by’urudaca byari byiganjemo kuba abantu barafataga abafite ubumuga nk’abadashobora kugira icyo bamarira umuryango n’igihugu, hakaba n’aho bahezwaga mu bikari kugira ngo batagaragara nk’igisebo mu miryango.

Gusa kuri ubu abafite ubumuga barishimira intera bamaze kugeraho zirimo no guhesha igihugu imidali mu mikino itandukanye bitabira hirya no hino ku Isi.

Celestin Nzeyimana, uyobora NPC(National Paralympic Committee of Rwanda), avuga ko kuri ubu umuntu ufite ubumuga ahabwa agaciro nk’abandi by’umwihariko iyo bigeze mu mikino ngo nta busumbane bukirangwamo ari na cyo kibafasha kwitwara neza mu marushanwa mpuzamahanga bagiye bitabira.

Ati “Ibyishimo dufite nka NPC Rwanda muri iki gihe twizihiza isabukuru y’imyaka 15 tumaze, sinzi uburyo nabivuga ariko ikintu cya mbere twishimira ni agaciro umuntu ufite ubumuga amaze kugira hano mu gihugu cyacu, muri Afurika ndetse no ku rwego mpuzamahanga.”

Nzeyimana avuga ko muri 2001 ubwo imikino y’abafite ubumuga yatangiraga mu Rwanda, bumvaga iri mu rwego rwo gukina gusa bishimisha no kugira ngo bahure ubwabo bamenyane ndetse bikure mu bwigunge babagamo. Gusa ariko ngo ibyo byaje kugera ku yindi ntera birenga ibyo batekerezaga bagera aho baba ba ambasaderi b’igihugu hanze.

Ati “Ibyo twatekerezaga dutangira byaje kurenga. Buriya siporo igira imbaraga zayo zikomeye, byaje gutuma habaho ibindi bikorwa by’indashyikirwa bigerwaho. Ni n’amahire ubu tuvuye mu mikino paralempike, aho amahanga yose yaririmbaga u Rwanda. Ibi byose ni ibiha abafite ubumuga agaciro.”

César Rwagasana ngo ni we munyarwanda witabiriye bwa mbere imikino y’abamugaye yabereye i Sydney muri Australia mu 2000, mu cyiciro cyo koga, nabwo ariwe urinze kwirwanaho kuko iyi mikino yari itaratangira mu Rwanda.

Muri 2004 nyuma y’imyaka itatu bishyize hamwe, u Rwanda ngo rwazanye umudali wa feza mu mikino Olempike y’abamugaye yabereye Athene mu Bugiriki, wegukanywe na Nkundabera Jean de Dieu wabaye uwa gatatu mu kwiruka metero 800.

NPC Rwanda yagiye ikomeza gukora byinshi ifatanyije n’abaterankunga batandukanye byaje no gutuma muri 2013 amateka atazibagirana yandikwa ubwo Muvunyi Hermas yegukanaga umudali wa zahabu mu kwiruka metero 800 muri shampiyona y’Isi yabereye i Lyon, mu Bufaransa.

Nzeyimana avuga ko hirya no hino ku Isi aho bagiye bitabira amarushanwa atandukanye, batunguwe cyane no kuba ikipe y’u Rwanda y’abafite ubumuga irimo abahoze bahanganye ku rugamba, bamwe ari abanzi b’abandi ariko kuri ubu bose bakaba batahiriza umugozi umwe baharanira ishema ry’igihugu.

Iyi ni nayo mpamvu yatumye mu kwezi gushize, NPC Rwanda itumirwa muri Colombia, ikipe y’umukino wa Sitting Volleyball ikina imikino ya gishuti nyuma yakirwa na Perezida Juan Manuel Santos mu rwego rwo kuganira ku buryo siporo ishobora guhuza abahoze bahanganye dore ko iki gihigu cyoretswe n’intambara imaze imyaka irenga 50.

Umuyobozi wa NPC avuga ko kuri ubu bashyize imbaraga mu gufasha abafite ubumuga mu bice byo hirya no hino mu gihugu kugira ngo nabo bagire uburenganzira nk’ubw’abandi , gusa ngo amikoro yo kubaka ibikorwaremezo biborohereza akaba akiri make nubwo bafite icyizere ko bizashoboka bagereranyije aho bavuye n’aho bari ubu.

Abafatanyabikorwa ba NPC bo mu Buyapani bifatanyije nayo mu kwishimira ibyo bagezeho muri iyo myaka yose
Nzeyimana avuga ko NPC yageze kuri byinshi mu myaka 15 imaze harimo no guha agaciro abamugaye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved